1 Ja̰ 4 - Gabri Maja

Turnɔ di da Kumu bɨ da ka-baa ga da Kɨris bɨ

¹ Ay, kɨŋ ga ɨŋ lee-toygɨŋ, bɔgɛgɨŋ kuduroygɨŋ a cay turnɔn̰əŋ nɔm naŋ, ama ojɨ gɨ kɨŋ gɨwasa turnɔn̰əŋ sɨlan̰ kɛ kan sayga na gusi Kumu ga? Kɨya wa ka-yɔɔ-kɔl-gɨ-Kumu-ba-yɔɔ ga cɨndi naŋ kondɨge andaŋge a cay gɨsəŋ gaŋ kɛ ɨni.

² Sɨlagɨŋ, gɨyəŋ gɨ kɨŋ ba kɨya solɨn̰ gɨ ungo na orɨn̰ dan̰ Turnɔ di da Kumu a gusi ba kɛ: Hɨn̰ gɨ ungo na ya gɨ Jesu-Kɨris na ɨrga a cay gɨsəŋ gaŋ kɛ hɨn̰ ungo gɨ ɨndi wo̰ na, ban ye kɔl na dan̰ gɨyəŋ gɨ da Turnɔ di da Kumu.

³ Ama turnɔ di na ya gɨ to na sɨla Jesu naŋ na, saya na a gusi Kumu naŋ. Turnɔ di nee le, na ɗe-baa di da Kɨris di kɨŋ ba je kɔldɔ gɨ na kɨya caga le. Ama haw kɛ na hɨndi woy a cay gɨsəŋ gaŋ kɛ ɨni.

⁴ Ay, karɨnɨ kange, kɨŋ na ga da Kumu, kɨŋ boy-kɨmbɨl a cay ka-yɔɔ-kɔl-gɨ-Kumu-ba-yɔɔ ga cɨndi naŋ le ɨni, kɨya gɨ ban gɨ som a kuduroygɨŋ le, gumu ɗɨn̰ ban gɨ som a cay gɨsəŋ gaŋ.

⁵ Ka-yɔɔ-kɔl-gɨ-Kumu-ba-yɔɔ ga cɨndi naŋ le, kan na ga da cay gɨsəŋ. Na toy di hɨn̰ wo̰ ma kan ye kɔl na hɨn̰ kalaŋ ga cay gɨsəŋ gaŋ wo̰, lee gɨ kalaŋ ga cay gɨsəŋ gaŋ je kɔl kɨbɨge.

⁶ Na-gandi na, nana ga da Kumu. Waŋ waŋ gɨ na sɨla Kumu na, kɨya jɔɔ kɔl kɨbɨnagɨŋ. Ama waŋ waŋ gɨ naa gɨ da Kumu naŋ na, kɨya jɔɔ kɔl kɨbɨnagɨŋ naŋ. Na dan̰ gɨyəŋ gɨ nee le ma mana kɨya solɨn̰gɨŋ turnɔ di da kɔl gɨ cɨndi bɨ, turnɔ di da kɔl gɨ ni poy bɨ.

Kumu gusi na geye

⁷ Ay, kɨŋ ga ɨŋ lee-toygɨŋ, kuɗa gɨ kɨŋ gey gusɨgɨŋ, kɨya gɨ geye sayga na gusi Kumu. Lee gɨ ungo gɨ geye woy kuduroy le, bɨləŋ na kurɨn̰ Kumu bɨ, na ungo gɨ sol Kumu bɨ.

⁸ Ungo gɨ geye unɔ kuduroy le, sɨla Kumu naŋ, kɨya gɨ Kumu gusi na geye.

⁹ Sɨlagɨŋ gɨyəŋ gɨ Kumu wasɨn̰ɨn̰ geye koyi duroynagɨŋ ba kɛ: Ban gɨygɨ Kurondi gɨ pɨna hayi kəɗ kəɗ a cay gɨsəŋ gaŋ ɗe ana na orɨn̰ dan̰ sɔmɛ-bɨra dan̰ gɨyəŋ koyi.

