Yoane 9 - UPANGANO UPYA

Yesu waposha wino wafilwe umpofu

¹ Na pano wapitanga, alola untu, umpofu fuma ukufyalwa.

² Alondeshi yaakwe yantondosha, yaati: “Labi, uwini wachisile iifyo, chaleka wafyalwa umpofu, untu wi nanti afyashi yaakwe?”

³ Yesu afwanga, ati: “Alawi atachisile iifyo, nanti afyashi yaakwe, leelo kuti imilimo yi Leesa iloleke munali.

⁴ Tuletuombe imilimo yaakwe wino wantumile pano uchili unsanya; usiku ulwisa uno ntu atangi aombe chimwi.

⁵ Amanda yano ndipo kuno ukunsi, nene mwengelela wa ya kunzi.”

⁶ Pano wafwanga fiyo, waswila amati apansi, wasuwa intope sha mati yao, wampaka umpofu um-manso.

⁷ Wannena, waati: “Yanga ukafulale un-chifula cha Siloamu, (alikuti: wino atumilwe)” Nga wapita waya wafulala, wawela alulola.

⁸ Nga aya mwipamba na yano yamwine kali fino wali uwakulomba-lomba, yaati: “Chene! wi asi wino wikalanga nu kulomba-lomba?”

⁹ Yamwi yaati: “Aliwe.” Yamwi yaati: “Asi we, leelo akoline nawe.” Unkola kwene waatile: “Ali nene!”

¹⁰ Nga yannena, yaati: “Amanso yako yawine uli?”

¹¹ Unkola waati: “Untu wiwi wino yaluti i Yesu, wasuwile intope, wanpaka amaso, wanena, waati: ‘Yanga uku Siloamu, ukafulale.’ Nga naya, nafulala, mbwine ndulola.”

¹² Yanena, yaati: “Alikwi wiyo kwene?” Nawe waati: “Nemwi ntamanile.”

¹³ Nga yatwala uku aFaliseo, wiyo wino wali umpofu kali.

¹⁴ Nao wali uwanda wa Sabato, pano Yesu wasuwile intope nu kunjula amanso.

¹⁵ aFaliseo nayo yantondosha kaili fino watalike ukulola. Wayanena, waati: “Wanpakile intipa um-maso, nene nafulala, nali kwene ndulola.”

¹⁶ Nga yamwi apa aFaliseo yaati: “Untu wi atafumile kuli Leesa; kuno atalondile uwanda wa Sabato.” Yamwi yaati: “Untu wa maifyo angachita uli ifipesha-mano ndi fi?” Kwawa ukupalunkana apa yakola.

¹⁷ Nga yanena umpofu wiyo ilya uwili, yaati: “Nga wemwi ulutuli uku ntu wiyo, fino wakuyulila amaso?” Walanda, waati: “Ilau.”

¹⁸ Nga aYudea yatachili yasumile amaswi yaakwe, ukuti wali umpofu, nga wapiwa ukulola, kufika lino yita afyasi yaakwe untu wiyo wino wapiwa ukulola.

¹⁹ Yayatondosha, yaati: “Alawi umwanino, wino muluti wafilwe umpofu? Nga wali watampa ukulola uli li kwene?”

²⁰ Afyasi yaakwe yayanena, yaati: “Tumanyile fino alawi ali mwanitu, na kaili wafilwe umpofu.

²¹ Leelo fino alulola kasalaka, tutamanile, untu umpuma, angamulandila unkola.”

²² Afyasi yaakwe yafwasile fiyo, kuno yofile aYudea, kuno aYudea yalile yasumilishana ukuti: ngu untu umwi wasumila fino i Klisto, awingwe un-ng'anda iyi Leesa.

²³ Ichaleka afyasi yaakwe yaati: “Untu mpuma, mtondosini unkola.”

²⁴ Nga yamwita kaili untu wiyo wino wali umpofu, yannena, yaati: “Pa Leesa utesho. Swemwi tumanile fino untu wi uwa maifyo.”

²⁵ Nga untu wiyo waati: “Ngu wa maifyo wiyo nemwi ntamanile. Manile ichintu chonga fino nali mpofu na kasalaka ndulola.”

²⁶ Nga yannena, yaati: “Wakuchitile chani? Wakuyulile amaso yako uli?”

²⁷ Wayanena, waati: “Inti munena, leelo mutalupulika, kuno ichani mulusita ukupulika kaili? Nemwe kwene mulusita ukuwa yalondeshi yaakwe?”

²⁸ Nga yantuka, yalanda ukuti: “Wewe uli nndondeshi waakwe wiyo, swemwi swe yalondeshi yi Mose.

²⁹ Swemwi tumanyile fino Leesa wafwanga na Mose, leelo wiyo tutamanile kuno afumile.”

³⁰ Untu wiyo wayanena, waati: “Alachi icha kusunguka, ukuti umwemwe mutamanile kuno afumile, nawe wanjusile amaso.

³¹ Tumanile fino Leesa atakupulika aya amaifyo, leelo untu wino akupepa Leesa ningo nu kuchita fino akasime, wiyo akulupulikwa.

³² Ukufuma kali chitachili chipulikwe fino umwi wayula amaso ya mpofu, wino wafilwe fiyo kwene.

³³ Ngi wiyo atafumile kuli Leesa, atali aweshe ukuchita chimwi.”

³⁴ Yannena, yaati: “Ala! Wewe wavilwe um-maifyo matupu, newe ungatusambilisha sweswe?” Yamfumya apansi.

³⁵ Nga Yesu apita fino iyamfumya apansi, nawe pano wannola, wannenile, waati: “Uwewe usumile uMwana wi Leesa?”

³⁶ Nawe walanda ukuti: “Uwini Mwene, kuti insumile?”

³⁷ Yesu wannena, waati: “Ukunnola, na wino alufwanga newe, uliwe.”

³⁸ Nga walanda ukuti: “Nasumila, Mwene.” Wansukanila.

³⁹ Nga Yesu wafwanga ukuti: “Inene ngisile ukunsi ku uputusi wa milandu, ukuti yano yatalulola yannola, na yano yalulola, yawe apofu.”

⁴⁰ Apa aFaliseo yamwi yano yalipo ponga nawe yapulika ifintu fiyo, yannena, yaati: “Chene! neswe kwene swe yapofu?”

⁴¹ Yesu wayanena, waati: “Ngangi mwe yapofu, ngangi mutakwite amaifyo, leelo fino muluti: ‘Tululola,’ ichino amaifyo yino yalipo.