Yoane 7 - UPANGANO UPYA

Anina yi Yesu yatansumile

¹ Ni chisila cha ifintu fiyo Yesu wapitananga um-Galilea; kuno atakasime ukupitana um-Yudea, kuno aYudea yasitanga ukumumola.

² Nu wanda ukulu uwa aYudea uwa Fisansa walile uwupalamila.

³ Nga anina yaakwe yannena, yaati: “Tina pa, uye uku Yudea, kuti alondeshi yako nayo yakalole imilimo yako yino uluomba.

⁴ Kuno kusi untu wino akuchita chimwi ukumbali nawe unkola alusita ukumanyika. Ngi wachita ifintu vi, apano uwumanyisye uku yakunsi.”

⁵ Kuno nanti anina kwene yatamsumile.

⁶ Nga Yesu wayanena, waati: “Amanda yane yachili yise, leelo mwemwe amanda yoshi ayino.

⁷ Ukunsi kutangi kumutuwe, leelo kuluntuwa nene, kuno ndukulanda fino imilimo yaakwe imiipe.

⁸ Mwemwe yangini uku yulya ifimulo; nemwi ntaile, nchili ukuyulya ifimulo fi, kuno amanda yane yachili.”

⁹ Nawe pano wayanena ifintu fi, asyala teshi uku Galilea.

Yesu apa wanda ukulu

¹⁰ Leelo pano anina yaakwe yapita ukuya uku wanda ukulu, apano nawe kwene wapisile ukuya, apasi patiswe leelo kanti ukumfisa.

¹¹ Chaleka aYudea yamsita apa fimulo, yaati: “Alikwi wilye?”

¹² Kwawa amanwinwintiko tupu umwiumba kuli wenewe. Yamwi yaati: “Untu wafipa.” Na yamwi yaati: “Awe, alusosha maumba.”

¹³ Leelo kutali untu wino wantasile apatiswe, kuno yofile aYudea.

¹⁴ Nga chali apakasi ya fimulo Yesu wapisile aya awingila un-ng'anda-nkulu-iyi-Leesa, asambilisha.

¹⁵ Chaleka aYudea yasunguka, yaati: “Alawi wamanya uli amaandiko nawe atasambilile?”

¹⁶ Ichaleka Yesu wayanena, waati: “Amasambilisho yane asi yane nene, leelo ayi wino wantumile.

¹⁷ Untu ndakasime ukuchita fino akasime, alumanya ifya masambilisho yao, ndi yafumile kuli Leesa, nanti ndi ndufwanga ifya ku mweso wane sile.

¹⁸ Wino akuluufwangila wenga apa lwakwe sile, akulusita ukulu waakwe unkola, leelo wino akulusita ukulu wi wino wantumile, wiyo uli wa ningo, asi nuipe umwi munali.

¹⁹ Chene! Mose atamupile iNtambi? Leelo pali mwemwe pasi wino alemile iNtambi. Nga fino mulusita ukungumola?”

²⁰ Iumba lyaati: “Ala! Uli ni chiwa! Uwini weni alusita ukukumola?”

²¹ Yesu wayanena, waati: “Inene naofile unnimo wonga, nemwe mwasunguka mwemwe mwensi.

²² Mose wamupile kuchita ichibalu. Leelo asi kuti chafumile kuli Mose, leelo kuli yatata-kulu. Nemwe uwanda wa Sabato mukuchita untu ichibalu.

²³ Ali nguntu akulusumila ukuchita untu ichibalu uwanda wa Sabato, kuti iNtambi yi Mose itononeka, uku chani mulundakalikila nene, kimo naposishe untu wawa umpuma ningo uwanda wa Sabato?

²⁴ Ichino mutachiputula uputusi wa pa maaso sile, leelo muputule uputusi wa ningo.”

Klisto uli wi?

²⁵ Apa yantu yam-Yelusalemu, yamwi yaati: “Chene! wi asi wino yalusitanga kuti yamumole?

²⁶ Nga fwandi, lolini, alufwanga na patiswe, leelo yatamfwasya chimwi. Palumwi ayikolo itu yamanile ningo fino wi i Klisto?

²⁷ Leelo wi, tummanile kuno afumile, leelo Klisto, pano wacha wisa, kusi wino alumanya kuno afumile.”

