1 Korɛ̰t 10 - Gabri Maja

Ɗagɨŋ muɗɔlɛ cay gusɨgɨŋ ojɨn̰ cay kulan̰əŋ

¹ Ay, karmɨnɨ ga ban̰aŋ dan̰ ga kandɨ, ɨŋ gey gɨ kɨŋ sɔmɛ dɨle sɔlɛ-hɨnga ga lee mon̰ina ga jɨne naŋ. Kan nɔm somge na a te gɨrɨmbale gaŋ bɨ, kan nɔm gayge kuray gɨ gumu bɨ.

² Lee gɨ kan nɔm bugoŋge pɨna dan̰ Moyis dan̰ gɨyəŋ gɨ da batɛm di bon̰ gɨrɨmbale gaŋ bɨ, bon̰ kuray gɨ gumu gɨŋ bɨ.

³ Kan nɔm diige dɔɔ gɨ pɨna hayi gɨ da Turnɔ gɨ Kumu ba bɨge bɨ.

⁴ Kan nɔm sige na kaŋ ga pɨna hage ga da Turnɔ gɨ Kumu ba bɨge bɨ. Kaŋ ga nee le andaŋ na gusi garma gɨ Kumu bɨge bɨ, gɨ gor danage bɨ. Garma gɨ nee le na Kɨris.

⁵ Ama na sol gɨ kondɨwayge duroyge ƴage cɨn̰ Kumu naŋ, na toy di hɨn̰ wo̰ ma kondɨ a duroyge gundɨge sadɨldaŋ duroy daldɨŋ.

⁶ Hɨnga ga nee le nɔm andaŋ cayge ɗe na won̰ sɨman̰ kɔl cayna. Ɗe ana na orɨn̰ dan̰ tabɨlaŋdi hɨnga ga ɨsɨn hɨn̰ kage wo̰ naŋ ɨni.

⁷ Kɨŋ ɗɔɔ ba-n̰ɨre kula hɨn̰ kalaŋ ga pɨna duroyge ba leen̰ge wo̰ naŋ. Hɨn̰ gɨ kan ba walge duroy Magtubu di da Kumu dɨŋ yege hɨn̰: «Karɨn̰ Ɨsɨrayɛl na somge dugo diige dɔɔ bɨ, sige bɨ, kardi nee sayge daa kɨya loon̰ge sɔrɛ.»

⁸ Kɨŋ ɗɔɔ ba male kandɨ wala ban̰aŋ bon̰ ɨsɨna gɨŋ hɨn̰ kalaŋ ga pɨna duroyge ba leen̰ge wo̰ naŋ. Lee gɨ kalaŋ dubu toy-sɔɔ-cayge-sɨbɨ marɨn̰ge baɗag duroy wɔlɛ gɨ pɨna gɨŋ.

⁹ Na ɗɔɔ ba gɨybe Ba-gulɔŋ hɨn̰ kalaŋ ga pɨna duroyge ba leen̰ge wo̰ naŋ, lee gɨ kumbulon̰əŋ hɨndɨdɨge dɨɗɨge.

¹⁰ Kɨŋ ɗɔɔ ba n̰ame kɔl hɨn̰ kalaŋ ga pɨna duroyge ba n̰amɨn̰ge lee gɨ kan mundoŋge coŋ kobɨ ba-ƴɔbɛ gɨ daa nii gɨ ba dɨɗe kɨɗɨn̰.

¹¹ Hɨnga ga nee le nɔm andaŋ cayge ɗe na won̰ sɨman̰ bɨ, walge dugo duroy magtubu dɨŋ ɗe na sog sɨmayna na-gandi ga na ba woy kɨbɨ kagadi wɔlɛ gɨŋ bɨ.

¹² Na toy di hɨn̰ wo̰ ma ungo gɨ ɨrɨm kuduroy gɨ ɗi naa ungo gɨ ɨre daa na, ɗa gɨ ban ɗa muɗɔlɛ a cay gusi gɨŋ gajanaŋ ban da bɔɔ.

