Yoane 8 - UPANGANO UPYA

Mwanachi walemulwa

¹ Yapisile chila untu uku ng'anda ukwakwe; Yesu nawe wapita uku mwamba wa Mizeituni.

² Nu ntondo pano kwacha awingila kaili un-ng'anda-nkulu-iyi-Leesa, na antu yoshi yaya kunali, nawe awikala angi aluyasambilisha.

³ Yakaandika na aFaliseo yannetela umwanachi wino watalemulwa uku upundu, yamwika apakasi.

⁴ Yannena, yaati: “Kasambilisha, umwanachi wi walemulwa pano walaluchita upundu.

⁵ Nga un-Ntambi, Mose watunenile ukuyatama na mafinga anachi ya fi; wemwi watuli?”

⁶ Nayo yafwasile fiyo ukumwesha, kuti yapate apa kunnemela. Leelo Yesu awinama, awaandika nimwe waakwe apasi.

⁷ Nayo pano yantondosha nkani, wakatuka, wayanena, waati: “Pali mwemwe, wino asi na maifyo, atangule ukumtama nifinga.”

⁸ Awinama kaili, awaandika nunwe waakwe apasi.

⁹ Nayo pano yapulika, yatampa ukufuma wenga wenga, yatangwila uku yikolo, kufika nu wa chisila chao; washala Yesu wenga nu mwanachi wilye awimilile apakasi.

¹⁰ Nga Yesu awinuluka, wanena umwanachi, waati: “Yalikwi yano yakutakilile? Kusi wino ayangwile fino ukonona?”

¹¹ Wannena, waati: “Kusi, Mwene.” Yesu wannena, waati: “Nene kwene nsuputula. Pitanga, leelo utache uchite iifyo kaili.”]

Mwengelela wa nsi

¹² Nga Yesu wayanena kaili, waati; “Nene ndi mwengelela wa ya kusi; wino andondile, ataluya un-chanda nanti uche, leelo aluwa nu mwengelela wa upuma.”

¹³ Nga aFaliseo yannena, yaati: “Uwewe uluwimikila wenkola, ushuta wako usi weneo.”

¹⁴ Yesu wayanena, waati: “Nemwi nanti nduwimikila nenkola, ushuta wane uli wampomfu, kuno manyile kuno nafumile na kuno njile; leelo mwemwi mutamanile kuno nafumile nanti kuno njile.

¹⁵ Mwemwi muluputula ukulondela ifintu fya mwili, nemwi ntaluputwila untu unnandu.

¹⁶ Leelo nanti naputwila untu unnandu, uputusi wane uwa mpomfu, kuno nemwi insi nenga, leelo inene na wino wantumile.

¹⁷ Na kaili uku Ntambi yino chaandikwe fino ushuta wa yantu yaili uwampomfu.

¹⁸ Nemwi nduwimikila nenkola, nawe Tata wino wantumile alungimikila.”

¹⁹ Nga yannena, yaati: “So alikwi?” Yesu wayanena, waati: “Inene mutamanile, nanti Tata kwene mutammanile; ngangi mumanile nene, ngangi mummanyile na Tata kwene.”

²⁰ Amaswi yao wayatasile pano wasambilishanga un-ng'anda-nkulu-iyi-Leesa, uku wisho wa mpia; leelo kutali untu wa kunnema, kuno amanda yaakwe yalile yachili yafike.

Kuno njile mutangi mukwise

²¹ Nga wayanena kaili, waati: “Nemwi napita, nemwe mulunsita, nemwe mulufwa um-maifyo yino. Inene kuno njile umwemwe mutangi mukwise.”

²² Nga aYudea yaati: “Chene! wambomola kuno aluti: inene kuno njile mutangi mukwise?”

²³ Wayanena, waati: “Umwemwe, mwe ya pansi, nemwi ne wa mwiyulu; mwemwi mwe ya kimo ukunsi, nemwi asi ne wa kuno ukunsi.

²⁴ Chaleka, namunena, nati: Mulufwa um-maifyo yino; kuno ndi mutasumile fino nene ndi wenewe, mulufwa um-maifyo yino.”

²⁵ Nga yannena, yaati: “Ifyo we weni?” Yesu wayanena, wati: “Ndi kuti iswi kwene liyo lino ndumunena.

²⁶ Indi ni ifintu tupu ifya kulanda nu kuputula kuli mwemwe, leelo wino wantumile uwa chumi; nene yano napulika uku nkola, ayano ndulanda kuno ukunsi.”

²⁷ Leelo yatamanyile fino aluyatakila Tata.

²⁸ Nga Yesu wayanena, waati: “Pano mwacha mwakatusha uMwana-ntu, apano mulumanya fino nene ndi wenewe, nukuti ntaluomba chimwi, apa lwane nenkola, leelo ndi fino Tata wandangilile ifino ndufwanga.

²⁹ Nawe wino wantumile ali ponga nene; atantile nenga, kuno nduchita manda yoshi fino fimsipile.”

