Yahaaya 2 - Fulfulde Niger West

Kaɓɓal nder Kaana

¹ Balɗe ɗiɗi gaɗa mum, kaɓɓal waɗi Kaana nder leydi Galili. Inna Iisa no tawanoo toon.

² Iisa e *aahiiɓe mum duu noddaama to maggal.

³ Wakkati cabiijam maɓɓe kaɗɗam hantunoo, sey inna Iisa wi'i Iisa : —Ɓe ngalaa cabiijam.

⁴ Iisa jaabii mo, wi'i : —Inna day, munyanam. Ɗume ngiɗɗaa mi waɗa ? Wakkati am yonaay ginan.

⁵ Nden inniiko wi'i gollooɓe ɓeen : —Ngaɗee ko o wi'i on fuu.

⁶ Looɗe jeegom gaɗiraaɗe kaaƴe gom no tawaa ɗon hadde maɓɓe. Looɗe ɗee ngaɗaama ngam al'aada laaɓinol *Yahudankooɓe. Loone fuu no hooƴa ko watta liitereeji hemre.

⁷ Iisa wi'i gollooɓe ɓeen : —Kebbinee looɗe ɗee ndiyam. Ɓe kebbini ɗe faa ɗe keewi pet.

⁸ Sey Iisa wi'i ɓe : —Joonkay, nyeɗee, njaaranee ardiiɗo batu oon. Ɓe nyeɗi ɓe njaarani ardiiɗo oon.

⁹ Ardiiɗo batu oon meeɗi ndiyam mbaylitaaɗam cabiijam ɗaam. O anndaa to ɗam ƴuwii, amma gollooɓe nyeɗuɓe ɗaam kay, no anndi. Nden o noddi ɓaŋuɗo oon,

¹⁰ o wi'i ɗum : —Himɓe fuu cabiijam mbelɗam mboowi fuɗɗirde. Nden nde ɗam fuɗɗi nanngude ɓe, ɗam welaa ɗam waddee. Amma aan, a resi ɓurɗam welde ɗam naako joonin.

¹¹ Alaama kaayɗiniiɗo oo woni alaama kaayɗiniiɗo arano mo Iisa waɗi. O waɗii mo nder wuro Kaana nder leydi Galili. O wanngini teddungal makko. *Aahiiɓe makko ngoonɗinii mo.

¹² Gaɗa ɗum Iisa, innum, minyiraaɓe mum he *aahiiɓe mum njehi Kafarnahum. Ɓe njooɗii toon balɗe seɗɗa.

Iisa riiwi sonnooɓe nder Juulirde mawne

¹³ Wakkati juulɗe *Yahudankooɓe bi'eteeɗe *Juulɗe dimɗinol Isra'ilankooɓe ɓadinoo, Iisa yehi *Ursaliima.

¹⁴ Nder jawreeru *Juulirde Ursaliima mawne Iisa tawi sonnooɓe ga'i, baali e buugaali he weccooɓe ceede no njooɗii.

¹⁵ O sowi ɓoggi, o riiwi ɓe nder *Juulirde mawne ndeen, kamɓe e ga'i maɓɓe e baali maɓɓe fuu. O sankitii ceede weccooɓe ɓeen, o liɓi teburuuji maɓɓe.

¹⁶ O wi'i sonnooɓe buugaali ɓeen : —Ittee ɗum ɗoo ! To ngaɗee suudu *Baaba am luumorde !

¹⁷ *Aahiiɓe makko miccitii ko winndanoo nder dewte wi'aa : Kiranol suudu maa no huɓɓa ɓerne am sanne.

¹⁸ Nden mawɓe *Yahudankooɓe mbi'i mo : —Ir haayne ndeye mbaawɗaa waɗude ngam hollude min ko a foti waɗude ko ngaɗɗaa ɗum ?

¹⁹ Iisa jaabii ɓe, wi'i : —Pusee *Juulirde mawne ndee, mi nyiɓitan nde nder balɗe tati.

²⁰ Ɓe mbi'i mo : —Juulirde ndee nyiɓiraama duuɓi lasooji ɗiɗi e jeegom. Dey aan, mbiiɗaa a nyiɓitan nde nder balɗe tati ?

²¹ Amma Iisa kay fonndaana *Juulirde mawne ndeen e ɓanndu mum.

²² Ngam majjum waɗi wakkati Iisa ummitinoo, *aahiiɓe makko miccitii ko o haalunoo ɗum'en. Ɓe ngoonɗini ko winndaa wi'aa nder dewte ɗeen e konngi ɗi o haalunoo.

²³ Wakkati Iisa yehunoo *Juulɗe dimɗinol Isra'ilankooɓe nder *Ursaliima, himɓe ɗuɓɓe ngoonɗini mo ngam ɓe ngi'ii alamaaji kaayɗiniiɗi ɗi o waɗi.

²⁴ Iisa hoolaaki ɓe ngam ɓe fuu, omo anndi ɓe sanne.

²⁵ O haajaaka baa gooto maɓɓe seedanoo mo dow ɓiɓɓe aadama, ngam omo anndi ko woni nder ɓerɗe maɓɓe.