Yuda 1 - UPANGANO UPYA

¹ Yuda umuofi wi Yesu Klisto, unnina wi Yakobo, kuli yano yisilwe, yano yakundikwa muli Leesa Tata nu kusungwa kuli Yesu Klisto:

² Ukukumbukilwa nutekano nu lukundo vyungiliizwe kuno muli.

Yakasambilisha aya ufi

³ Yakundikwa, pano nachisile unte ukumwandikila amaswi ya ufyusi nao uwitu swensi, nawine fino chindungime ukumwandikila nu kumusunda, ukuti mulwile usumilo uno yapilwe aswefiwa iila lyonga mpela.

⁴ Kuno kuli antu yano ingila nanti kumanyika, antu yano fuma kali yaandikilwa uputushi u uwa milandu yao, atakati, yano yaluseleula inkumbu shi Leesa witu siwe unyamfi, nga yalumkana uMwisikulu wenga, Mwene witu, Yesu, Klisto.

⁵ Na kaili ndusita ukumwisukishananti fino mumanyile ifintu fi fyonsifino uMwene lino walangi wakulula antu un-nsi ya Misili, ichisila wumosile yano yatasumile.

⁶ Nayamalaika yano yataukosile akola, leelo yasya amikalo yao yano yayasipile, wayanyepa uku ng'anda-ya-minyololo manda ti uku chanda, ukulolela uwanda wa kuputula imilandu yao apa wanda ukulu.

⁷ Ndi fino Sodoma ni Gomola ni misi ino yali umbali mbali, yano yalondile ifya upundu ichili chonga na yao, nu kulondela ifya mwili fino fitaile, chawikwa ukuwa ichilangilisho, cha kuchula um-moto wa manda ti.

⁸ Ichilichonga nayo kwene un-kulota kwao yaluufisha myili, yalukana ukuiaswa, nu kunyata ukulu.

⁹ Leelo Mikaeli, malaika unkulu, pano walwilile nu kufwangila umwili wi Mose, atesishe ukumfwangila Chiwa uputusi wa kumsoweka, leelo waatile: “uMwene akuchesele!”

¹⁰ Leelo antu ya yakulunyata ifintu fino yatamanyile, ni ifintu fino yamanyile uku kafumo, yawonona kuli fyenefyo, wa finyama fino fitakwite amano.

¹¹ Akalanda kao, kuno yalondile isila yi Kaini, yaponela um-masosho ya malipilo yi Balaamu nu kulowa un-kutanduka kwi Kola.

¹² Antu ya yali mala maipe um-fimulo fino ifya lukundo, pano yalulya ponga nemwe, angi yalulya nanti nchisi yali wa amapufi yano yasi na masi, nayo yalusendwa nusa; yali wa fiti fino fitakuseka pa makati yaakwe; fino fyafwilikanya nu kukumpulwa.

¹³ Yali wa mawimbi makomu aya muli yemba, yano yalufumya ifintu vyao ivya nsoni, wi tomvu; yali wa ntanda zino zilulowa; yano uluku wa chanda uli uno yawikilwa manda ti na ti.

¹⁴ Ifintu vi walawisha Enoki, wino wali untu wa saba ukufuma Adamu, ati; ‘Lolini, uMwene alwisa ponga naswepe yaakwe amaelfu na maelfu.

¹⁵ Ukuti aputule imilandu ya antu yoshi, nu kuyalambwila yoshi yano yatachindike Leesa, uku milimo yao yoshi ino itaile, ino yachisile nanti kopa Leesa, nu ku maswi matale yoshi, yano ayamaifyo yano yatachindike Leesa, yafwanga kunali.

¹⁶ Antu ya yakung'wang'wintika nu kulalama, yalupita un-tama shao, ni milomo yao ilufwanga amaswi matale aya chilumba; yakuluwila aku yikolo, kuti yapiwe chimwi.

Kusokesha nu kusunda

¹⁷ Leelo mwemwi yakundikwa, mutalatila amaswi yano yafwasilwe kali ni mitume ya Mwene witu Yesu Klisto.

¹⁸ Fino yamunenile, ukuti: “Amanda ya chisila yaluwako antu ya misowe, yano yalondile itama shao akola isha kulofya.”

¹⁹ Antu yao ayano yaluleta ukutana, antu ya kuno ukusi sile, yatakwite Mweso.

²⁰ Leelo mwemwi yakundikwa, muukule apa usumilo wino uno waswepesha, nu kupepa muli Mweso Nswefu,

²¹ muukole undukundo lwi Leesa, na kuno angi mululolela ukukumbukilwa nu Mwene witu Yesu Klisto, amupe upuma wa manda ti.

²² Mulolele inkumbu yamwi yano yalutentenganya.

²³ Na yamwi muyafyushe uku kuyasompola um-moto, na yamwi muyalolele inkumbu uku chopo, mutuwe ni myenda kwene, ino yafita nikwi lya myili yao.

Amaswi ya kumalila

²⁴ Leelo wene, wino angamusunga mutakumika nu kumwimika apa ukulu waakwe nanti ndema un-kuchimba nkani,

²⁵ ali Leesa wenga, Katula witu kuli Yesu Klisto, Mwene witu, ali nutensho nukulu, nulâsi na maka, fuma kali na kasalaka na manda ti na ti. Chiwe fiyo kwene!