Yoane 4 - UPANGANO UPYA

Yesu nu mwanachi unSamalia

¹ Ichino uMwene pano wamanya fino aFaliseo iyapulika fino Yesu atawa na alondeshi ainji ukuluta Yoane nu kuyabatisha,

² —lelo Yesu unkola atabatishanga, shiku alondeshi yaakwe—

³ waatinile uku Yudea, apita aya uku Galilea.

⁴ Nawe wali uwa kupita apakasi pa nsi ya Samalia.

⁵ Nga afika umunsi wa Samalia, uno yakuluti Sikali, uno uli pipi ni chalo chino Yakobo wapile Yosefu mwanakwe.

⁶ Pao kwene pali ichifula chi Yakobo. Nga fino Yesu walile watatoonta ni shila yaakwe, awikala apa chifula, kuti apuse. Nao wali unsanya apakasi.

⁷ Awiza umwanachi unSamalia ukusemba amasi. Yesu annena, wati: “Mpa amasi inwe.”

⁸ Kuno alondeshi yaakwe yalile yaya uku nsi ukuyukala ifyakulya.

⁹ Nga umwanachi unSamalia wiyo annena, wati: “Nga chawa uli wewe mYudea ukusita amasi kuli nene, nene mwanachi unSamalia?” (Kuno aYudea yatuminkine na aSamalia.)

¹⁰ Yesu wannena, waati: “Ngi umanyile uwila wi Leesa, na kaili ngi umanyile wino aluti: Mpa, nwe! newe wali unndombe, nawe wali akupe amasi ya upuma.”

¹¹ Nawe wannena, waati: “Mwene, nga fino usi ni chakusembela, ni chifula chasika, nga wayafumya kwi amasi yao aya upuma?

¹² Chene! we wikolo ukuluta tata witu Yakobo wino watupile ichifula chi? Nawe kwene wanwanga amasi ya na anakwe ni nyama shaakwe.”

¹³ Nga Yesu annena, wati; “Wensi wino alunwa amasi ya; alulola ulusala kaili.

¹⁴ Leelo wino wanwa amasi yano nampa nene, atalulola ulusala manda yoshi. Leelo amasi yao yano nampa, yaluwa munali wi kafukoka wa mansi yano yalufukoka nu kumpa upuma wa manda ti.”

¹⁵ Nga umwanachi wiyo annena, wati: “Mwene, mpa amasi yao, ntachilola ulusala kaili, nanti ukwisa pa ukwisu semba,”

¹⁶ Nga Yesu annena, wati: “Yanga, ukite uwako, mwisa nawe pa.”

¹⁷ Nga umwanachi wiyo afwanga, wati: “Ntakwite uwane,” Yesu wannena, waati: “Wafwanga ningo fino usi nu wako.

¹⁸ Kuno wawa na yoshi yasano, na wino uli nawe kasalaka, asi wako. Ala li walanda ningo.”

¹⁹ Apano umwanachi wiyo wannena, waati: “Mwene, nalola fino wewe ilau;

²⁰ Yatata yitu yapepanga uku mwamba u; nemwe muluti: uku Yelusalemu ukuno mupepelange.”

²¹ Yesu wannena, waati: “Mama, unsumile, isaa ilwisa yino mutalupepa Tata uku mwamba u nanti uku Yelusalemu.

²² Umwemwe mulupepa ichintu chino mutamanile; swemwi tulupepa chino tumanile, kuno ufyusi ufumile uku aYudea.

²³ Leelo isaa ilwisa, nisaa ilipo, yino alupepa ningo, yalupepa Tata uku mweso ni chumi. Kuno Tata alusita antu ndi yao akumpepa.

²⁴ Leesa uMweso, na yano yalumpepa, yangampepa ku mweso ni chumi.”

²⁵ Umwanachi wiyo wanena, waati: “Manyile fino alwisa Mesia, wino yakuluti Klisto; nawe pano wacha wisa, alutuswelwila ifintu fyoshi.”

²⁶ Yesu wannena, waati: “Ne ntu ndufwanga newe, ali nene.”

²⁷ Liyo kwene yisa alondeshi yaakwe, yasunguka, kuno wafwangaa nu mwanachi. Leelo umwi atachili, ati: “Ulusita chani?” Nanti: “Uku chani ulufwanga nawe?”

