1 Korɛ̰t 11 - Gabri Maja

¹ «Ayagɨŋ cay tɨbanɨ hɨn̰ gɨ ɨŋ-bandi kalɨn̰ ma ɨŋ ba ayɨn̰ cay tɨban̰ Kɨris wo̰ bɨ le.»

Kuɗa gɨ tama saɗa ca

² Ɨŋ hɨramgɨŋ kɨya wa a bon̰ hɨnga nɔm kɨŋ hɨn a canɨ bɨ, hɨnga ga ɨŋ ba gɨlgɨŋ tumɔ le kɨŋ ƴom kuɗa bɨ.

³ Ama hɨnga ga ɨŋ gey gɨ kɨŋ na sɨla duroyge ba kɛ: Kɨris na ba-cay bara bɨ, bara na ba-cay tama bɨ, Kumu na ba-cay Kɨris bɨ.

⁴ Hɨn̰ gɨ bara na ɨr ula Kumu, naŋ le na ɨr ya-kɔl-gɨ-Kumu-ba-yɔɔ ma na saɗa cayi na, ban dɨbɨ na dasi cay Kɨris gɨ na ba-cay.

⁵ Ama hɨn̰ gɨ tama na ɨr ula Kumu, naŋ le na ɨr ya-kɔl-gɨ-Kumu-ba-yɔɔ dɨle saɗe caa na, hɨndi dɨbɨ na dasi cayi kudurɔ gɨ na ba caa bɨ. Woy hɨn̰ gɨ hɨndi na dɨl naa caa wo̰.

⁶ Hɨn̰ gɨ tama na kan̰a saɗe caa na, ɗa gɨ hɨndi dɨl caa coŋ, ama hɨn̰ gɨ wale caa naŋ le dɨle caa naa hɨnga ga di dasi kol cay tama na, ɗa gɨ hɨndi saɗa caa.

⁷ Gɨ ojɨ cay bara na, ojɨ gɨ ban gɨ saɗe cayi naŋ. Kɨya wa Kumu ɗey ɗe gɨlɨn̰ danayi ɗe gɨl gusoŋ-tɔgɛ koyi. Ama tama na gɨl na gusoŋ-tɔgɛ da kudurɔɔ.

⁸ Na cɨndi, na bara ba sa a gusi tama naŋ ama na tama ba sayga a gusi bara.

⁹ Kumu ɗa bara na kɨya cay tama naŋ, ama ɗe tama na kɨya cay bara.

¹⁰ Na toy di hɨn̰ wo̰ ma ojɨ gɨ tama na saɗa caa ɗe gɨl gɨ hɨndi na dobɨ caa bɨn̰ kudurɔɔ gɨ na ba caa naa kol cay ka-ƴɔbɛ ga daa.

¹¹ Hɨnga ga nee le nɔm na cɨndi, ama gɨ dan̰ gɨyəŋ gɨ Ba-gulɔŋ ɗe na, dɨle bara na tama unɔ bɨ, dɨle tama na bara unɔ bɨ.

¹² Kɨya wa tumɔ tama sayga na gusi bara bɨ, haw kɛ tama ba wɔɔ bara bɨ, hɨnga nɔm sayga na gusi Kumu bɨ.

¹³ Kɨŋ gusɨgɨŋ ɨrɨmgɨŋ sɨla: Hɨn̰ gɨ tama na ula Kumu dɨle saɗe caa na, bayoo ga?

¹⁴ Kɛ hɨnga ga Kumu gusi ɗe le gɨl na gɨ teɗi caa di sɨngɨɗɨ naa dasi kɨya cay bara naŋ ga?

¹⁵ Ama hɨn̰ gɨ teɗi ca tama na sɨngɨɗɨ na, teɗi caa di sɨngɨɗɨ le dɨbɨ gusoŋ-tɔgɛ caa. Kɨya wa Kumu bɔɔ teɗi caa na ban̰dɨ kɨbɨ badɨge ga ni saɗɨn̰ caa.

¹⁶ Hɨn̰ gɨ ungo na gey man̰e-kɔl cay nee na, ni-gandi bɨ Ka-Daye ga da Kumu bɨ, ni ɨran̰ dan̰ hada di nee le naŋ.

Gɨyəŋ gɨ ni dɔɔ dɔɔ gɨ da Ba-gulɔŋ

¹⁷ Kɔl gɨ kɛ le toy ayaŋ ɨni, ama gɨ ɗaŋ gɨ ni ba kɨya ɔrɛ jɨn̰ nee le, ɨŋ kɨya hɨramgɨŋ cay nee naŋ. Kɨya wa dayaŋ kogɨŋ na dayaŋ gɨ laa gɨ kɨŋ malga cɨndɨgɨŋ tumɔ tumɔ naŋ, ama lee gɨ kɨŋ jɨga na karu karu.

¹⁸ Hɨnga ga cay wase na yəŋge gɨ kɨɗɨn̰ ga kɨŋ na daya caygɨŋ kɨɗɨn̰ dayaŋ gaŋ na, puyoŋ na woy duroygɨŋ. Bɨ ɨŋ sol kuɗa gɨ na kɔl gɨ ni poy nɔm naŋ.

¹⁹ Ho’o, na wa wa kalɨn̰ ma ɗa gɨ ɗe puyoŋ woy duroygɨŋ ɗe kalaŋ ga leen̰ cɨndi gɨl gusɨge gerɨn̰ gerɨn̰ daa duroygɨŋ.

²⁰ Hɨn̰ wo̰ na kɨɗɨn̰ ga kɨŋ ba dayaŋ le, dɔɔ gɨ kɨŋ ba di le na dɔɔ gɨ da Ba-gulɔŋ naŋ.

