Yoane 19 - UPANGANO UPYA

aYudea yapota Pilato

¹ Apano Pilato atola Yesu, amuma ni mikowa.

² Na asalifi yasuka inkata ya myonga, yamzwika uku ntwe, yamzwika nu mwenda wa zambalau.

³ Angi yaluya nu kunnena, yaluti: “Tulukulaula, mwene wa aYudea.” Yamuma na makofi.

⁴ Nga Pilato afumila apanzi kaili, ayanena, ati: “Untu wi nanneta panzi kuli mwemwe, mumanye fino nemwi ntawine unnandu umwi uku ntu wi.”

⁵ Apano Yesu wafuma apanzi angi azwite inkata ya myonga uku ntwe nu mwenda wa zambalau. Pilato wayanena, waati: “Lolini, untu wi.”

⁶ Nga pano ayikolo iyakapela naomvi yao pano yannola, yuma ichongo nukuti: “Akonkomelwe! Akonkomelwe!” Pilato wayanena, waati: “Ali nsendini mwemwe, mkankonkomele, kuno nemwi ntawine unnandu wakwe.”

⁷ aYudea yannena, yaati: “Swemwi tuli ni ntambi, nu ku ntambi iyo aumolwe, kuno wauchita wa mwana wi Leesa.”

⁸ Nga lino Pilato wapulika imivwangilo yao, aopa nkani.

⁹ Awingila kaili un-ng'anda ya milandu, Wanena Yesu, waati: “We, wafuma kwi?” Leelo Yesu atachili amvwanzye chimwi.

¹⁰ Nga Pilato wannena, waati: “Utalunvwanzya? Utamanyile fino ndi na maka ya kukusapula nu kukumola?”

¹¹ Yesu wannena, waati: “Uwewe utali uwe na maka yamwi kuli nene, ngi utali upiwe ukufuma umwiyulu. Ichino fiyo wino antezile um-makasa yako ali ni yifyo ikulu nkani.”

¹² Kufuma pao Pilato wasita ukunsapula, leelo aYudea yuma ichongo, yaati: “Ngi wansapula wi, usi ninkula na Kaisali; chila untu wino akuuchita umwene, akulunyata Kaisali.”

¹³ Nga pano Pilato wapulika amaswi yao, waleta Yesu apanzi, wikala apa chisumbi cha kuputwila imilandu, pano yakuluti: “Unsolo wa mafinga,’ na ku chiEblania: ‘Gabata.’

¹⁴ Wali uwanda wa kutea iPasaka, angi unsanya pakasi. Wanena aYudea, waati: “Lolini, umwene wino.”

¹⁵ Nga yuma ichongo, yaati: “Mtisye, mtisye! Umkonkomele!” Pilato wayanena, waati: “Chene! Nkonkomele umwene wino?” Ayikolo iyakapela yannena, yaati: “Swemwi tusi nu mwene, siku Kaisali mpela.”

¹⁶ Apano wamfima um-makasa yao kuti yamumole. Nayo yamsenda Yesu.

Yesu wakonkomelwa apa nsalaba

¹⁷ Wafuma angi asenzile unsalaba wakwe, afika pano yakuluti: “Ipanga lya ntwe, nu ku chiEblania: “Golgota.”

¹⁸ Apano yankonkomelela, na yamwi yaili ponga nawe, wenga ku nunji ku, na Yesu apakasi.

¹⁹ Na Pilato waandika ichimanyisyo, wawika apiyulu apa nsalaba, angi chitile vi: “YESU WA KU NAZALETI, UMWENE WA AYUDEA.”

²⁰ Ngi chimanyisyo chiyo aYudea tupu yachisomanga, kuno pano yakonkomelile Yesu pala pipi nunzi, na cho chaandikwe uku chiEblania, chiLoma ni chiGliki.

²¹ Nga ayikolo iyakapela ya aYudea yannena Pilato, yaati: “Utachaandika ukuti: ‘Umwene wa aYudea,’ leelo uti wino akuluti: ‘Nene mwene wa aYudea.’”

