Yoane 2 - UPANGANO UPYA

Winga uku Kana

¹ Nu wanda wa utatu kwali uwinga uku Kana un-nzi wa Galilea; na nyina wi Yesu wali kweneko.

² Yesu nawe kwene yanndalike uku winga ponga na alondeshi yaakwe.

³ Nga pano amasi ya mizabibu yasila, nyina wi Yesu wannena, waati: “Yatakwite amasi ya mizabibu.”

⁴ Na Yesu annena, wati: “Mama, tuli ni chintu uli newe? Ilya kuchita fiyo lichili lipalamile,”

⁵ Nga nyina anena aofi, wati: “Choshi chino wannena ukuomba, ombini.”

⁶ Nga kwali ifyalusi sita ifya mafinga, fino a Yudea yakuwika ifya kufulalila, na chila chonga chingashula intungo siili nanti sitatu.

⁷ Nga Yesu ayanena, wati: “Sushini ifyalushi amasi.” Nayo yasusha mpaka piyulu.

⁸ Wayanenena, waati: “Ali tapulini, mutwalile kimula.” Nga nayo yatwala.

⁹ Nawe kimula pano wang'wa, walola amashi yao iyakola amasi ya mizabibu. (Lelo atamanyile kuno yafumile, leelo aofi yamanyile, yao yano yasenfile amashi.) Kimula wiyo wisile siwinga.

¹⁰ Wannena, waati: “Chila litu intangulo akululeta amashi ya mizabibu yano yanona, na pano antu yanwa yikuta, apano aleta yano yatanonile; wemwi utuwika amashi ya mizabibu yano yanona fika na li.”

¹¹ Iyo intangulo ya filangisho Yesu wachisile uku Kana, un-nzi wa Galilea, wauswelula ukulu wakwe, na alondeshi yaakwe yamsumila.

¹² Ichisila cha ifintu fiyo, aya uku Kapenaumu, unkola na nyina nanina yaakwe, na alondeshi yaakwe, yikala kweneko amanda mache.

Yesu waswefya ng'anda-nkulu-iyi-Leesa

¹³ Ni Pasaka ya a Yudea yalile itipalamila, nga Yesu wapita uku Yelusalemu.

¹⁴ Asana antu un-ng'anda-nkulu-iyi-Leesa, yalukasha ing'ombe ni nfwele ni nkunda, na yano yalukaulula impia yateshi

¹⁵ Atola ichose, achita chikoti, ayafumya yoshi un-ng'anda-nkulu-iyi-Leesa, ni nfwele ni ng'ombe; awita impia shi yakakaulula ya mpia, apenola imeza shao.

¹⁶ Wayanena yano yalukasha inkunda, ati: “Tisini fi, mutachi chita ing'anda yi Tata ukuwa iya kukalila ifintu.”

¹⁷ Nga alondeshi yaakwe isukila fino chaandikwe: ‘Usuwa wa ng'anda yako ulundya.’

¹⁸ Nga aYudea yannena, yaati: “Ichipesha-mano uli chino ulutulanga, fino uluchita fi?”

¹⁹ Yesu wayanena, waati: “Omolini ing'anda-nkulu-iyi-Leesa yi, nene uku manda yatatu nanjikula.”

²⁰ Nga a Yudea yafwanga, yaati: “Ing'anda-nkulu-iyi-Leesa yi yakusilwe uku myaka amakumi yani na sita, newe wanjikula uku manda yatatu?”

²¹ Leelo wene watakanga ing'anda inkulu, umwili wakwe.

²² Nga pano watutuluka uku yafwe, alondeshi yaakwe isukila fino watasile fiyo, yasumila ilyandiko liyo niswi lino Yesu wayanenile.

²³ Nga pano wali uku Yelusalemu uku wanda ukulu uwa Pasaka, antu tupu yasumila ishina lyaakwe, pano yalola ifipesha-mano syaakwe, fino aluchita.

²⁴ Leelo Yesu unkola atayataile, kuno wayamanile yoshi.

²⁵ Na kuno atakasime untu ukunndandila ifya yantu, kuno unkola kwene wamanile fino fili un-ntu.