1 Ja̰ 3 - Gabri Maja

Karɨn̰ Kumu

¹ Sɨlagɨŋ, kɛ na geye gɨ mɨna ma Baynagɨŋ gɨlnagɨŋ hɨn̰ wo̰ ga? Geye gɨ da Kumu kol cay nagɨŋ gumu tɔgɨ bɨrɨŋ gɨ ban teenagɨŋ «karɨndi». Na bɨlegɨŋ karɨn̰ Kumu leen̰ cɨndi. Kalaŋ ga a cay gɨsəŋ gaŋ sɨlanagɨŋge naŋ kɨya gɨ kan sɨla Kumu naŋ bɨ.

² Ay, kɨŋ ga ɨŋ lee-toygɨŋ, gɨ na ba somɨn̰gɨŋ haw kɛ na, na-gandi na karɨn̰ Kumu ɨni. Na kɨya wɔyɛgɨŋ gɨlɨn̰a na mɨna ga kardi nee kalɨn̰ ma, Kumu wasɨn̰a cay bɨnagɨŋ naŋ ƴee. Ama na solgɨŋ gɨ kɨɗɨn̰ ga Kurɨn̰ Kumu kɨya jɨga na, na kɨya soliigɨŋ dan̰ cɨndɨnagɨŋ gərɨn̰ gərɨn̰ bɨ, na kɨya wɔyɛ gɨlɨn̰a danayi ca ca bɨ.

³ Waŋ waŋ gɨ na bɨga ɨrɨmedi hɨn̰ wo̰ a cay Kɨris na, kuɗa gɨ ban dɨran̰ gusi mɨra hɨn̰ gɨ Kɨris gusi ba leen̰ mɨra wo̰ bɨ.

⁴ Waŋ waŋ gɨ na wɨya te lɔɔ ɨsɨna na, hangɨɗɨ na cay gasaŋ ga da Kumu. Kɨya wa ɨsɨna na hangɨɗe cay gasaŋ ga da Kumu.

⁵ Kɨŋ sol gɨ Jesu-Kɨris ɨrga na kɨya dɔrɛ ɨsɨnan̰əŋ ga a cay gɨsəŋ gaŋ. Ama ban na, ɨsɨna pɨna wo̰ kalɨn̰ ma unɔ a gusi.

⁶ Waŋ waŋ gɨ na bugoŋ pɨna danayi na, laa ɨsɨna naŋ. Waŋ waŋ gɨ na wɨya te lɔɔ ɨsɨna na, sɨla kurɨn̰ Kumu dan̰ tɨdi naŋ bɨrɨŋ bɨ, sɨlayi naŋ bɨ.

⁷ Ay, karɨnɨ, ɗɔɔgɨŋ ungo nare cɨndɨgɨŋ naŋ. Waŋ waŋ gɨ na laa hɨnga ga dan̰ durɔ ɗɨngar na, na ungo gɨ dan̰ durɔ ɗɨngar hɨn̰ gɨ Kɨris na ungo gɨ dan̰ durɔ ɗɨngar wo̰ bɨ.

⁸ Waŋ waŋ gɨ na laa ɨsɨna na, na ungo gɨ da Haban̰, kɨya wa Haban̰ na ɗe-lɔɔ ɨsɨna a toyi dɨŋ ɓɨrag. Na toy di hɨn̰ wo̰ ma Kurɨn̰-Kumu ɨrga a cay gɨsəŋ gaŋ kɨya mondɨn̰ gɨye-lɔɔ gɨ da Haban̰.

⁹ Waŋ waŋ gɨ na bɨləŋ kurɨn̰ Kumu na kɨya lɔɔ ɨsɨna naŋ, kɨya wa Kumu gɨsɨ sɔmɛ-bɨra koyi a kuduroyi. Lee gɨ ban laa ɨsɨna cɨndi tumɔ tumɔ naŋ, kɨya wa Kumu bɨle na bayi.

¹⁰ Na kɨya sɔlɛ ga ani mana karɨn̰ Kumu bɨ, ga ani mana karɨn̰ Haban̰ bɨ, na dan̰ gɨyəŋ gɨ da gɨye lɔɔdɨge. Ungo gɨ na laa hɨnga ga dan̰ durɔ ɗɨngar naŋ le, ban na gɨ da Kumu naŋ bɨ. Ungo gɨ na gey kurɨndi naŋ le, ban na gɨ da Kumu naŋ bɨ.

Kuɗa gɨ ana geygɨŋ gusɨnagɨŋ

¹¹ Sɨlagɨŋ kɔl gɨ da Kumu gɨ kɨŋ ba je an̰ a toy dɨŋ ɓɨrag le ye hɨn̰: Geygɨŋ gusɨgɨŋ.

¹² Kuɗa gɨ na wɔyɛgɨŋ hɨn̰ Kayin wo̰ naŋ, ban na ungo gɨ da Haban̰, Ba-lɔɔ ɨsɨna, kɨya gɨ naa ban dɨɗɨ kurɨndi koyi gaŋ. Ban dɨɗii na kɨya wa ga? Ban dɨɗii na kɨya gɨ gɨye-lɔɔ koyi na gɨ ɨsɨni, ama gɨ da kurɨndi na gɨ dan̰ durɔ ɗɨngar.

