Yoane 20 - UPANGANO UPYA

Yesu watatutuluka

¹ Nga apa wanda wa ntangulo uwa juma, Malia wa ku Magdala waile ukwilindi usiku-siku, angi kuchili kufisile, alola ifinga itisye apilindi.

² Nga wituka ulwilo waya kuli Simoni Petlo nu ku nnondezi wiwi wino Yesu walile wakunda, wayanena, waati: “Iyaatisya uMwene tunwiindi nga tutamanyile kuno iyamwika.”

³ Nga Petlo nu nnondezi unnina yafuma, yalondela inzila ya kwilindi.

⁴ Yachonchomala ulwilo yoshi yaili. Ngu nnondezi wiwi witukisya nkani ukulusya Petlo, wawa uwa ntangulo ukufika ukwilindi.

⁵ Nga winama wasungamila, walola ivitambala ivitiswe vitulikwe; leelo atachili awingile.

⁶ Nga Simoni Petlo awiza angi annondile, wingila umwilindi, walola ivitambala fino vitulikwe.

⁷ Nileso yino yali ukuntwe wakwe, itatulikwe ponga ni vitambala, leelo yatulikwe ukumbali yonga.

⁸ Nga pano unndondeshi wiwi unnina wino walile uwa ntangulo ukufika ukwilindi wingila nawe, walola nu kuzumila.

⁹ Kimo yalile yachili yamanye Ilyandiko lino litile: Aluzyuka.

¹⁰ Nga alondeshi yao yapita kaili yaya ukumwao.

Yesu na Malia wa ku Magdala

¹¹ Leelo Malia asyala awimilile pipi nilindi apanzi angalulila. Nga pano alulila, winama nu kusungamila umwilindi.

¹² Walola yamalaika yaili aya myenda imitiswe, yatenzi wenga ukuntwe na wenga uku mulu, apantu pano Yesu wawizi ichala.

¹³ Nayo yannena, yaati: “Mama, ululila chani?” Wayanena, waati: “Kuno iyaatisya umwene wane, nga ntamanyile kuno iyamwika.”

¹⁴ Nga pano wavwanga fiyo, asenuka uku chisila, alola Yesu awimilile, atamanyile fino iYesu.

¹⁵ Yesu wannena, waati: “Mama, ululila chani? Ulusita wini?” Nawe watangi kunde ikalima wa chalo, nga wannena, waati: “Nkombe, ngu kumsenda wewe, undange kuno ukumwika, nene nkumtisya,”

¹⁶ Yesu wannena, waati: “Malia!” Nawe waseleuka, wannena uku chiEblania, waati: “Laboni!” (alikuti: Kasambilizya wane.)

¹⁷ Yesu wannena, waati: “Utandema, kuno nchili mpite ukuya kuli Tata; leelo pita uku yachane, ukayanene fino: napita ukuya kuli Tata, nawe iSo wino, kuli Leesa wane, nawe iLeesa wino.”

¹⁸ Nga Malia Mandalena ampita, aya anena alondeshi ukuti: “Nalola uMwene, nawe wanena amaswi yao.”

Yesu waloleka uku mitume

¹⁹ Pano yawa amanguzi uwanda wuwo kwene uwa ntangulo ya juma, pano alondeshi yali, yalile iyayala imilyango yopanga aYudea, Yesu aya awimilila apakasi, ayanena, ati: “Uwelezyo uwe nemwe.”

²⁰ Nga pano wavwanga fiyo, wayalanga amakasa yaakwe nu luwazu lwakwe. Alondeshi yachimba kuno yalola uMwene.

²¹ Nga Yesu wayanena kaili, waati: “Uwelezyo uwe nemwe! Ndi fino Tata wantumile nene, nene namutuma mwemwe.”

²² Nga pano wavwanga vi, ayaputila umpu, ati: “Pokelelini uMweeso Nswefu.

²³ Yoshi yano mwelela amaifyo, yalwelelwa, na yoshi yano mwanyepela amaifyo, angi yanyepelwa.”

Yesu waloleka kuli Toma

²⁴ Leelo wenga uwi kumi na yaili, Toma wino yatangi Ipasa, atalipo ponga nanina, pano Yesu wizile.

²⁵ Nga alondeshi yanina yannena, yaati: “Twali twalola uMwene!” Nawe wayanena, waati: “Nemwi ngi ntawine amayamba ya mizumali um-makasa yaakwe nu kutela unwe wane un-chipongo cha mizumali nu kutela ikasa lyane unduwazu, ntangi nzumile.”

²⁶ Nga ichisila cha manda nnane, alondeshi yali unkasi kaili, na Toma walipo. Yesu awiza, ni milyango angi imiyale, wimilila apakasi yao, waati: “Uwelezyo uwe nemwe.”

²⁷ Nga wanena Toma, waati: “Leta pa unwe wako, ulole amakasa yane, ulete ikasa lyako, ulitele unduwazu lwane, utawa untazumila, leelo wino aluzumila.”

²⁸ Toma wannena, waati: “Mwene wane na Leesa wane!”

²⁹ Yesu wannena, waati: “Uwewe wazumila kuno wandola? Yali ni nkata yano yaluzumila nanti kulola.”

³⁰ Nga kuli ivipezya-mano ivinji tupu fino Yesu wachisile apa maaso ya alondeshi yaakwe, fino vitaandikwe un-chitabu chi.

³¹ Leelo vi vyandikwe ukuti mumanye fino Yesu i Klisto, Mwana wi Leesa, nu kukuzumila, muwe nu upuma ukwizina lyaakwe.