Yoane 16 - UPANGANO UPYA

¹ “Amaswi ya namunena kuti mutata usumilo wino.

² Yalumuwinga un-ng'anda zyi Leesa, endi, insaa ilwisa yino chila untu wino alumumola, aluti kunde aluombela Leesa.

³ Ni ifintu vi yalumuchusha, kuno yatammanile Tata nanti nene.

⁴ Leelo namunena fiyo, kuti insaa ii pano yacha yafika, mulwelengula fino nene namunenile. “Ntachili munene fiyo ukufuma intangulo kuno nalipo ponga nemwe.

Unnimo wa Mwaswilisi

⁵ “Lelo kasalaka, napita ukwakwe wino wantumile na kusi umwi wino aluntondosya, ati: ‘Waya kwi?’

⁶ Leelo kuno namunena ifintu vi, imyeso yino yashula amalanda.

⁷ Leelo nemwe ndumunena icha chumi: chingamusipila mwemwe, nene ntine; kuno ngi ntatinile, uMwaswilisi wiyo atangi awise kuno muli, leelo ngi napita ndunneta kuno muli.

⁸ Nawe wiyo alula wisa, alumanyisha amunsi nku nnandu wa maifyo, ni chumi nu uputusi.

⁹ Uku nnandu wa maifyo, kuno yatansumile nene.

¹⁰ Uku nnandu wa chumi, kuno napita kuli Tata nga musundola kaili.

¹¹ Uku nnandu wa uputusi wa milandu, kuno unnâsi wa kuno ukunsi wataputwilwa unnandu.

¹² “Nchili ndi ni fyafula ifya kumunena, leelo mutangi mufileme kasalaka.

¹³ Leelo pano wacha wiza uo Mweso wa Chumi, alumukolelela nu kumutwala un-chumi chonsi. Kuno ataluvwangila apa lwakwe sile, leelo vyonsi fino wacha wapulika alulanda, ni ifintu fino vilwiza alumumanyisha amaswi yaakwe.

¹⁴ Aluntensya nene, kuno alutola um-fyane nu kumumanyisha.

¹⁵ Na fyoshi fino Tata ali nafyo, ifyane. Ichino fwansile ukuti alutola um-vyane nu kumumanyisha.

Chikonko chiluwa kuchimba

¹⁶ “Kwashala manda mache mutalundola na kaili kwashala manda mache, nemwe mulundola.”

¹⁷ Nga alondeshi yaakwe yamwi yavwanzyanya, yaati: “Chino watunena ichani, fino waati: ‘Kwashala kache, mutalundola, na kaili kwashala kache mulundola?’ Na kaili: ‘Kuno napita ukuya kuli Tata?’ ”

¹⁸ Nga yaati: “Iswi uli lio lino walanda: ‘Kwashala kache?’ Twaula ukumanya chino wafwanga.”

¹⁹ Yesu wamanile fino yalusita yantondosha, wayanena, waati: “Ichino muluntondosya chiyo, chino namunena, nati: ‘Kwasyala kache nemwe musundola na kaili kwashala kache nemwe mulundola?’

²⁰ Umwenemo, umwenemo, ndumunena: umwemwe mululila nu kulosya, leelo aya kunsi yaluchimba; umwemwe mululola malanda, leelo amalanda yino yalusenuka yawe ukuchimba.

²¹ Umwanachi pano alupapa, ali na malanda kuno chamfikila; leelo pano wapapa umwana, atakwelengula kaili ukuwaya kuku, uku kuchimba kwa kufyalwa untu kuno ukunsi.

²² Ichino nemwe li, muli na malanda, leelo nene ndumulola kaili, ni myeso ino iluchimba, nu kuchimba kwino kusi wino alumupoka,

²³ Na kaili uwanda uo mutaluntondosha chimwi. Umwenemo, umwenemo, ndumunena Ngi mwalomba Tata chimwi, alumupa ukwisina lyane.

²⁴ Kufika kasalaka muchili mulombe chimwi ukwisina lyane. Lombini nemwe mulupiwa, kuti ukuchimba kwino kufikilile.

²⁵ “Iifintu fi namunena uku milumbe. Lilwisa lino ntaluvwanga nemwe uku milumbe kaili, leelo ndumunena apatiswe amaswi ya kuli Tata.

²⁶ Nu wanda uo mululomba ukwisina lyane, leelo ntalumunena ukuti ndumulombela kuli Tata,

²⁷ kuno Tata unkola wamukunda kuno mwankunda nene nu kuzumila fino nene nafumile kuli Tata.

²⁸ Nafumile kuli Tata, nene nisa kuno ukunsi; na kaili natina kuno ukunsi naya kuli Tata.”

²⁹ Nga alondeshi yaakwe yaati: “Lola, li kwene ululanda apatiswe, nga utalufwanga ku nnumbe umwi,

³⁰ Nga twamanya fino fwandi umanyile ifintu fyoshi, nanti utalusita umwi akutondoshe chimwi; ichaleka twasumila fino wafumile kuli Leesa.”

³¹ Nga Yesu wayanena, waati: “Chene! nga mwazumila kasalaka?

³² Lolini, kuluwa, endita, ikuwa nu kuwa lino mwansambala mwensi wenga wenga nu kunsha nene nenga. Leelo nene nsi nenga, kuno Tata ali ponga nene.

³³ Ifintu fi namunena, kuti mwikale mutekini muli nene. Ukunzi ku muli na machulo; leelo tekini myeso, nemwi napota insi.”