Yoane 3 - UPANGANO UPYA

Yesu na Nikodemo

¹ Pali untu wenga uwa aFaliseo, isina lyaakwe i Nikodemo, uwikolo wa a Yudea.

² Wene waile. ushiku kunali, wannena, waati: “Labi, tumanyile fino we Kasambilisha wafuma kuli Leesa; kuno kusi untu wino angachita ifipeshamano fi fino uluchita wewe, ndi Leesa asi ponga nawe.”

³ Yesu wannena, waati: “Umwenemo, umwenemo, ndukunena: untu ndi atafilwe amaila yaili, atangi alole uwene-wi-Leesa.”

⁴ Nikodemo wamtondosha, waati: “Angafyalwa uli untu ndi wawa uwikolo? Angingila un-nda yi nyina afyalwe ilya uwili?”

⁵ Yesu wannena, waati: “Umwenemo, umwenemo ndukunena: untu ndi atafilwe uku mashi nu ku Mweso, atangi awingile um-wene-wi-Leesa.

⁶ Chino chafyalwa uku mwili, umwili; na chino chafyalwa uku Mweso, umweso.

⁷ Utachisyunguka fino nakunena, nati: Mungale mufyalwe lya uwili.

⁸ Unsa ukulusuma na kuno ukasime, nunsumo waakwe kuupulika, leelo angi utamanile kuno ufumile na kuno uyile: ifiyo kwene nuntu wino wafyalwa uku Mweso.”

⁹ Nikodemo wannena, waati: “Chingawela uli ukuwa fiyo?”

¹⁰ Yesu wannena, waati: “Newe we Kasambilisha wa Islaeli, ni ifintu fi utafimanile?

¹¹ uMwenemo, umwenemo, ndukunena: fino lili lino tulimanile, tukululivwanga, na lino twalola tukululilanda, nu kulanda kwitu mutalukusumila.

¹² Ngi namunena ifya kunsi, mutalusumila, mulusumila uli ngi namunena ifya mwiyulu?

¹³ Kusi untu wino watana wakwela umwiyulu, siko wino wika ukufuma umwiyulu, ali Mwana-ntu.

¹⁴ “Ndi fino Mose wimike insoka yiyi unnusanga, ifino nu Mwana-ntu kwene awimikwe.

¹⁵ Ukuti chila ntu wino wasumila, awe nupuma wa manda ti mnali.

¹⁶ Kuno yiyo Leesa wakundile aya munsi, ichaleka wafima uMwana waakwe wafilwe wenga, ukuti chila ntu wino wamsumila, atalowa, leelo awe nupuma wa manda ti.

¹⁷ Kuno Leesa atatumile uMwana ukuya munsi ukuti ayaputula imilandu, leelo aya munsi yafyukile kuno ali.

¹⁸ Wino wamsumila ataluputwilwa imilandu; wino atasumile wataputulwa undandu, kuno atasumile isina lya Mwana wi Leesa, wafilwe wenga.

¹⁹ Nau uli uputusi wa milandu, kuno umwengelela wisa ukunsi. na antu yakunda ichanda ukuluta umwengelela, kuno ifintu fino yaluchita fyawipa.

²⁰ Kuno chila ntu wino aluchita ifiipe, akulutuwa umwengelela, atangi awise uku mwengelela, kuno atakasi milimo yaakwe iloleke apatiswe.

²¹ Leelo wino aluomba ifya chumi akuluwisa uku mwengelela, ukuti imilimo yaakwe iloleke apatiswe fino iluombeka muli Leesa.”

Yesu na Yoane Kabatisha

²² Ichishila cha ifintu fiyo, Yesu na alondeshi yaakwe yapita ukuya un-nsi ya a Yudea; alinda kweneko ponga nayo, angi alubatisha.

²³ Yoane nawe wabatishanga uku Ainoni, apipi ni Salimu, kuno kuwo amasi yafusile; na antu yaya kunali, yabatisiwa.

²⁴ Kuno Yoane walile achili anyepwe.

²⁵ Nga yumanya ulupaka alondeshi yi Yoane nu mYudea wenga uku nnandu wa kufulala,

²⁶ Yaya kuli Yoane, yaati: “Labi, wino wali ponga newe umbalama yi Yordani, wino wamtakanga, lolini, alubatisha, na antu yoshi yaluya kunali.”

²⁷ Yoane wayanena, waati: “Untu atangi apokelele chimwi, siko ndi wapiwa ukufuma umwiyulu.

²⁸ Mwemwe mwe yakola mululanda fino nafwansile, inti: ‘Inene asi ne Klisto, leelo ntumilwe uku nkolelela.’

²⁹ Wino ali na nawinga ali siwinga; leelo chinsindi wi siwinga wino alwimilila nu kumpulika, aluchimbila nkani iswi li siwinga.

³⁰ Ichino fi ukuchimba kwane kukufika. Wene mpaka andushe, nene nchepe.”

³¹ Wino aluwisa ukufuma umwiyulu, alusile yoshi; wino uwa munsi, wene uwa munsi, alufwanga ifya munsi. Wene wino alwisa ukufuma umwiyulu, alusile yoshi.

³² Fino wawine nu kufipulika ifino alulanda, leelo kusi umwi wino alupulika amaswi yaakwe.

³³ Wino wasumila amaswi yaakwe, watela akamanyililo fino Leesa uwa chumi.

³⁴ Kuno wino watumilwe na Leesa, akululanda amaswi yi Leesa, kuno atakufumya uMweso uku kulinganya.

³⁵ Isi wakunda uMwana, nawe wampa fyoshi um-makasa yaakwe.

³⁶ Wino asumila uMwana ali nupuma wa manda ti; wino atasumile uMwana, atalulola upuma, leelo ukali wi Leesa umwikalile.