¹³ Ay, karmɨnɨ ga ban̰aŋ dan̰ ga kandɨ, hɨn̰ gɨ kalaŋ ga cay gɨsəŋ gaŋ na ƴɨmagɨŋge dan̰ kuduroyge na, ɗɔɔgɨŋ gɨ kɔl kaygɨŋ naŋ.

¹⁴ Na-gandi na solgɨŋ gɨ na andaŋgɨŋ a kobɨ tɨma dɨŋ coŋ, andɨn̰ a sɔmɛ-bɨra gɨŋ kɨya gɨ na gey karmiinagɨŋ ga ban̰aŋ dan̰ ga kandɨ. Waŋ waŋ gɨ na gey karmii ga ban̰aŋ dan̰ ga kandɨ naŋ na, ban baa na a te dɔnɔ di da tɨma dɨŋ ƴee.

¹⁵ Waŋ waŋ gɨ na ƴɨma karɨmii ga ban̰aŋ dan̰ ga kandɨ dan̰ kuduroyna, ban na ba dɨɗe tɨma. Bɨ kɨŋ sol gɨ ungo gɨ ba dɨɗe tɨma le, sɔmɛ-bɨra gɨ dan̰ tumoyi unɔ a gusii.

¹⁶ Na solgɨŋ geye na dan̰ gɨyəŋ gɨ da hɨnga ga ba kɛ: Jesu-Kɨris ay gusi bɨn̰ tɨma na kol cay nagɨŋ. Naa hɨn̰ wo̰ na, ojɨ gɨ na-gandi kalɨn̰ ma, na na sɨmagɨŋ pḛḛ kɨya aye gusɨnagɨŋ bɨn̰ tɨma kɨya cay karmiinagɨŋ ga ban̰aŋ dan̰ ga kandɨ bɨ.

¹⁷ Hɨn̰ gɨ ungo na ɨran̰ dan̰ kandi-wɔɔ ga a cay gɨsəŋ gaŋ mana lɨgɨ cɨndi daa a cay kurɨndi gɨ hɨnga wɨyii na, kɛ na mɨna ma ban gɨ yɔ gɨ ɗi na gey Kumu ga?

¹⁸ Ay, karɨnɨ kange, ɗɔɔ gɨ na geyegɨŋ gusɨnagɨŋ dan̰ kɔl gɨ a kɨbɨnagɨŋ ƴɔbɨ naŋ, ama kuɗa gɨ na geygɨŋ gusɨnagɨŋ dan̰ gɨye-lɔɔdɨnagɨŋ bɨ dan̰ geye gɨ hɨnde bɨ.

Ɨre tumoy Kumu dɨle sɔlɛ

¹⁹ Hɨn̰ gɨ nana geygɨŋ karmiinagɨŋ ga ban̰aŋ dan̰ ga kandɨ na, na hɨn̰ wo̰ dɨm ma mana kɨya sɔlɛgɨŋ gɨ na naa kalaŋ ga da kɔl gɨ cɨndi. Dan̰ gɨyəŋ gɨ da ɨrɨme gɨ nee le na, ɗugoynagɨŋ kɨya bɔɔ po̰ dugo tumoy Kumu.

²⁰ Hɨn̰ gɨ ɨrɨmedɨnagɨŋ na dɨbɨ kɔl cay nagɨŋ kalɨn̰ ma, Kumu gumu ɗɨn̰ ɨrɨmedɨnagɨŋ bɨ, ban sol hɨnga nɔm bɨ.

²¹ Ay, kɨŋ ga ɨŋ lee-toygɨŋ, hɨn̰ gɨ ɨrɨmedɨnagɨŋ na dɨbɨ kɔl cay nagɨŋ naŋ na, na kɨya ɨre tumoy Kumu dan̰ ɗugoynagɨŋ di baa po̰ dugo.

²² Ko, hɨn̰ gɨ na na ɨngɨriigɨŋ na wa wa kalɨn̰ ma, na kɨya wɔɔgɨŋ a kobi. Kɨya wa na gamgɨŋ te tumoyi bɨ, na leegɨŋ hɨnga ga ƴee cɨndi bɨ.

²³ Kɔl gɨ ban ye dan̰ gɨyəŋ gɨ da te tumoyi le ba kɛ: Kuɗa gɨ nana bɨgagɨŋ kuduroynagɨŋ cay guson̰ Kurondi Jesu-Kɨris bɨ, nana geygɨŋ gusɨnagɨŋ hɨn̰ gɨ Kɨris ba an̰ te tumoyi bɨnagɨŋ wo̰ bɨ.

²⁴ Waŋ waŋ gɨ na gama te tumɔn̰əŋ kayi na, ban bugoŋ pɨna dan̰ Kumu dan̰ wɔlɛ pɨna pɨna bɨ, Kumu bugoŋ pɨna danayi bɨ. Hɨnga ga gɨl gɨ Kumu na bugoŋ pɨna dananagɨŋ dan̰ wɔlɛ pɨna pɨna le, na Turnoyi di ban ɗoo som kuduroynagɨŋ.