¹³ Hɨnga ga ni gɨybe ga toyge kan̰dɨge kan̰dɨge ga ba leegɨŋ le, gɨlɨn̰ na dan̰ hɨnga ga ni gɨybe ga da kamdɨgɨŋ kalaŋ ga ɨndəŋ bɨ. Kumu na ungo gɨ ɨre a cay tɨbay dɨŋ, ban kɨya ɗɔɔ hɨnga ga ni gɨybe ɗɨn̰ togɨygɨŋ naŋ. Ama kɨɗɨn̰ ga hɨnga ga ni gɨybe na andaŋ caygɨŋ na ban kɨya bɨgɨŋ tɔgɨ ɗe agɨŋ na ƴomɨn̰ kuduroygɨŋ bɨ, kɨya bɨgɨŋ gɨyəŋ ɗe agɨŋ na andɨn̰ duroy nee coŋ bɨ.

¹⁴ Na toy di hɨn̰ wo̰ ma, karmɨnɨ ga ɨŋ lee-toygɨŋ, bɨlgɨŋ kardɨgɨŋ bɨn̰ kulan̰əŋ.

¹⁵ Ɨŋ solgɨŋ leen̰ kalaŋ ga si cɨn̰-muɗɔlɛ cay gusɨge gɨŋ ma maŋ yəgɨŋ kɔl gɨ nee le. Kɨŋ-gandi dan̰ gusɨgɨŋ kogɨŋ dɨŋdɨgɨŋ duroy kɔl gɨ ɨŋ ba yəgɨŋ le sɨlagɨŋ.

¹⁶ Kɨŋ ɨrɨm a cay kobo gɨ ni tɔrɛ-kɨbɨ gɨ ni ba leen̰ Kumu ho’o koldɨge le: Kɨɗɨn̰ ga na ba si hɨnga ga boy nee le kɛ bɨgana pɨna dan̰ kɨbardi Kɨris le naŋ ga? Bɨ mapa di na ba boy dugo le: Kɨɗɨn̰ ga na ba di le kɛ bɨgana pɨna dan̰ kuyoŋdi Kɨris le naŋ ga?

¹⁷ Ho’o, kɨya gɨ mapa di nee le na pɨnaa kəɗ kəɗ bɨ, na-gandi ga dan̰ kondiina le kalɨn̰ ma na bɨləŋgɨŋ na kuyoŋ-gusu gɨ pɨna dan̰ gɨyəŋ gɨ da dɔɔ mapa di pɨnaa kəɗ kəɗ di nee le bɨ.

¹⁸ Ɨrɨmgɨŋ a cay te wɨn̰je gɨ da Ɨsɨrayɛl. Kalaŋ ga diige kuyoŋ gɨ been̰ge kɨbar le kɛ bugoŋge pɨna dan̰ kɨɗɨn̰ ga kan gaɗɨge kɨya bogɨn̰ kɨbar le naŋ ga?

¹⁹ Kɛ na kɨya wa ma maŋ yəgɨŋ dan̰ kɔl gɨ nee le ga? Kɛ ɨŋ ye na gɨ kuyoŋ gɨ kalaŋ wadɨldege been̰ kɨbar bɨn̰ kulan̰əŋ le na hɨnga ga? Kɛ ɨŋ gey yɔ na gɨ kulan̰əŋ na orɨn̰ge dan̰ hɨnga ga pɨna ga leen̰ cɨndi nee ga?

²⁰ Naŋ bɨrɨŋ! Ama ɨŋ gey yɔɔgɨŋ na gɨ hɨnga ga kalaŋ ga toyge na Jubɨ naŋ walge been̰ kɨbar le bɨn̰ge na turnɔn̰əŋ ga ɨsɨndəŋ wala walage kɨbar bɨn̰ge na Kumu naŋ. Hɨn̰ wo̰ na ɨŋ gey gɨ kɨŋ gɨ bugoŋ pɨna dan̰ turnɔn̰əŋ ga ɨsɨndəŋ le naŋ.

²¹ Kɨŋ-gandi kɨŋ kɨya ɓale sɔ hɨnga ga a boy kobo gɨ da Ba-gulɔŋ gɨŋ bɨ, sɔ hɨnga ga a boy kobo gɨ da turnɔ ga ɨsɨndəŋ gaŋ bɨ nee coŋ naŋ. Kɨŋ-gandi kɨŋ kɨya ɓale dɔɔ hɨnga a kɨbɨ tabɨl da Ba-gulɔŋ dɨŋ bɨ, dɔɔ hɨnga a kɨbɨ tabɨl da turnɔ ga ɨsɨndəŋ bɨ nee coŋ naŋ.