²¹ Kɨya wa a bon̰ tɨwa da dɔɔ hɨnga gaŋ na, waŋ waŋ kalɨn̰ ma jar na kɨya dɔɔ dɔɔ koyi. Na toy di hɨn̰ wo̰ ma, kalaŋ ga pɨna somge dan̰ kuroŋ duroygɨŋ bɨ, ga ɗaŋ cɛrɛ koydɨge bɨ.

²² Kɛ kɨŋ ɨran̰ dan̰ ƴaadɨgɨŋ gɨ ni dɨn̰ dɔɔ bɨ, gɨ ni sɨn̰ hɨnga bɨ, naŋ ga? Wala kɛ kɨŋ hagɨr na Ka-Daye gɨ da Kumu bɨ, kɨŋ gey dɨbe na dasi cay kan ga ɨran̰ dan̰ hɨnga naŋ bɨ ga? Kɛ ɨŋ yagɨŋ na wa ga? Kɛ ɨŋ hɨramagɨŋ koldi ga? Cə cə, ɨŋ kɨya hɨramgɨŋ koldi naŋ.

²³ Hɨnga ga Ba-gulɔŋ ba gɨləŋ ɨŋ-bandi ma maŋ ba gɨlgɨŋ jɨn̰ tumɔ le ba kɛ: A duroy son̰do di kan ba kɨya dobɨn̰ Ba-gulɔŋ Jesu kobɨ kalaŋ le, ban say ay dan̰ mapa,

²⁴ leen̰ Kumu ho’o tumɔ pa dɨm ma ban boy duroy nee bɨ ye hɨn̰: «Mapa di kɛ le na kuyoŋdi-gusɨnɨ gɨ na kogɨŋ. Laagɨŋ hɨn̰ wo̰ agɨŋ hɨnɨn̰ canɨ.»

²⁵ Kɨɗɨn̰ ga kan diige dan̰ mapa le ɨni na, Jesu say ay dan̰ kobo ga ni nare le bɨge hɨn̰ gɨ ban ba leen̰ dan̰ mapa le bɨ yege hɨn̰: «Kobo gɨ ni nare ga kɛ le na saɗe kɨbɨ pɨna ɓɨse gusu gɨ hɨrɨwa gɨ ɨŋ lee dan̰ gɨyəŋ gɨ da kɨbarnɨ. Laagɨŋ hɨnga ga nee le a bon̰ tɨwa dɨŋ nɔm di kɨŋ kɨya son̰ agɨŋ hɨnɨn̰ canɨ.»

²⁶ Kɨya wa a bon̰ tɨwa nɔm gɨ kɨŋ kɨya dɔɔ mapa di nee le bɨ, sɔ hɨnga ga a bon̰ kobo ga ni nare gɨ nee le bɨ na, kɨŋ kɨya tɔgɛ bɛrnɛdi tɨma da Ba-gulɔŋ bɨrɨŋ gɨsɨn̰ gɨ ban kɨya jɨgan̰.

²⁷ Na toy di hɨn̰ wo̰ ma ungo gɨ na da mapa wala sa hɨnga ga a bon̰ kobo gɨ ni nare gɨ da Ba-gulɔŋ dan̰ hal gɨ kuɗa gɨ ni dɨn̰ naŋ bɨ son̰ naŋ bɨ na, bɔyɛ kɔl kɨya ƴɔmɛ cayi kɨya wa ban hagɨr kuyon̰ Ba-gulɔŋ bɨ kɨbardi bɨ.

²⁸ Naa hɨn̰ wo̰ na ɗa gɨ waŋ waŋ kalɨn̰ ma kɨba gusi sɨla pa dɨm ma dan̰ mapa bɨ san̰ hɨnga ga a bon̰ kobo gɨ ni nare gɨŋ bɨ.

²⁹ Kɨya wa waŋ waŋ gɨ na da bɨ sa bɨ dɨle dorɨn̰ cɨn̰ kuyon̰ Ba-gulɔŋ na, hɨnga ga ban di bɨ si bɨ le na bɔyɛ kɔl gɨ ban boy a cay gusi koyi gɨŋ.

³⁰ Na toy di hɨn̰ wo̰ ma ka-hɔmɨn̰ɛ kondɨge duroygɨŋ bɨ, kalaŋ ga togɨyge unɔ kondɨge bɨ, kondɨwayge mage bɨ.

³¹ Hɨn̰ gɨ na na kɨba gusɨna kona gaŋ sɨla na, Ba-gulɔŋ kɨya bɔyɛ kɔl cayna naŋ.

³² Ama ban boy kɔl cayna bɨ halna bɨ na gɨ ɗe kɔl na ƴom cayna dan̰ kalaŋ ga cay gɨsəŋ gaŋ kɛ naŋ.

³³ Naa hɨn̰ wo̰ na, karmɨnɨ ga ban̰aŋ dan̰ ga kandɨ, kɨɗɨn̰ ga kɨŋ ba dayaŋ kɨya dɔɔ dɔɔ gɨ da Ba-gulɔŋ na, kɨŋ gama gusɨgɨŋ dɨm.

³⁴ Hɨn̰ gɨ kuroŋ na laa ungo na ɗa gɨ ban da dɔɔ a tayi, ɗe Kumu bon̰ kɔl cayi kɨɗɨn̰ ga kɨŋ kɨya daye caygɨŋ naŋ. Te kɔl gɨ ba baa na kɨɗɨn̰ ga ɨŋ na bugoŋ gusɨgɨŋ pa dɨm ma maŋ kɨya n̰ane ƴee.