1 Ja̰ 5 - Gabri Maja

Ni boy-kɨmbɨl cay dɔnɔ di a cay gɨsəŋ gaŋ

¹ Waŋ waŋ gɨ na bɨga kuduroy cay Jesu gɨ ban naa Kɨris ban gɨ Kumu dorii na, ungo gɨ nee le bɨləŋ na kurɨn̰ Kumu. Waŋ waŋ gɨ na gey Baynagɨŋ Kumu na, gey karɨndi nɔm bɨ.

² Hɨn̰ gɨ nana geygɨŋ Kumu bɨ, laagɨŋ te tumoyi bɨ na, na kɨya sɔlɛgɨŋ leen̰ cɨndi gɨ na na geygɨŋ karɨndi bɨ.

³ Na cɨndi, geye Kumu le na lɔɔ te tumoyin̰əŋ. Bɨ te tumoyin̰əŋ le, nɨn̰dəŋ naŋ bɨ.

⁴ Ho’o, waŋ waŋ gɨ naa kurɨn̰ Kumu na, orɨn̰ dan̰ dɔnɔ di ni bon̰-kɨmbɨl a cay dɔnɔ di a cay gɨsəŋ gaŋ. Bɨ dɔnɔ di na ba bon̰ kɨmbɨl a cay dɔnɔ ga cay gɨsəŋ gaŋ le, sayga na gusi aye kudurɔ.

⁵ Kɛ, na waŋ ba bɔyɛ kɨmbɨl a cay dɔnɔ ga a cay gɨsəŋ gaŋ ga? Kɛ, na ungo gɨ bee kuduroy cay Jesu gɨ ban naa Kurɨn̰-Kumu le naŋ ga?

Tɨmon̰ di leege a cay Jesu

⁶ Na Jesu-Kɨris ba sɔ gɨɗɨgɨ-Kumu gɨŋ ɨrga cay gɨsəŋ gaŋ bɨ lee batɛm dan̰ kaŋ bɨ, bee kɨbardi dugo dan̰ gɨyəŋ gɨ da tɨmaydi bɨ. Ban ɨrga na dan̰ kaŋ ƴɔbɨ naŋ, ama dan̰ kaŋ bɨ kɨbar bɨ. Turnɔ di da Kumu na kɔl gɨ cɨndi. Na hɨndi ba lɔɔ tɨmon̰ hɨn̰ wo̰ le kɔ.

⁷ Ka-lɔɔ tɨmon̰ le won̰ sɨbɨ:

⁸ Na Turnɔ di da Kumu bɨ, kaŋ bɨ, kɨbar bɨ. Kan ga sɨbɨ ga nee le, beege noyge pɨna.

⁹ Tɨmon̰ di kalaŋ ga ɨndəŋ lee le, na ƴee. Ama tɨmon̰ di Kumu lee le, ɗɨn̰ da kalaŋ ga ɨndəŋ coŋ. Tɨmon̰ di Kumu lee le, ojɨn̰ na cay Kurondi.

¹⁰ Waŋ waŋ gɨ na bɨga kuduroy a cay Kurɨn̰-Kumu na, ƴom dan̰ tɨmon̰ di nee le a ɗugoyi. Ama waŋ waŋ gɨ na bɨga kuduroy cay Kumu naŋ na, lee Kumu leen̰ na ba-poy, kɨya wa ban kan̰ bɔgɛ kuduroyi a cay tɨmon̰ di Kumu lee a cay Kurondi le.

¹¹ Tɨmon̰ di Kumu lee le ba kɛ: Ban gɨ na sɔmɛ-bɨra gɨ dan̰ tumoyi bɨ sɔmɛ-bɨra gɨ nee le, ban bɨna na dan̰ gɨyəŋ gɨ da Kurondi.