²² Pilato wayanena, ukuti: “Chino ningaandika, nindangaandika.”

²³ Na asalifi pano yakonkomela Yesu, yatola imyenda yaakwe, yachita imituli yinni, chila nsalifi ituli lyaakwe; ni nkanjo. Ni nkanjo iyo itasumilwe, leelo yali nduke yoshi fuma ukwiyulu.

²⁴ Nga yanenana, yaati: “Tutachiilepula, leelo tuchite ichimala-mpaka, ngiwe iyini.” Kuti lifikilile Ilyandiko lino litile: “Yankinye ivizwalo vyane; ni nkanjo yane yaichitila ichimala-mpaka.” Ifino asalifi yaya yachisile.

²⁵ Na pa nsalaba waakwe Yesu pali nyina nakachi unnina wi nyina, Malia nka Klopa, na Malia wa ku Magdala angi yimilile.

²⁶ Nga Yesu pano walolekesya nyina nu nnondezi wino wakunda awimilile apipi, anena nyina, ati: “Mama, ulole umwanako.”

²⁷ Na kaili anena unndondeshi wiyo, ati: “Ulole nyoko.” Nu kufuma liyo kwene unndondeshi wiyo amsenda uku ng'anda ukwakwe.

²⁸ Pa chisila cha ifintu fiyo, kuno Yesu wamanyile fino ifintu vyonsi ivimalilika, kuti lyandiko lifikilile, avwanga, ati: “Nafwa umu nsala.”

²⁹ Na pao kwene kwali ichivya chimwi angi chizyuzile amasi ya malimao, nga yatela inkamu um-manzi ya malimao, nga yatunga umwitete, yatwala uku nnomo wakwe.

³⁰ Nga pano Yesu watola manzi ya malimao, wavwanga Ukuti: “Chasila!” Nga ainama untwe, umweso umputuka.

³¹ Nga aYudea kuno yalalilile uwanda ukulu uwi Leesa, ivyala vitasyala uku nsalaba uwanda uwa Sabato, (kuno uwanda uo wali ukulu) yalomba Pilato kuti yayavune amulu yao yayaatisye.

³² Nga asalifi yaya, yavuna uwa ntangulo amulu nu wa uwili wino wakonkomelwe ponga nawe.

³³ Leelo pano yiza kuli Yesu, yalola watafwa, yatachili yamvune amulu.

³⁴ Leelo unsalifi wenga wamtosile ni sumo unduwazu, liyo kwene uwazi na manzi yafuma.

³⁵ Na wino wawine wimikila, nu usyuta waakwe uwa chumi, nawe amanyile fino wavwanga ichumi; ukuti nemwe muzumile.

³⁶ Ifintu vi vyaombike ukuti Ilyandiko lifikilile, lino litile: “Kusi fupa lyaakwe lino liluvunwa.”

³⁷ Na kaili Ilyandiko ilinina litile: “Yalunnola wino yatosile.”

Yesu wazikwa mwilindi

³⁸ Ichisila cha ifintu vi Yosefu wa ku Alimatea, nawe wali unndondeshi wi Yesu, leelo uku ufisa ukukopa aYudea, Walomba Pilato azumile atisye ichala chi Yesu. Pilato wamzumile. Nga waya wisya ichala chakwe.

³⁹ Nikodemo nawe kwene, wino waile usiku ulye inkolelo, waleta mane-mane yano yuminkine nu udi, aya kilo amakumi yasano.

⁴⁰ Nga yatola ichala chi Yesu, yachifunda um-mwenda untiswe ponga na mafuta yao, ndi fino aYudea yakuluchita apa kuzyika.

⁴¹ Napano yamkonkomlelile pali chalo, un-chalo unkasi mwali ilindi ipya, lino umwi atatana wazyikwa mwenemo.

⁴² Nga fino uku aYudea wali uwanda wa kuteya, yamzyika mwenemo, kuno ilindi lyali apipi.