Yahaaya 11 - Fulfulde Niger West

Maayde Laajaru

¹ Nder wuro Baytaniya no woodi gorko bi'eteeɗo Laajaru, Laajaru oo yemaaki. Omo woodi sakiraaɓe makko rewɓe ɗiɗo gom, Marta e Mariyaama.

² Mariyaama woni debbo bujunooɗo nebbam uurɗam dow koyɗe Iisa, moytiri ɗe gaasa mum. Too, Mariyaama oo banndum gorko woni Laajaru oo.

³ Sakiraaɓe Laajaru rewɓe ɗiɗo ɓee lili goɗɗo wi'a Iisa : —Moodibbo, war ! Giɗo maaɗa yamɗaa.

⁴ Nde Iisa nanunoo ɗum, sey wi'i : —Nyaw nguu hanaa nyaw mbaroowu. Amma ngu wari ngam wannginde teddungal Alla, heɓa *Ɓii-Alla oon duu teddinee.

⁵ Iisa no hiɗi Marta, Mariyaama e sakiike maɓɓe gorko Laajaru.

⁶ Baa nii ko Iisa nanii Laajaru yamɗaa, ɗum haɗaay mo jooɗaade to o wonnoo toon balɗe ɗiɗi.

⁷ Gaɗa ɗum o wi'i *aahiiɓe makko : —En coƴƴoo leydi Yahudiya !

⁸ *Aahiiɓe ɓeen mbi'i mo : —Moodibbo, ɓooyaay ko *Yahudankooɓe tefi faɗɗude ma kaaƴe nder leydi ndiin. Toon ngiɗaa soƴƴaade kaden naa ?

⁹ Iisa jaabii ɓe wi'i : —Hanaa jamɗe sappo e ɗiɗi ngoni nder nyalooma gooto naa ? Dilloowo nyalooma fuu fergataako ngam no hi'a jeyngol duuniyaaru.

¹⁰ Amma dilloowo jemma fergoto ngam jeyngol walaa he makko.

¹¹ Gaɗa o haalii haalaaji ɗii, o wi'i ɓe : —Higii'en Laajaru ɗaanake, mi yahan, mi findinowa mo.

¹² Nden ɓe mbi'i mo : —Moodibbo, se tawaama o ɗaaniiɗo, ndenne o daɗan.

¹³ Maayde Laajaru o haalani ɓe. Amma kamɓe kay, ɓe miilataana ko filla ɗoyngol allawol ngool nii o wondi.

¹⁴ Nden Iisa laaɓinani ɓe, wi'i : —Laajaru laatake !

¹⁵ Mi nani belɗum ngam mooɗon ko mi tawaaka toon. Ɗum laatanto on sabaabu goonɗinol. Amma en njaha to makko.

¹⁶ Nden Tomas bi'eteeɗo Funeejo wi'i *aahiiɓe ɓeeto : —Accee, njehen enen duu baa nde en maaydan he makko non.

Iisa woni ummitaaki maayɓe e mbuurnam

¹⁷ Wakkati Iisa yottii, tawi Laajaru waɗi balɗe nay he mooɓeede.

¹⁸ Hakkune Baytaniya e *Ursaliima ɓuraa kilooji tati.

¹⁹ *Yahudankooɓe ɗuɓɓe ngari kinniri Mariyaama e Marta maayde Laajaru.

²⁰ Wakkati Marta nanunoo Iisa no wara, o acci Mariyaama no jooɗii nder suudu, o yehi o jaɓɓitowii mo.

²¹ Marta wi'i Iisa : —Joomam, se nii aɗa wonnoo ɗo, banndam gorko maayataano.

²² Amma miɗo anndi baa joonin, ko ƴamɗaa Alla fuu, o waɗante ɗum.

²³ Nden Iisa wi'i mo : —Bannda gorko no ummitoto.

²⁴ Marta wi'i : —Miɗo anndi ko o ummitittoo nyannde darŋal.

²⁵ Iisa wi'i mo : —Miin woni ummitaaki maayɓe, miin woni mbuurnam duu. Neɗɗo fuu goonɗinɗo kam, baa se maayi, no wuuran.

²⁶ Buurɗo goonɗinɗo kam fuu, maayataa abada. A goonɗini ɗum naa ?

²⁷ Marta wi'i mo : —Ayyo, Joomam ! Mi goonɗini aan woni *Almasiihu, *Ɓii-Alla, bannganɗo duuniyaaru nduu.

²⁸ Gaɗa ko o haali ɗum, o yehi o noddowi sakiike makko, Mariyaama. O nyo'ani mo, o wi'i : —Moodibbo oon warii, omo nodde.

²⁹ Illa ko Mariyaama nanunoo ɗum, o yaawɗi o yehi to Iisa.

³⁰ Wakkati mum fuu Iisa naataay wuro ngoon ginan. Omo wonnoo to Marta fottunoo he makko.

³¹ *Yahudankooɓe wondunooɓe he Mariyaama nder suudu no cawrina mo, wakkati ɓe ngi'unoo o yaawɗi o wurtii, sey ɓe tokki mo, ngam ɓe miilii to annyeere ndeen o fa'i faa o woyowa.

