Matta 17 - Fulfulde Niger West

Mbaylitaaki tagaadi Iisa

¹ Balɗe jeegom gaɗa tabbintinol ngol Piyer waɗi, Iisa nyakkodi Piyer, Yakuuba he dimdaaɗo mum Yahaaya dow waamnde toowne gom.

² Tagaadi makko waylitii yeeso maɓɓe. Yeeso makko no yayna hano naange, kolte makko duu no ƴelkita hano jeyngol.

³ Wakkati mum da *aahiiɓe tato ɓeen ngi'i *Muusa he Eliya mbanngii, iɓe kaalda he makko.

⁴ Sey Piyer wi'i Iisa : —Joomam, no wooɗi ko tawaaɗen ɗo. Nde nii aɗa hiɗi, mi nyiɓan hukumuuji tati ɗo : Aan worru, *Muusa worru, Eliya worru.

⁵ Wakkati o haalannoo ndeen sey luuldere ƴelkitoore gom wari suddi ɓe. Daane gom ƴuwi nder luuldere ndeen, wi'i : —Oo woni Ɓiyam mo korsinmi, mo mbelniranmi. Kettinanee mo !

⁶ Wakkati *aahiiɓe ɓeen nanunoo daane ndeen, kippi he leydi. Ɓe kuli sanne.

⁷ Iisa ɓattii ɓe, meemi ɓe, wi'i : —Ummee ! To kulee !

⁸ Sey ɓe ɓanti ko'e maɓɓe, ɓe ngi'aay neɗɗo fuu, se hanaa Iisa.

⁹ Wakkati ɓe njippotonoo waamnde ndeen, Iisa fooɗi noppi maɓɓe, wi'i : —To kaalanee neɗɗo fuu ko ngi'uɗon ɗum, sey wakkati *Ɓii-Neɗɗo ummitii e maayde.

¹⁰ Nden *aahiiɓe ɓeen ƴami mo, mbi'i : —Ɗume waɗi ko jannginooɓe *Tawreeta no mbi'a no tilsi Eliya arta *Almasiihu warde ?

¹¹ O jaabii ɓe, o wi'i : —Goonga non, Eliya artata wara, moƴƴina kujje fuu.

¹² Amma miɗo wi'a on : Eliya warii faa yawti, ɓe annditaay mo, ɓe ndaaraay mo goɗɗum. Hano non duu ɓe ndaarataa *Ɓii-Neɗɗo goɗɗum, ɓe torra mo.

¹³ Nden *aahiiɓe ɓeen paamii ko filla Yahaaya gaɗoowo *batisma o waɗani ɓe.

Nyawtol suka gom jom paɗɗe

¹⁴ Wakkati Iisa he *aahiiɓe mum ngartunoo to jama'aare ndeen, gorko gom ɓadii mo, hofi yeeso makko,

¹⁵ wi'i : —Moodibbo, yurma ɓiyam gorko oo ! Paɗɗe o woodi, ɗum tampinii mo sanne. Kile keewɗe omo saama nder hiite naa nder ndiyam.

¹⁶ Mi yaarii mo to *aahiiɓe maaɗa amma ɓe keppi nyawtude mo.

¹⁷ Sey Iisa jaabii mo, wi'i : —Hey onon himɓe jamaanu bonɗo, ɓe ngoonɗinaay ! Faa nde ngondanmi he mooɗon ? Faa nde tinnotoomi miɗo munyana on ? Ngaddanee kam suka oon ɗo !

¹⁸ O sajiti ginnaaru nduun. Ndu takkiti suka oon. Wakkati mum da suka oon nyawti.

¹⁹ Wakkati Iisa wonnoo feere mum, *aahiiɓe ɓeen ɓadii mo, ƴami, mbi'i : —Ɗume waɗi ko minen, min keppi riiwude ginnaaru nduun ?

²⁰ Iisa jaabii ɓe, wi'i : —Ngam oɗon pamɗi goonɗinol. Goonga kaalananmi on : Nde goonɗinol mooɗon no famɗi faa foti gabbel mutaari, nde nii on mbi'i waamnde ndee : « Sottu ɗo, njahaa to », nde sottan. Huune fuu hepportaa on. [

²¹ Amma iri ginnaaru nduu riiwataako nde hanaa du'aa'u he suumayeere non.]

Iisa sappake maayde he ummitaaki mum kaden

²² Nyannde gom, wakkati Iisa he *aahiiɓe mum pottunoo nder leydi Galili, o wi'i ɓe kaden : —*Ɓii-Neɗɗo no jammbetee, wattee nder juuɗe.

²³ O waree, balɗe tati gaɗa mum, o ummitoo. Haala kaa metti ɓerɗe *aahiiɓe ɓeen sanne.

Janngal Juulirde mawne

²⁴ Wakkati Iisa he *aahiiɓe mum njottinoo Kafarnahum, *jaɓooɓe janngal *Juulirde mawne gom ngari to Piyer, mbi'i mo : —Moodibbo mooɗon no yoɓa janngal *Juulirde mawne naa ?

²⁵ Piyer jaabii ɓe, wi'i : —Omo yoɓa. Wakkati Piyer naatannoo nder Juulirde ndeen, fadde makko yeccaade, sey Iisa wi'i mo : —Simon, ɗume miiliɗaa ? Moy haani yoɓande laamiiɓe duuniyaaru janngal ? Ɓiɓɓe leydi naa hoɓɓe ?

²⁶ Nden Piyer jaabii mo, wi'i : —Hoɓɓe. Sey Iisa wi'i mo : —Ndenne, ɓiɓɓe leydi kaanaa yoɓude naa ?

²⁷ Amma, en ngiɗaa mettinde ɓerɗe himɓe ɓee. Yah toon dow peta, paɗɗaa mamaruwol maa. Linngu ngu artuɗaa nanngude nguun, omtu hunnduko maggu. A tawan tammal cardi, joɓoowal janngal meeɗen. Ittaa ngal, njoɓana en, miin he maa.