Yoane 5 - UPANGANO UPYA

Unwale wa Betsata waposiwa

¹ Ichisila cha ifintu fiyo wali uwanda ukulu uwa aYudea, na Yesu apita ukuya uku Yelusalemu.

² Nu ku Yelusalemu kuo apa Nnyango-wa-Nfwele pali chifula, chino uku chiEblania yakuluti: Betzata. Nacho chili ni nsaka sisano.

³ Na muo mwali alwale ainji umuno yawisi, apofu, aitenda, na yano yalemala. [Angi yalulolela amasi yafundoke.

⁴ Kuno kwali lino malaika wikanga nu kwingila un-chifula, akomya amasi. Na wino watangula ukwingila pano yakomya amasi, apola ulwale waakwe woshi, uno walwile.]

⁵ Na pao kwene kwali untu wino walwale imyaka amakumi yatatu na nnane.

⁶ Pano Yesu wa nnola awisi, nawe wamanile fino unwale wa manda tupu, wannenile, waati: “Ulusita ukupola?”

⁷ Unwale wiyo wafwanga ukuti: “Mwene, inene ntakwite untu uwa kuntela un-chifula, pano yakomya amasi. Na pano nisa, untu unji ankolelela.”

⁸ Nga Yesu wannena, waati: “Katuka, utwike ichitala chako, upite.”

⁹ Liyo kwene untu wiyo amwa umpuma, wanyetula ichitala chakwe, wampita. Nu wanda uo wali uwanda wa Sabato.

¹⁰ Chaleka aYudea yanena wino wapola, ukuti: “Ilelo uwanda wa Sabato. Chisi ningo kuli wewe ukusenda ichitala.”

¹¹ Wayanena, waati: “Wino ampozizye uwino annenile, ati: ‘Nyetula ichitala chako, upite.’ ”

¹² Nga yannena, yaati: “Wiyo wino akunenile, waati: ‘Nyetula, upite!’ uwini?”

¹³ Untu wiyo wino alile wapola atammanyile ngi uwini, kuno Yesu walile atatina, kuno antu yalile yafula penepo.

¹⁴ Ichisila cha ifintu fi Yesu amsana un-ng'anda-nkulu-iyi-Leesa, annena, wati: “Lola, ukuwa mpuma, utachita iifyo kaili, kuti uta cha usanwe niipe ukuluta liyo.”

¹⁵ Untu wiyo ampita waya wayanena aYudea, fino Yesu uwino amposishe.

¹⁶ Uku chintu chiyo aYudea yansunya Yesu, kuno wachisile ichintu chiyo uwanda wa Sabato.

¹⁷ Leelo wayanena, waati: ‘Tata aluomba imilimo na li kwene li; nene kwene nduomba imilimo.”

¹⁸ Chaleka aYudea yalusha ukusita nkani ifyakuti yamumole, kuno atononile uwanda wa Sabato sile, leelo apali ponga na fiyo, watangi Leesa i Tata, angalu ukolanya na Leesa.

Maka yi Yesu

¹⁹ Nga Yesu wayanena, waati: “Umwenemo, umwenemo, ndumunena: uMwana atangi achite chimwi wenga, siku chino alulola Isi aluchita, kuno wiyo fino aluchita, ifino nu Mwana kwene aluchita.

²⁰ Kuno Isi wakunda uMwana, nawe akulunnanga fyoshi fino akuchita unkola, ni milimo imikulu ukuluta i alunnanga, ukuti mwemwe musunguke.

²¹ Ndi fino Tata akulututulula afwi nu kuyapa upuma, ifiyo kwene nu Mwana akuluyapa upuma yaya yano akasime.

²² Kaili Tata ataluputwila untu wensi imilandu, leelo wapa uMwana uputusi woshi.

²³ Ukuti antu yoshi yachindike uMwana, ndi fino yachindika Isi. Wino atachindike uMwana, atachindike isi wino wantumile.

²⁴ “uMwenemo, umwenemo, ndumunena: wino alupulika iswi lyane nu kumsumila wino wantumile, ali nupuma wa manda ti; atalwisa um-uputusi wa milandu, kuno walamba ukufuma undufu ukuya um-upuma.

²⁵ uMwenemo, umwenemo, ndumunena: isita ilwisa, na isaa ilipo, pano yafwi yalupulika iswi Iya Mwana wi Leesa, na yano yalipulika yaluwa upuma.

²⁶ Ndi kuti fino Tata ali kafumo ka upuma, ifiyo kwene ifino wapile nu Mwana ukuwa kafumo ka upuma;

²⁷ Nawe wampa amaka ya kuputula imilandu, kuno uMwana-ntu.

²⁸ Mutachisunguka uku maswi yao, kuno isaa ilwisa, yino antu yoshi yano yali um-malindi, yalupulika iswi lyaakwe.

²⁹ Nayo yalufuma, yaya yano yachisile ifisifu uku kusyuka kwa upuma, na yalye yano yachisile isiipe, uku kusyuka kwa kuputwilwa imilandu.

³⁰ “Nene ntangi nchite chimwi nenkola; ndi fino ndupulika ifino nduputula, nuputusi wane uwa ningo, kuno ntalusita fino nkasime nenkola, leelo fino akasime wino wantumile.

³¹ Ngi nawimikila nenkola, usyuta wane usi wa ningo.

³² Kuli unji wino alungimikila, nene manyile fino usyuta waakwe uno alungimikila, uwa ningo.

³³ Umwemwe mwatumile antu kuli Yoane, nawe wimikile icha kapanga.

³⁴ Leelo inene ntakusumila usyuta uku yantu. Leelo ndulanda fi, kuti mwemwe mufyuke.

³⁵ Uwino wali ikosho lilwaka nu kumesa, nemwe mwakasime ukuchimbila um-mwengelela waakwe ukufika pamwi.

³⁶ Leelo usyuta uno ndi nao nene, ulusile uwi Yoane; kuno imilimo ilye yino Tata Wampile kuti njiombe, imilimo kwene iyo yino nduomba, ilungimikila usyuta fino Tata wantumile.

³⁷ Nawe Tata wino wantumile angimikila usyuta. Kusi lino mwatana mupulike iswi lyaakwe, nanti usyu waakwe mutachili muulole.

³⁸ Nanti iswi lyaakwe musi nalyo ukuti angi litensi muli mwemwe; kuno mwemwe mutamsumile wiwi wino watumilwe nawe.

³⁹ Mwemwe mululondola um-Maandiko, kuno mulwelengula fino palumwi muli nupuma wa manda ti muli yeneyo. Nayo ayano yangimikile usyuta.

⁴⁰ Leelo mutakasime ukwisa kunondi, muwe nupuma.

⁴¹ “Nemwi ntalusita ukulu uku yantu.

⁴² Leelo mmanyile mwemwe, fino mutakwite ulukundo lwi Leesa muno muli.

⁴³ Nemwi ngisile ukwisina li Tata, leelo mwemwi mutampokelile. Unji ngi wisa ukwisina lyaakwe unkola, wiyo mulumpokelela.

⁴⁴ Mungasumila uli mwemwe yano mulupokelelana ukulu mwenga, nukulu uu uno ufumile kuli Leesa wino ali wenga, mutaluusita.

⁴⁵ Mutachelengula fino nene ndumusongelela kuti Tata; aliko wino alumusongelela, nawe i Mose wino mwemwe mwataila.

⁴⁶ Kuno ngi mwali musumile Mose, ngangi munsumile nene kwene, kuno wangaandike.

⁴⁷ Leelo ngi mutasumile amaandiko yaakwe, mungayasumila uli amaswi yane?”