¹⁰ Gɨyəŋ gɨ da geye gɨ da Kumu le ba kɛ: Na na-gandi ba geye Kumu tumɔ naŋ, ama na ban ba geyna tumɔ ma gɨyɨn̰ dan̰ Kurondi ɗe ɨrga. Kurondi le, ɗe gusi bɨn̰ tɨma leen̰ hɨnga ga ni bogɨn̰ kɨbar, kol cay nagɨŋ na toy di hɨn̰ wo̰ ma Kumu ɗen̰ kuduroyi jal a cay ɨsɨna konagɨŋ.

¹¹ Ay, kɨŋ ga ɨŋ lee-toygɨŋ, hɨn̰ gɨ Kumu na geynagɨŋ hɨn̰ wo̰ na, ojɨ gɨ na-gandi kalɨn̰ ma ana geygɨŋ gusɨnagɨŋ hɨn̰ wo̰ bɨ.

¹² Ungo pɨna wo̰ sɨla Kumu dan̰ tɨdi naŋ bɨrɨŋ. Hɨn̰ gɨ nana gey gusɨnagɨŋ na, Kumu bugoŋ pɨna dananagɨŋ bɨ, geye koyi gɨ woy kuduroynagɨŋ le duroŋ cɨrɛɗ bɨ.

¹³ Kumu bɨna Turnɔ toyi. Na hɨn̰ wo̰ ma na solgɨŋ gɨ nana bugoŋgɨŋ pɨna danayi bɨ, ban na bugoŋ pɨna dananagɨŋ bɨ.

¹⁴ Kumu Baynagɨŋ, naa gɨygɨ Kurondi Jesu-Kɨris kɨya pɔɗɛ kalaŋ ga a cay gɨsəŋ gaŋ. Ni solii dan̰ tɨdɨni bɨ, ni lee tɨmon̰ da hɨnga ga nee le bɨ.

¹⁵ Waŋ waŋ gɨ na ya Jesu gusi naa Kurɨn̰-Kumu na, Kumu bugoŋ pɨna danayi bɨ, ban kalɨn̰ ma bugoŋ pɨna dan̰ Kumu bɨ.

¹⁶ Na-gandi na, na solgɨŋ geye gɨ Kumu geynagɨŋ bɨ, na beegɨŋ kuduroynagɨŋ cay nee bɨ. Kumu na geye, lee gɨ ungo gɨ geye na wɨya kuduroyna, ban bugoŋ pɨna dan̰ Kumu bɨ, Kumu bugoŋ pɨna danayi bɨ.

¹⁷ Na hɨn̰ wo̰ ma, a wɔlɛ gɨ ni bon̰ kɔl gɨŋ le, na kɨya hundɔrɔgɨŋ naŋ. Kɨya wa geye gɨ da Kumu duroŋ dan̰ durɔ cɨrɛɗ gusɨnagɨŋ bɨ, na orgɨŋ a cay gɨsəŋ gaŋ kɛ, gɨlɨn̰ na hɨn̰ gɨ da Jesu-Kɨris wo̰ bɨ.

¹⁸ Hɨn̰ gɨ nana sɨlagɨŋ geye gɨ da Kumu na, na kɨya hundɔrɔgɨŋ naŋ. Geye gɨ duroŋ cɨrɛɗ le tay hundɔrɔ gusoo coŋ. Hundɔrɔ sayga na gusi ɨrɨme gɨ da hale gɨ ji kɨya wɔɔ. Ungo gɨ ba hundɔrɔ le duroŋ cɨrɛɗ a te geye gɨŋ naŋ ƴee.

¹⁹ Na-gandi na, na geygɨŋ Kumu bɨ kamdɨnagɨŋ bɨ, kɨya gɨ na ban ba geynagɨŋ cay wase.

²⁰ Waŋ waŋ gɨ na ya hɨn̰: «Ɨŋ gey Kumu», ma na ƴɨma kurɨndi dan̰ kuduroyi na, ban na ba poy. Na cɨndi, ungo gɨ na gey kurɨndi gɨ ban solii dan̰ tɨdi gərɨn̰ gərɨn̰ kɛ naŋ na, ban kɨya ɓale geye Kumu gɨ ban sɨlayi dan̰ tɨdi gərɨn̰ gərɨn̰ naŋ bɨ.

²¹ Te tumɔ di Kɨris bɨnagɨŋ le ye hɨn̰: «Ungo gɨ na gey Kumu na, kuɗa gɨ ban gey kurɨndi bɨ.»