Chumi chamupa ukauwele

³⁰ Nawe pano wafwanga fiyo, ainji yamsumila.

³¹ Nga Yesu wanena aYudea yalye yano yamsumila, waati: “Umwemwe ngi mwikala umwiswi lyane, muluwa yalondeshi yane aya kapanga.

³² Kaili mulumanya ifya chumi, ni chumi chilumutisha um-usha.”

³³ Yannena, yaati: “Sweswe yana yi Ablahamu, tutachili tuwe yasha yantu nanti limwi. Newe ulutuli, ukuti: Muluwa yakauwele?”

³⁴ Yesu wayanena, waati: “Umwenemo, umwenemo, ndumunena: untu wino aluchita amaifyo, uusha wa maifyo.

³⁵ Kuno uusha atakwikala un-ng'anda manda yoshi; umwana akulwikala manda yoshi.

³⁶ Ichino Mwana ndi wankulula, mwamwa yakauwele ya ningo.

³⁷ “Manyile fino mwemwe luko lwi Ablahamu, leelo mulusita ukungumola, kuno iswi lyane lisimo muli mwemwe.

³⁸ Fino nawine kuli Tata ifino ndulanda; nemwe kwene ndi fino mwapulike kuli yaso ino, ifino muluchita.”

³⁹ Yannena, yaati: “Tata witu ali Ablahamu.” Yesu wayanena, waati: “Nga ngi mwe yana yi Ablahamu, ngangi muluomba imilimo yi Ablahamu.

⁴⁰ Leelo kaili mulusita ukungumola nene, ne ntu ntimunena ilya chumi, lino napulika kuli Leesa. Ablahamu atachisile fiyo.

⁴¹ Mwemwe muluomba imilimo yiso wino.” Yannenile, yaati: “Swemwi tutafilwe uku upundu, swemwi tuli na Tata wenga, nawi Leesa.”

⁴² Yesu wayanena, waati: “Ndi Leesa wangawe iso wino, ngali munkasime nene, kuno nafumile kuli Leesa, nisa kuno; leelo ntisile uku lwane, leelo unkola uwino wantumile.

⁴³ Kuno ichani mutalumanya chino ndufwanga? Ukuno mwemwi mutangi mulipulike iswi lyane.

⁴⁴ Mwemwe yana yi Shetani, ni tama yi so wino isino mwakasama ukuchita. Wino wali umumosi fuma intangulo, atimilile icha chumi, kuno musi chumi um-nkola. Pano alufwanga intumpu, akuluufwangila apa lwakwe, kuno wene uwa ufi, ali isi wa ufi.

⁴⁵ Nene, kuno ndulanda ilya chumi, mutansumila.

⁴⁶ Uwini pali mwemwe wino angangimikila ukuti indi ni ifyo? Nene ngi nalanda icha chumi, nga fino mutalunsumila?

⁴⁷ Uwi Leesa, akulupulika amaswi yi Leesa.”

⁴⁸ aYudea yannena, yaati: “Chene! usweswe tutafwanzile ningo fino twati: we unSamalia, newe uli ni chiwa?”

⁴⁹ Yesu afwanga, ati: “Inene ntakwite ichiwa, leelo nemwi namchindika Tata, nemwe mulungononela unchishi wane.

⁵⁰ Leelo nemwi ntalusita ukulu wane; aliko wino alusita nu kuputula imilandu.

⁵¹ Umwenemo, umwenemo, ndumunena: untu ndi walema iswi lyane, atalulola ifwa manda ti.”

⁵² Nga aYudea yannena, yaati: “Fwandi, nga twamanya fino uli ni chiwa; Ablahamu wafwa na malau yafwa; newe uluti: untu ndi walema iswi lyane, atalulola ifwa nanti uche.

⁵³ We wikolo ukuluta tata witu Ablahamu, wino wafwa? Na malau kwene yafwa. Uluuchita we weni?”

⁵⁴ Yesu wafwanga, waati: “Ngi naikusha nenkola, ukulu wane chisi chimwi; wino alunkusha i Tata, wino mwemwe muluti: i Leesa witu.

⁵⁵ Leelo mwemwi mutammanile, leelo nemwi immanile; ngi nalanda ukuti: “Ntammanile, namwa wa ntumpu wi mwemwe; leelo mmanile niswi lyaakwe ndilemile.

⁵⁶ Ablahamu, so wino, wachimfile kuno alulola uwanda wane, nawe waulola, wachimba.”

⁵⁷ Nga aYudea yannena, yaati: “Uwewe uchili uwe ni myaka amakumi yasano, newe walola Ablaamu?”

⁵⁸ Yesu wayanena, waati: “Umwenemo, umwenemo, ndumunena: Ablahamu wiyo achili aloleke, nemwi angi ndiko.”

⁵⁹ Nga yasola amafinga kuti yantame, leelo Yesu afisama, nga afuma un-ng'anda-nkulu-iyi-Leesa.