Yoane 6 - UPANGANO UPYA

Yesu wapa antu ielfu zisano vyakulya

¹ Ichisila cha ifintu fiyo Yesu apita ukuya umbalama yi yemba wi Galilea, nawe uli wa Tibelia.

² Ni umba ikulu linndondela, kuno lyawine ifipesha-mano fino wachitile alwale.

³ Nga Yesu akwela uku mwamba, wikala kuo ponga na alondeshi yaakwe.

⁴ Ni Pasaka, uwanda ukulu uwa aYudea walile uwupapamila.

⁵ Nga pano Yesu wakatusya amanso, alola iumba ikulu lilwisa kunali; wanena Filipo, waati: “Tungakala imikate kwi, ukuti antu ya yalye?”

⁶ Wafwansile fiyo uku kumwesha, kuno wamanyile unkola chino akuchita.

⁷ Filipo wannena, waati: “Imikate ya mpia sha dinali imyanda yili yachepa, nanti chila wenga angapiwa kache sile.

⁸ Apa yalondeshi yaakwe wenga i Andelea, unnina wi Simoni Petlo, wannena, waati:

⁹ “Alipo umwanche umwi pa, ali ni mikate isano iya syaili ni nswi siili, leelo chingawa ichani uku yantu yano yafula ndi kuti ya?”

¹⁰ Yesu wanena, waati: “Yatekini antu yikale.” Na pantu pao pali ilasu tupu; nga antu yikala, ayoshi yano yali elfu sisano ichaponga,

¹¹ Nga Yesu watola imikate iyo, wasamalisha, wankanya yano ikasile, ifiyo nu ku nswi kwene wayapa, fino yasitanga.

¹² Nayo pano yikuta, wanenile alondeshi yaakwe, waati: “Konganikini ifikunyolwa fino fyashala, chitalowa nanti chimwi,”

¹³ Nga yashola, yausha ifiyo ikumi na fiili, ifikunyolwa fya mikate yisano ifya syaili fino fyayasyalila yalye yano yalile.

¹⁴ Nga pano antu yao yalola ichipesha-mano chino wachita, yalanda yaati: “Umwenemo alawi ilau wiwi wino alwisa kuno ukunsi.”

¹⁵ Na Yesu wamanile fino yakasime ukwisu nnema nu kumwika uwene, atina, aya uku mwamba kaili, wenga.

Yesu alupita pa mansi

¹⁶ Na pano yawa amangusi, alondeshi yaakwe yatentenka ukuya muli yemba.

¹⁷ Yaakwela um-wato, yalamba yemba ukuya uku Kapenaumu. Ichanda chalile ichinyepa na Yesu achili aye kuno yali,

¹⁸ Na yemba wakatusha amawimbi kuno unsa wakoma nkani.

¹⁹ Nga pano yaya uku nkolelo, Kilometa sini nanti sisano, yalola Yesu alupita apa mansi ukuya kuno wato uli, yalola ingofi.

²⁰ Nawe wayanena, waati: “Inene, mutachopa.”

²¹ Nga yasita uku mwingisha um-wato, na liyo kwene wato ufika insi kuno yayanga.

²² Uwanda wa uwili iumba lino limilile umbalama yi yemba lyawine fino kusi wato uwunji kuo kwene, leelo wonga, na kaili Yesu atalipo ponga na alondeshi yaakwe, leelo alondeshi yaakwe yapisile yonga.

²³ Leelo yisa mato manina ukufuma uku Tibelia, yaya pipi napano yalile imikate pano uMwene wasamalishe,

²⁴ Ngiumba pano lyalola Yesu asiko kuo na alondeshi yaakwe kwene, yingile um-mato, yaya uku Kapenaumu angi yalunsita Yesu.

Yesu, ichulya cha upuma

²⁵ Nga pano yanndola umbalama yi yemba, yannena, yaati: “Labi, uwishile ku li?”

²⁶ Yesu wayanena, waati: “Umwenemo, umwenemo, ndumunena: umwemwe mulunsita asi kuno mwawine ichipesha-mano, leelo ukuno mwalile imikate mwikuta.

²⁷ Mutachiombela unnimo ichulya chino chilusila, leelo ichulya chino chilwikala fika um-upuma wa manda ti, chino Mwana-ntu alumupa; kuno wene uwino watelwa akamanyililo na Tata ali Leesa.”

²⁸ Nga yannena, yaati: “Tuchite uli ukuti tuombe imilimo yi Leesa?”

²⁹ Yesu wayanena waati: “Unnimo wi Leesa uli u: munsumile wino watumilwe nawe.”

³⁰ Yannena, yaati: “Uluchita ichipesha-mano chi leelo, ukuti tulole nu kukusumila? Uluomba unnimo uli?

³¹ Yatata yitu yalile imana un-nusanga ndi fino chaandikwe: wayapile ichulya cha mwiyulu kuti yalye.”

³² Yesu wayanena, waati: “Umwenemo, umwenemo, ndumunena: asi Mose wino wamupile ichulya chichi icha mwiyulu, leelo Tata wane uwino alumupa mwemwe ichulya cha ningo, chino chifumile umwiyulu.

³³ Kuno ichulya chi Leesa ichichi chino chikile ukufuma umwiyulu nu kupa aya kunsi upuma.”

³⁴ Nga yannena, yaati: “Mwene, utupe ichulya chiyo manda yoshi.”

³⁵ Yesu wayanena, waati: “Nene ndi chulya cha upuma; wino wacha wisa kuli nene, atalulola insala nanti uche, na wino ansumile, atalulola unsala nanti uche.