¹² Waŋ waŋ gɨ na bugoŋ pɨna dan̰ Kurondi na, orɨn̰ dan̰ sɔmɛ-bɨra gɨ dan̰ tumoyi ɨni. Ama waŋ waŋ gɨ na bugoŋ pɨna dan̰ Kurɨn̰-Kumu naŋ na, ɨran̰ dan̰ sɔmɛ-bɨra gɨ dan̰ tumoyi naŋ.

Sɔmɛ-bɨra gɨ dan̰ tumoyi

¹³ Ɨŋ wal kɔl nɔm gɨ kɛ le duroy magtubu dɨŋ bɨgɨŋ kɨŋ-gandi ga kɨŋ bee kuduroygɨŋ a cay Kurɨn̰-Kumu, ɗe agɨŋ na solɨn̰ gɨ kɨŋ na orɨn̰ dan̰ sɔmɛ-bɨra gɨ dan̰ tumoyi ɨni.

¹⁴ Hɨn̰ gɨ nana ɨngɨrɨn̰gɨŋ Kumu hɨnga ga bugoŋ pɨna dan̰ kuduroy geye koyi na, ban kɨya dɔrɛ sɨmayi jon̰ ɔlɛ konagɨŋ. Na ban ma, kɨɗɨn̰ ga ni na ɨr tumoyi na, ni sɨla hɨnga pɨna naŋ.

¹⁵ Ho’o, na solgɨŋ gɨ ban na je ɔlɛ konagɨŋ, na toy di hɨn̰ wo̰ ma, na solgɨŋ gɨ ban bɨnagɨŋ hɨnga ga na ba oliigɨŋ le ɨni.

¹⁶ Hɨn̰ gɨ ungo na sɨla kurɨndi te lɔɔ ɨsɨna gɨ kɨya pɔyɛ duroyge dan̰ Kumu bɨrɨŋ coŋ naŋ na, kuɗa gɨ ban ula Kumu kol cayi bɨ, ban kɨya bii sɔmɛ-bɨra gɨ dan̰ tumoyi bɨ. Ɨsɨna gɨ kɨya pɔyɛ ungo dan̰ Kumu bɨrɨŋ woy nee. Ama na gɨ nee le ma maŋ yəgɨŋ gɨ kɨŋ na ula Kumu kol cay ka-lɔɔdɨge naŋ.

¹⁷ Hɨnga ga wɨya dan̰ gɨyəŋdɨge naŋ nɔm le na ɨsɨna. Ama na ɨsɨna nɔm ba pɔyɛ ungo dan̰ Kumu bɨrɨŋ naŋ.

¹⁸ Na solgɨŋ gɨ kalaŋ ga Kumu bɨlge leen̰ karɨndi le, laage ɨsɨna naŋ ɨni. Kurɨn̰-Kumu gamge lee gɨ Haban̰ Ba-lɔɔ ɨsɨna ɓala ɨsɨbɨge naŋ.

¹⁹ Na solgɨŋ gɨ na na-gandi ƴɔbɨ ma na kalaŋ ga da Kumu. Ama kalaŋ ga a cay gɨsəŋ gaŋ nɔm le, woyge na te dɔnɔ di da Haban̰ Ba-lɔɔ ɨsɨna gɨŋ.

²⁰ Na solgɨŋ gɨ Kurɨn̰-Kumu caga bɨ, ban ɗe cay nagɨŋ woy bɨra, ɗe ana na solɨn̰gɨŋ Kumu gɨ hɨnde bɨ. Na bugoŋgɨŋ pɨna dan̰ Kumu gɨ hɨnde na dan̰ gɨyəŋ gɨ da Kurondi Jesu-Kɨris. Ban na Kumu gɨ hɨnde bɨ, na sɔmɛ-bɨra gɨ dan̰ tumoyi bɨ.

²¹ Ay karɨnɨ kange, ɗagɨŋ muɗɔlɛ cay gusɨgɨŋ gɨŋ kɨya cay kulan̰əŋ.