Yoane 21 - UPANGANO UPYA

Yesu kuli yemba wa Tibelia

¹ Ichisila cha ifintu vi Yesu auswelula kali uku alondeshi yaakwe pali yemba wa Tibelia, Nawe wauswelwile vi.

² Simoni Petlo na Toma wino yatangi Ipasa, na Natanieli wa ku Kana ya Galilea, na ana yi Zebedeo na alondeshi anji yaili yali pali ponga.

³ Simoni Petlo wayanena, waati: “Naya ukuyuwela inswi.” Nayo yannena, yaati: “Neswe kwene twanja ponga newe.” Nga yankatuka ukupita yankwela um-wato. Leelo usiku uo yatapasile chimwi.

⁴ Nu ntondo pano kwacha, Yesu wimilile umbalama, leelo alondeshi yatamanyile fino i Yesu.

⁵ Nga Yesu wayanena, waati: “Yanane, muli ni nyenyi?” Yaati “Awe!”

⁶ Wayanena, waati: “Sumbini isumbo ukwi lunji lya wato, nemwe mwannonda.” Nga yasumba, nga kaili yapotwa ukuukwesa kuno inswi zyavula.

⁷ Nga unndondeshi wiwi wino Yesu wakunda, wannena Petlo, waati: “Umwene!” Nga nawe Simoni Petlo pano wapulika fino uMwene, wanyepa umwenda waakwe (kuno wali tupu) aitivya muli yemba.

⁸ Na alondeshi yanina yiza um-wato, kuno yatali ukutali nu mbalama, yangawa makasa imyanda ili, na kuno yalukwesa isumbo lino lili ni nswi.

⁹ Nga pano yika ukalusele-senga, yalola umoto wa makala ni nswi itipanikwa penepo nu nkate.

¹⁰ Yesu wayanena, waati: “Letini pa inswi zimwi zino mwafuma mwela li kwene.”

¹¹ Nga Simoni Petlo aya um-wato, akwesela isumbo undusele-senga, lizyuzile inswi inkulu, umwanda na makumi yasano na zitatu; nanti fino zyavula fiyo isumbo litachili lilepuke.

¹² Yesu wayanena waati: “Nguni mutisye indoto.” Leelo kutali umwi apa alondeshi yaakwe wino wezizye kumtondosya, ati: “We weni?” Kuno yamanyile fino uMwene.

¹³ Yesu awiza atola unkate ayapa, ninswi kwene.

¹⁴ Liyo ilya utatu Yesu ukuuswelula uku y alondeshi yaakwe, ichisila cha kuzyuka uku yafwi.

Yesu wavwanga na Petlo

¹⁵ Nga pano yalya, Yesu wanena Simoni Petlo, waati: “Simoni, mwana wi Yoane, wewe wankunda ukuluta ya?” Wannena, waati Endita Mwene, wewe umanyile fino nakukunda,” Wannena, waati: “Upaye ana ya nfwele zyane ichakulya.”

¹⁶ Wannena kailiilya uwili; waati: “Simoni, mwana wi Yoane; wankunda? Wannena, waati: “Endita, Mwene, wewe umanyile fino nakukunda.” Wannena, waati: “Uchemanga infwele zyane.”

¹⁷ Wannena ilya utatu, waati “Simoni, mwana wi Yoane, wankunda?” Petlo alola malanda, kuno wannena ilya utatu, Waati: “Wankunda?” Wannena, waati: “Mwene, wewe umanyile vyonsi, wewe umanyile fino nakukunda.” Yesu wannena, waati: “Upae infwele zyane ichakulya.

¹⁸ Umwenemo, umwenemo, ndukunena: Pano wali unnumendo, waunyepanga wenkola nukuya kuno ukasime, leelo pano wacha wawa nkombo, ulukatusya makasa yako, nunji alukunyepa nu kukusenda kuno utakasime.”

¹⁹ Wavwanzile fiyo ukummanyisya infwa chi yino alufwa, nu kutensya Leesa kuli yeneyo. Nga pano wavwanga fiyo, ati: “Ndondela.”

²⁰ Petlo asenuka, alola unndondeshi wino wakundikwa na Yesu alondile; (Nawe uwino wasekime apa chifuwa chakwe pano yalyanga ichakulya cha manguzi, ati: ‘Mwene, uwini wino alukufima?’)

²¹ Uwino Petlo walola, wanena Yesu Waati: “Mwene, nga nawi?”

²² Yesu wannena, waati: “Ngi kasime ukuti angalipo ukufika lino nacha niza, ungakanila chani? Wemwi ndondela.”

²³ Nga iswi liyo lilumbuka unjanina fino unndondeshi wiyo atalufwa. Leelo Yesu atannenile fino atalufwa, leelo waatile: “Ngi nkasime ukuti angalipo ukufika lino nacha niza, ungakanila chani?”

Kumalila

²⁴ Alawi alu nnondezi wino wimikila, uwino waandike ifintu vi, neswe tumanyile fino usyuta waakwe uwa kapanga.

²⁵ Nga kuli ni ifintu ivinina tupu fino Yesu Wachisile; fino ngi vyandikwa chonga chonga, ndwelengula palumwi ni nsi yachepa, vitangi vilimbe ivitabu fino vingaandikwa.