²² Wala kɛ na geygɨŋ male kɨbɨ Ba-gulɔŋ ɗe jangɨ na leeyi ga? Kɛ na orɨn̰ dan̰ tɔgɨ gɨɗaŋ ɗɨn̰ toyi ga?

Laagɨŋ hɨnga nɔm kɨya gusoŋ-tɔgɛ da Kumu

²³ «Ɗege gɨyəŋ bəŋ gɨ ɨŋ na laa hɨnga nɔm», ama hɨnga nɔm bayana gɨ ni lɔɔ naŋ. «Ɗege gɨyəŋ bəŋ gɨ ɨŋ na laa hɨnga nɔm», ama hɨnga ga nee le nɔm kɨya loon̰ ungo ɗarwa naŋ.

²⁴ Ɗɔɔ gɨ waŋ waŋ kalɨn̰ ma male hɨnga ga ojɨ cay ɗarwa di da kuyoŋdi-gusi koyi ƴɔbɨ naŋ, ama mala na hɨnga ga ojɨ cay ɗarwa di da kamdi dɨm.

²⁵ Dagɨŋ hɨnga nɔm ga kɨlge a sugɨ dɨŋ dɨle ɨngɨre toyge, dan̰ kuduroygɨŋ ga ba dugo.

²⁶ Kɨya wa walge duroy Magtubu di da Kumu dɨŋ yege hɨn̰: «Cay gɨsəŋ bɨ hɨnga nɔm ga boy nee bɨ na ga da Ba-gulɔŋ.»

²⁷ Hɨn̰ gɨ ungo gɨ ba-aye-kudurɔ naŋ na mɨlagɨŋ dɔɔ hɨnga ma magɨŋ na gey cay nee na, dagɨŋ hɨnga nɔm ga kan bɨgɨŋ dɨle ɨngɨre toyge, dan̰ kuduroygɨŋ ga ba dugo.

²⁸ Ama ungo na yagɨŋ hɨn̰: «Kuyoŋ gɨ kɛ le naa kuyoŋ gɨ been̰ge kɨbar bɨn̰ kulan̰əŋ na», dɔɔgɨŋ naŋ, kol ban gɨ ba sogɨ sɨmaygɨŋ bɨ dan̰ kuduroygɨŋ ga ba dugo.

²⁹ Ɨŋ ye kɔl na kɨya cay kuduroy bɔɔ dugo kogɨŋ naŋ, ama na kɨya cay kuduroy bɔɔ dugo gɨ da ungo le. Ɨŋ-bandi gɨ ɨŋ ba som dan̰ canɨ le, kɛ na ungo gɨ ɗaŋ ba kɨya bɔyɛ kɔl cay sɔmɛ ca kalɨn̰ tɨnge ga?

³⁰ Hɨn̰ gɨ ɨŋ na laan̰ Kumu ho’o a cay hɨnga ga ɨŋ di na, kɛ na kɨya wa ma kan kɨya yɔɔ kɔl gɨ ɨsɨn kol cay hɨnga ga ɨŋ leen̰ Kumu ho’o cay nee le ga?

³¹ «Hɨn̰ wo̰ na hɨn̰ gɨ kɨŋ na da na dɔɔ, wala kɨŋ na sa naa sɔ, wala kɨŋ na laa naa wa wa kalɨn̰ ma, kɨŋ laa hɨnga nɔm na kɨya dɨbɨn̰ gusoŋ-tɔgɛ cay Kumu.

³² Kɨŋ ɗɔɔ ba lɔɔ hɨnga pɨna ga kɨya bɨle gundo dɔgɛ tɨban̰ Jubɨn̰əŋ naŋ le, Gɨrɛgn̰əŋ naŋ le, Ka-Daye ga da Kumu, noge.

³³ Na toy di hɨn̰ wo̰ ma ɨŋ-bandi kalɨn̰ ma ɨŋ ƴom gusɨnɨ osu leen̰ hɨnga nɔm ɗe na mon̰ kalaŋ le. Kɨya gɨ ɨŋ mal na hɨnga ga da ɗarwa tɨnge naŋ ama na ɗarwa di da kalaŋ ga dan̰ kondiige, ɗe kan na poɗɨn̰ge.