³⁶ Leelo namunenile fino mwandola, leelo mutansumile.

³⁷ Yoshi yano Tata wampa, yalwisa ukwane, nanti wensi wino wisa ukwane ntalunjalila ukunsi nanti uche.

³⁸ Kuno inene ntisile ukufuma umwiyulu ukuti inchite fino nkasime, leelo fino akasime wino wanumile.

³⁹ Na fino akasime wino wantumile ifi: ukuti, pali yano wampile, ntalofya nanti wenga, leelo intutulule uwanda wa chisila.

⁴⁰ Kuno fino akasime Tata ifi, ukuti wensi wino alulola uMwana nu kunsumila, awe nupuma wa manda ti, nene nduntutulula uwanda wa chisila.

⁴¹ Apano aYudea yanwinwintika, kuno waati: “Nene ndi chulya chino chafumile umwiyulu.”

⁴² Yalanda, yaati: “Ala wi asi Yesu umwana wi Yosefu, wino tumanile isi na nyina? Nga alulanda uli wi, ukuti: ‘nikile ukufumu umwiyulu?’ ”

⁴³ Nga Yesu wayanena, waati: “Mutachi nwinwintika.

⁴⁴ Kusi untu wino angisa kunondi, ndi Tata wino wantumile, atannesile-ko; nene ndumtutulula uwanda wa chisila.

⁴⁵ Chaandikwe um-malau: ‘Na yoshi yaluwa yasambilishiwa na Leesa.’ Ichino wensi wino wapulika nu kusambilila kuli Tata, akulwisa kunondi.

⁴⁶ Asi kuti umwi walola Tata, leelo wino wafuma kuli Tata, wene uwino walola Tata.

⁴⁷ Umwenemo, umwenemo, ndumunena: Wino ansumile ali nupuma wa manda ti.

⁴⁸ “Nene ndi chulya cha upuma.

⁴⁹ Yaso ino yalile imana un-nusanga, yafwa.

⁵⁰ Alachi ichulya chino chikile ukufuma umwiyulu, ukuti untu ndi walya, atafwa.

⁵¹ Nene ndi chulya cha upuma chino chikile ukufuma umwiyulu; untu ndi walya ichulya chi, alwikala manda yoshi. Ni chulya chino nanfima nene, umwili wane, uku upuma wa yantu yoshi.”

⁵² Chaleka aYudea yampashana akola na akola, yaati: “Untu wi, angatupa uli umwili waakwe kuti tulye?”

⁵³ Nga Yesu wayanena, waati: “Umwenemo, umwenemo, ndumunena: ngi mutalile umwili wa Mwana-ntu nu kunwa uwazi wakwe, mushi nu upuma mukashi yino.

⁵⁴ Wino alulya umwili wane nu kunwa uwasi wane ali nu upuma wa manda ti; nene ndumtutulula uwanda wa chisila.

⁵⁵ Kuno umwili wane ichulya cha mpomvu, nu wazi wane ichakunwa cha mpomvu.

⁵⁶ Wino alulya umwili wane nu kunwa uwazi wane, alwikala muli nene, nene ndwikala um-unkola.

⁵⁷ Ndi fino Tata uwa upuma wantumile nene, nene ndi nupuma kuli Tata. Ifino na wino wandya, aluwa nupuma kuli nene.

⁵⁸ Alachi chakulya chino chikile ukufuma umwiyulu. Chisi wi yaso yano yalile yafwa; leelo wino walya ichakulya chiyo, aluwa nupuma manda yoshi.”

⁵⁹ Amaswi yao wayafwasile un-ng'anda yi Leesa, pano wasambilishanga uku Kapenaumu.

Antu yawela uku chisila

⁶⁰ Nga antu tupu apa yalondeshi yaakwe pano yapulika, yalanda, yaati: “Iswi li lyakoma, uwini wino angalipulika?”

⁶¹ Leelo Yesu amanya um-mweso waakwe fino alondeshi yaakwe yanwinintika ukwiswi liyo, wayanena, waati: “Chene! iswi liyo ilya mifulo?

⁶² Chamuwa uli fwandi, pano mwalola uMwana-ntu wakwela kuno wali inkolelo?

⁶³ uMweso uwuno ukulutela upuma, umwili utaomfile chimwi. Amaswi yao yano namunena, aya mweso kaili upuma.

⁶⁴ Leelo kuli yamwi pali mwemwe yano yatasumile.” Kuno Yesu wamanyile ukufuma inkolelo ayani yano yatasumile, nawe uwini wino alunfima.

⁶⁵ Walanda, waati: “Ichaleka namunena fino kusi untu wino angisa kunondi ngi Tata atannesile-ko.”

⁶⁶ Uku maswi yao ainji apa alondeshi yaakwe, yawelela uku chisila, yatachipita nawe kaili.

⁶⁷ Chaleka Yesu wanena yaya ikumi na yaili, waati: “Chene! nemwe kwene mulusita mupite?”

⁶⁸ Nga Simoni Petlo wannena, waati: “Mwene, tuye kuli wini? Wewe uli na maswi ya upuma wa manda ti.

⁶⁹ Neswe tusumile, kaili tumanile fino wewe uli Nswefu wi Leesa.”

⁷⁰ Yesu wayanena, waati: “Chene! nene ntamusolwile mwemwe ikumi na yaili, na wenga pali mwemwe iSyetani?”

⁷¹ Watakanga Yuda, umwana wi Simoni Iskaliote, kuno wiyo uwino alumfima, nawe ali wikumi na yaili.