²⁸ Chaleka Yesu wafumya niswi nkani un-ng'anda-nkulu-iyi-Leesa, asambilisha nu kulanda fi: “Inene mmanile, na kuno nfumile mukumanile. Leelo ntisile uku kukunda kwane, leelo wino wantumile, uwa Chumi, wino mutammanyile mwemwe.

²⁹ Nemwi mmanyile, kuno nafumile ukwakwe, nawe uwino wantumile.”

³⁰ Nga yasita kuti yanneme, leelo kusi wino wakatwishe ikasa lyaakwe, kuti anneme, kuno amanda yaakwe yalile yachili yafike.

³¹ Na antu ainji umwiumba yamsumila, yalanda, yaati: “Pano wacha wisa Klisto, Chene! aluchita ifipesha-mano tupu ukuluta fi fino wi aluchita?”

Asalifi yatumwa yakaleme Yesu

³² aFaliseo yapulika iumba lilunwinwintika fiyo kuli wenewe, nga ayikolo iyakapela na aFaliseo yatuma aofi kuti yanneme.

³³ Nga Yesu wafwanga, waati: “Yashala manda mache angi ndi ponga nemwe, apano mpite kuli wino wantumile.

³⁴ Mulunsita, leelo mutalundola, nene kuno ndwikala, mwemwi mutangimwise.”

³⁵ Ichaleka aYudea yapwepwesana, yaati: “Alawi wanja kwi? Kuno neswe tutangi tunnole? Chene! wampita kuno aGliki yasambalila, nu kuyasambilisha aGliki?

³⁶ Iswi uli liyo lino wafwanga, ukuti: ‘Mulunsita, leelo mutalundola; nene kuno ndwikala mutangi mukwise mwemwi?’ ”

Manzi ya upuma

³⁷ Nu wanda wa chisila, uwanda ukulu uwa fimulo, Yesu awimilila, afumya iswi, wati: “Untu ndi walola unsala, awise kunondi, anwe.

³⁸ Wino ansumile ndi fino aMaandiko yafwasile, ingusi sya mansi ya upuma silufuma munali.”

³⁹ Ni iswi liyo walilandile uku Mweso Nswefu, wino yano yanzumile yalumpokelela uku chisila; kuno uMweso Nswefu walile uchili aise; kuno Yesu walile achili apiwe ukulu.

⁴⁰ Nga yamwi umwiumba pano yapulika amaswi yao, yalanda ukuti: “Umwenemo, alawi ali ilau lili.”

⁴¹ Yamwi yaatile: “Alawi ali Klisto.” Yamwi yaati: “Chene! Klisto angafuma uku Galilea?

⁴² Ilyandiko litafyasile fino Klisto alufuma unduko lwi Daudi, nu kufuma uku Betleemu, unsi ulye uno Daudi watesi?”

⁴³ Chaleka iumba lyapalunkana uku nndandu wakwe.

⁴⁴ Yamwi pali yeneyo yasita ukunnema, leelo kusi untu umwi wino wakatwisha amakasa yaakwe kuti anneme.

Nikodemo wafwangila Yesu

⁴⁵ Nga atumilwe yaya, yawela ku ayikolo iyakapela na aFaliseo. Nayo yayanena, yaati: “Uku chani mutannesile?”

⁴⁶ Yaya atumilwe yalanda, yaati: “Kusi untu wino watana wafwanga ndi wiwi nanti uche.”

⁴⁷ Nga aFaliseo yayanena, yaati: “Chene! nemwe kwene mwapululwa?

⁴⁸ Uwini apa yikolo wino ansumile nanti uku aFaliseo?

⁴⁹ Leelo amaumba yi yano yatamanile iNtambi, yaatipwa.”

⁵⁰ Nikodemo wino waile inkolelo kunali, wino wali ponga nayo, wayanena, waati:

⁵¹ “Chene! iNtambi yitu ikulumputwila untu unnandu inkolelo, angi muchili mumpulikishe nu kumanya fino wachisile?”

⁵² Yannena, yati: “Siko newe kwene ufumile uku Galilea?

⁵³ Sita ulole ndi ukufuma uku Galilea kulufuma ilau.”