Yoane 18 - UPANGANO UPYA

Yalema Yesu

¹ Walangi Yesu wavwanga amaswi ya, afuma na alondeshi yaakwe alamba kaluzi ka Kedloni pano pali chalo, aya mwenemo na alondeshi yaakwe.

² Na Yuda wino wasitanga ukumfima, wapamanyile apantu pao, kuno Yesu wayanga amaila tupu kweneko ponga na alondeshi yaakwe.

³ Nga Yuda pano wapiwa iumba lya asalifi, na aomvi yano yafumile uku yikolo iyakapela na aFaliseo, yaya kweneko ni tala ni vyaka ni vyanzo.

⁴ Nga Yesu fino wamanyile ifintu fino vyamnzana, afuma, ayanena, ati: “Uwini wino mulusita?” Nayo yaati:

⁵ “Yesu wa ku Nazaleti.” Yesu Wayanena, waati: “Inene.” Na Yuda wino wamfimile, wimilile ponga nayo.

⁶ Nga pano wayanenile ukuti: “Inene,” yawela chindansizi, yapona pansi.

⁷ Nga wayatondosya kaili, waati: “Mulusita wini?” Yaati: “Yesu wa ku Nazaleti.”

⁸ Yesu wayanena, Waati: “Ntimunena, nti: Inene! Ngi mulunsita nene, lekini ya yapite.”

⁹ Kuti liwe lino wavwanzile ukuti: “Yano wampile ntachili ndovye nanti wenga.”

¹⁰ Nga Simoni Petlo wali ni mpanga, wasomola, wakoma umuofi wi Kapela-nkulu, wamsesula ikutwi lya kwi lunji. Nu momvi wiyo izina lyaakwe i Maluko.

¹¹ Nga Yesu wanena Petlo, waati: “Someke impanga un-chipata. Chene! ulwako luno Tata wampa, ntalunwela?”

Yesu pali Anasi

¹² Nga asalifi nu wikolo wao naomvi ya aYudea yalema Yesu, yannyepa.

¹³ Intangulo yatana yantwala kwi Anasi, kuno wali isivyala wi Kayafa, wino wali Kapela-nkulu umwaka uo.

¹⁴ Nawe Kayafa uwino wapile aYudea iswi, lyakuti: “Chingazipa untu wenga afwile antu.”

Petlo wamkana Yesu

¹⁵ Nga Simoni Petlo nu unndondeshi unnina yalondile Yesu. Nu nnondezi wiyo walile wamanyika na Kapela-nkulu, wingile ponga na Yesu un-ng'anda yi Kapela nkulu.

¹⁶ Leelo Petlo wimilila apanzi lwa pannyango. Nga unndondeshi umwi wino wamanyike na Kapela-nkulu, afuma avwanga nu nnolezi wa nnyango, wingizya Petlo unkasi.

¹⁷ Nga unsungu wiyo wino wali unnolezi wa nnyango, wannena Petlo, waati: “We, newe kwene asi we unndondeshi wa ntu wi?” Nawe wakana, ati: “Asi nene!”

¹⁸ Nga azya nasalifi yimilile apanzi yalile iyapemba umoto wa makala, kuno kwali nzusi, angi yalota umoto, Petlo nawe wali ponga nayo angi alota umoto.

¹⁹ Nga Kapela-nkulu watondosya Yesu ivya pa alondeshi yaakwe na masambilizyo yaakwe.

²⁰ Yesu wannena, waati: “Inene navwangaa na akunzi apatiswe; manda yoshi nasambilizyanga un-ng'anda zyi Leesa nu ng'anda-nkulu-iyi-Leesa, muno yakukongana aYudea yoshi, ukumbali ntachili nvwange iswi nanti limwi.

²¹ Uluntondosezya chani nene? Tondosya yano yapulike chino nayanenanga; wene yamanyile ifintu fino navwangaa.”

²² Nga pano wavwanga fiyo, umuofi wenga wino wimilile apipi, wuma Yesu ikofi, waati: “Ulunnena Kapela-nkulu fiyo?”

²³ Yesu wannena, waati;, “Ngi navwanga chino chaipa, ngimikila uipe uo, leelo ngi nvwanzile ningo, ulungumila chani?”

²⁴ Nga Anasi wamtwala kwi Kayafa, Kapela-nkulu, angi anyefilwe.

²⁵ Na Simoni Petlo kwene wali penepo angi awimilile alota umoto. Nga yannena, yaati: “We, newe kwene asi we nnondezi wakwe?” Nawe wakana, waati: “Asi nene!”

²⁶ Unzya umwi uwi Kapela-nkulu, nawe uluko lwi wino Petlo waseswile ikutwi, waati: “Ntali nkuwine uli ponga nawe un-chalo?”

²⁷ Nga Petlo akana kaili, na liyo kwene nkolwe alamula.

Yesu pali Pilato

²⁸ Nga pano kwacha yafumya Yesu kwi Kayafa, yantwala uku ng'anda ya kuputwila imilandu, Leelo wene yaatingila un-ng'anda ya milandu, yaatiza yafite imyenzo, leelo kuti yalye iPasaka.

²⁹ Nga Pilato afuma panzi, aya kuno yali, ati: “Unnandu chi uno muletile untu wi?”

³⁰ Yannena, yaati: “Untu wi ngasuchita iviipe, ngangi tutannesile kunuli.”

³¹ Nga Pilato wayanena, waati: “Ali nsendai mwemwe, mukamputwile unnandu uku ntambi yino.” aYudea yannena, yaati: “Tutapiwilwe amaka ya kumola untu.”

³² Ukuti lifikilile lino Yesu wavwanzile, lino walanzile infwa ya kundya.

³³ Nga Pilato awingila kaili un-ng'anda ya milandu, awita Yesu, annena, ati: “Chene! We mwene wa aYudea.”

³⁴ Yesu annena, ati: “Wewe walanda fiyo apalwako, nanti anji yakunenile maswi yane?”

³⁵ Pilato wannena, waati: “Ala! Chene! nene mYudea? Antu yako na yikolo iyakapela ayano yakulesile kuli nene. Nga wachita chani?”

³⁶ Yesu wavwanga ukuti: “Uwene wane asi wa kuno ukunzi. Ngangi uwene wane uwa kimo ukunzi, aomvi yane yali yandwile kuti ntalemwa um-makasa ya aYudea. Leelo uwene wane asi wa pa.”

³⁷ Nga Pilato wannena, waati: “Chene! We mwene?” Yesu wannena, waati: “Wewe wataka, fino nene Mwene. Nemwi navilwe uku nnandu wa ifintu vi, nu ku ifintu vi ichileka nizile kuno ukunzi, ukuti ngimikile ichumi. Untu wensi uwa chumi akulupulika iswi lyane.”

³⁸ Pilato wannena, waati: “Ichumi ichili chani?” Nga pano wavwanga iswi liyo, afumila kaili uku aYudea, ayanena, ati: “Ntawine unnandu apa ntu wi.

³⁹ Leelo muli ni ntambi yakuti musapwile untu wenga apa Pasaka, Nga mulusita msapwile umwene wa aYudea?”

⁴⁰ Nga yuma ichongo kaili, yaati: “Wiyo pole, sapula Balaba.” Na Balaba wali kapoka-vya antu.