²⁸ Nga umwanachi wiyo asya ichaluzi chakwe, aya uku nsi anena antu, ati:

²⁹ “Nguni mlole untu wino wannena ifintu fyane fyoshi fino nachita. Chene! wi angawa i Klisto?”

³⁰ Nga yafuma umunsi yaya kuno ali.

³¹ Uku chisila alondeshi yampapata yaati: “Labi, ulye.”

³² Ayanena, ati: “Inene indi ni chakulya chino mutamanyile mwemwe.”

³³ Chaleka alondeshi yaakwe yanenana, yaati: “Siko umwi atanndetela ichakulya?”

³⁴ Yesu wayanena, waati: “Ichakulya chane alichi: nfikilishe fino akasi wino wantumile nu kumalila imilimo yaakwe.

³⁵ Umwemwe mutakuti: kwasyala imyesi yini tucheshe? Lolini, nemwi ndumunena, katusini amaso yino, mulolekeshe ifyalo, fino fifiswepa, ififika ukukumbula.

³⁶ Nu wino alusakata akulupiwa amalipo yaakwe, nu kukonganika ifikumbule uku upuma wa manda ti, ukuti wino alupela na wino alukumbula yachimbe paliponga.

³⁷ Kuno pao iswi liyo ifino chili: wenga alupela, akumbula unji.

³⁸ Inene namutumile ukukumbula fino mutachulile; anji yachusile, nemwe mwingila um-machulo yao.”

³⁹ Nu munsi uo aSamalia inji yamsumila ukwiswi lya mwanachi wiwi, wino watasile ukuti: Wali wanena ifintu fyoshi fino nachita.

⁴⁰ Na aSamalia, pano yaya kunali, yapapata kuti awikale ukumwao, nawe wikala kweneko amanda yaili.

⁴¹ Na antu ainji nkani yasumila ukwiswi lyaakwe.

⁴² Yannena umwanachi wiwi, yaati: “Nga twasumila, leelo asi uku maswi yako sile, kuno neswe twapulika, swe yakola, kaili twamanya ningo fino alawi uli Nkulusi wa nsi.”

Mwana wi Diwani

⁴³ Ni chisila cha manda yaili yao, atina kweneko aya uku Galilea.

⁴⁴ Kuno Yesu unkola watasile fino ilau atakupiwa unchinsi un-nsi ya kumwao.

⁴⁵ Nga pano waya uku Galilea, amu Galilea yampokelile, kuno yawine ifintu vyonsi fino wachisile uku Yelusalemu, apa wanda ukulu, kuno nayo kwene yaile ukii wanda uo.

⁴⁶ Nga aya uku Kana ya Galilea kaili, nako ukuno wasenwile manzi ukuwa amasi ya mizabibu. Nga kwali diwani wenga umwanakwe unwale uku Kapenaumu.

⁴⁷ Nga pano wapulika Yesu waatiza um-Galilea, ukufuma uku Yudea, waile kunali, wampapata ukuti aye akaposhe umwanakwe; kuno wali apa lufu.

⁴⁸ Nga Yesu wannena, waati: “Ngi mutawine ifilangisho ni fipezya-mano, mutangi musumile nanti uche?”

⁴⁹ Diwani wiyo wannena, waati: “Mwene, uye suwa, pano umwanane achili afwe.”

⁵⁰ Yesu wannena, waati: “Pitanga, umwanako umpuma.” Untu wiyo wasumila iswi liyo lino wanenwa na Yesu, wampita.

⁵¹ Na pano wawelanga, aomfi yaakwe yankomenganya, yalanda fino umwanakwe umpuma.

⁵² Nga ayatondosha ili lino umwana watampa ukuwa ningo; nayo yannena, yaati; “Iyulu pano lyasenuka, insusi yasisile.”

⁵³ Nga isi amanya fino ilili kwene lino Yesu wannenile fino umwanakwe umpuma. Wene wazumila na yoshi ayang'anda umwakwe,

⁵⁴ Ala chiyo ichilangisho cha uwili chino Yesu wachisile. pano wafumile uku Yudea ukuya uku Galilea.