³² Nde Mariyaama yottii to Iisa woni, illa o hi'i mo, o hofi yeeso makko, o wi'i : —Joomam, se nii aɗa wonnoo ɗo, banndam gorko maayataano.

Iisa woyi

³³ Wakkati Iisa hi'unoo Mariyaama e *Yahudankooɓe wondunooɓe he mum ɓeen no mboya, ɓerne makko metti sanne.

³⁴ O wi'i : —Toy mooɓuɗon mo ? Ɓe mbi'i mo : —Moodibbo, war, ƴeewu !

³⁵ Sey Iisa fusi gonɗi.

³⁶ Nden *Yahudankooɓe gom mbi'i : —Ƴeewee no o hiɗiri mo.

³⁷ Amma woɓɓe maɓɓe duu mbi'odiri : —Bumtinɗo bumɗo no waawaa haɗude gorko oo maayde naa ?

Iisa ummintini Laajaru

³⁸ Ɓerne Iisa metti kaden, nden o yehi tiimoyde annyeere ndeen. Annyeere ndeen, lowol maɓɓiraangol hayre non.

³⁹ Nden Iisa wi'i : Ittee hayre ndee ! Marta sakiike maayɗo oon wi'i mo : —Joomam, hannden tawan henndu makko waylake, sabu hannden woni balɗe makko nay he maayde.

⁴⁰ Iisa jaabii mo, wi'i : —Hanaa mi wi'i ma, se a goonɗini, a hi'an baawɗe Alla naa ?

⁴¹ Ɓe itti hayre ndeen. Iisa tiggitii, wi'i : —*Baabiraawo, mi yettii ma ngam a hettinake kam.

⁴² Miin kay, miɗo anndi nyannde fuu aɗa hettinanii kam. Amma mi haaliri nii sabu himɓe dariiɓe ɓee, ngam ɓe ngoonɗina aan lili kam.

⁴³ Gaɗa haalaaji ɗii, o ɓanti daane makko, o huuɓi sanne, o wi'i : —Laajaru, wurta !

⁴⁴ Sey maaynooɗo oon wurtii. Juuɗe mum e koyɗe mum no kaɓɓaa leppi, yeeso mum no suddii. Nden Iisa wi'i ɓe : —Piirtee mo o yaha !

Mawɓe Yahudankooɓe caawodiri dow barol Iisa

⁴⁵ Ɗuɓɓe nder *Yahudankooɓe warnooɓe to Mariyaama, hi'uɓe ko waɗi, ngoonɗini Iisa.

⁴⁶ Amma gere maɓɓe njehi to *Fariisa'en, kaalani ɓe ko Iisa waɗi.

⁴⁷ Nden *Fariisa'en e hooreeɓe *cakkanooɓe Alla ngaɗi hawriine mawne, ɓe mbi'i : —Noy ngatten ? Ngam gorko oo no waɗa kaayɗe ɗuɗɗe.

⁴⁸ Se en accirii mo nii, ɓe fuu, ɓe ngoonɗinan mo. Nden himɓe *Rooma ngara, nannga *Juulirde meeɗen mawne e lenyol meeɗen.

⁴⁹ Gooto maɓɓe bi'eteeɗo Kayafas laatiiɗo mawɗo *cakkanooɓe Alla nder hitaane ndeen, wi'i ɓe : —Onon, on anndaa baafuy.

⁵⁰ On anndaa ko neɗɗo gooto maayana himɓe fuu no ɓuri wooɗande en dina lenyol ngool fuu halka.

⁵¹ Hanaa muuyo makko o haaliri haala kaa, amma annabaaku o waɗi ɗoon. Hitaane ndeen kanko woni mawɗo *cakkanooɓe Alla, nder annabaaku nguu o wi'i ko Iisa no maayanan lenyol ngool.

⁵² Hanaa lenyol ngool tan o maayanta, amma ngam o hawra ɓiɓɓe Alla sankitiiɓe ɓeen fuu laatoo gootum.

⁵³ Illa nyannde mum, hooreeɓe *Yahudankooɓe caawodiri dow no ɓe mbardata mo.

⁵⁴ Ɗum duu waɗi Iisa acci fiilaade hakkune *Yahudankooɓe. Nden o yehi Efrayim, wuro wonngo har ladde yeeruure. O jooddii he *aahiiɓe makko.

⁵⁵ Juulɗe *Yahudankooɓe gom bi'eteeɗe *Juulɗe dimɗinol Isra'ilankooɓe ɓadake. Sey himɓe ɗuɓɓe nder leydi ndiin njehi *Ursaliima faa laaɓina ko'e mum fadde juulɗe ɗee fuɗɗude.

⁵⁶ Ɓe ndarii nder *Juulirde mawne ndeen, iɓe tefa Iisa, ɓe mbi'odiri : —Ɗume miiloton ? O waran to juulɗe ɗee naa noy ?

⁵⁷ Tawi mawɓe *cakkanooɓe Alla e *Fariisa'en kokki tilsinoore wi'ude annduɗo to o woni fuu, haala faa o nanngee.