Matta 3 - Fulfulde Niger West

Waaju Yahaaya

¹ Duuɓi he duuɓi gaɗa mum, Yahaaya gaɗoowo *batisma wanngi nder ladde yeeruure leydi Yahudiya, omo wi'a himɓe :

² —Tuubee, ngam Laamu Alla ɓadake.

³ Kanko woni mo annabi *Esaaya sappinoo, wakkati wi'unoo : —Daane no huuɓa nder ladde yeeruure no wi'a : Ciryanee Joomiraawo laabi ɗi o tokkata, moƴƴinee laabi makko !

⁴ Omo ɓornii koltal canyiraangal leeɓi ngolooba. Omo tunndi tunndorgol nguru. Ɓaɓɓatti he njuumri ngoni nyaamdu makko.

⁵ Himɓe no ƴuwa huɓeere *Ursaliima, he leydi Yahudiya he takkol maayo Urdun fuu, no ngara to makko.

⁶ Iɓe njardoo yeeso Alla e yeeso himɓe fuu dow hakkeeji maɓɓe, Yahaaya no waɗana ɓe *batisma nder maayo Urdun.

⁷ Wakkati o hi'unoo *Fariisa'en he *Sadduki'en heewɓe no ngara faa ngaɗanee *batisma, o wi'i ɓe : —Ɓiɓɓe bolle ! Moy wi'ii ndogganon tikkere Alla waroore ?

⁸ Ngaɗee ko hollata on tuubii.

⁹ Nde on mbi'i nder ɓerɗe mooɗon on jippotooɓe he *Ibrahim, miin mi wi'an on : Alla no waawi waylii kaaƴe ɗee, ɗe laatoo taaniraaɓe *Ibrahim.

¹⁰ Joonin, jammbere aagaama ngam soppude ɗaɗi leɗɗe. Ndenne, lekki fuu ki rimataa ɓiɓɓe lobbe, no soppetee, faɗɗee nder hiite.

¹¹ Miin, ndiyam ngaɗirananmi on *batisma ngam hollude ko on tuubii. Amma garoowo gaɗa am oon, no ɓuri kam baawɗe. Mi fotaay baa ɓortude paɗe makko. Kanko, *Ruuhu Ceniiɗo e hiite o waɗiranta on *batisma.

¹² Omo jogii ƴarorde makko ngam ƴaraade alkamaari makko faa laaɓa. O hawra gabbe makko, o loowa nder ƴeelu. Nden o wula nyaane ndeen nder hiite nge nyifataa abada.

Batisma Iisa

¹³ Nder wakkati mum, Iisa wari ƴuwi Galili, o wari dow maayo Urdun to Yahaaya, ngam o waɗanee *batisma.

¹⁴ Amma Yahaaya hosi salaade, nden wi'i mo : —Aan haani waɗande kam *batisma. Amma noy ngarirtaa to am, miin, faa mi waɗane *batisma ?

¹⁵ Iisa jaabii mo, wi'i : —Accu ɗum laatoroo non joonin, ngam non kaanuɗen humnirde ko dartii fuu. Nden, Yahaaya jaɓi

¹⁶ waɗani Iisa *batisma. Wakkati Iisa ummii dari nder ndiyam ɗam, kammu omti. O hi'i *Ruuhu Alla no jippoo nder nanndi wuugaanu, no wara dow makko.

¹⁷ Wakkati mum da, daane gom ƴuwi dow, wi'i : —Oo woni Ɓiyam korsuɗo, mo nananmi belɗum mum.