Yoane 15 - UPANGANO UPYA

Unzabibu na matai yaakwe

¹ “Nene nsabibu wa chumi, na Tata unnimi.

² Itai lyonsi munondi lino litalusêka, akululitisha, ni tai lyonsi lino lilusêka, akulupambwila, kuti lisêke nkani.

³ Mwemwi mwaswepa ukwiswi lili lino namunenile.

⁴ Ikalini muli nene, nene muli mwemwe. Ndi fino itai litangi lisêke lyonga, ngi litikasile un-nsabibu, ifino nemwe ngi mutatensi muli nene.

⁵ Nene nsabibu, nemwe mwe matai; wino atensi muli nene, nene muli wenewe, uwino alusêka nkani, kuno ngi musi muli nene, mutangi muchite iswi limwi.

⁶ Untu ngi atatensi muli nene, asumbwa apansi nu kunyala wi tai, antu yayakonganika nu kuyasumbila um-moto, yasikisa.

⁷ Nemwe ngi mwikala muli nene, na maswi yane ngi yikala muli mwemwe, lombini chonsi chino mukasime, mwampiwa.

⁸ Tata angi alutensiwa uku ifintu fiyo, kuno muluseka nkani, apano muluwa alondeshi yane.

Chilangaso cha lukundo

⁹ Ndi fino Tata wankunda, ifino nene kwene namukunda; wikalini undukundo lwane.

¹⁰ Ngi mwalema ifilangaso vyane, mwamwikala undukundo lwane, ndi fino nemwi nalema ifilangaso fyi Tata nu kwikala undukundo lwakwe.

¹¹ “Namunena fiyo ukuti ukuchimba kwane kuwe muli mwemwe, nu kuchimba kwino kufulishe.

¹² Ichilangaso chane ichi: Mukundane ndi fino nene namukunda.

¹³ Kusi wino ali nu lukundo tupu kuluta lu, ulwa ntu ukufima upuma waakwe uku nnandu wi yakatakwe.

¹⁴ Umwemwe mwawa yakatane, ndi mwanchita fino ndumusunda.

¹⁵ Ntalumwita yazya kaili, kuno unzya atamanile chino umwene waakwe aluomba; leelo mwemwi namwita yakatane, kuno fyoshi fino napulika kuli Tata namumanyisha.

¹⁶ Asi mwemwe mwansolwile, leelo inene namusolwile mwemwe, nene namuwika muye mukasêke ifisêke, ni fisêke fino fikale, ukuti chonsi chino mwalomba Tata ukwisina lyane, amupe.

¹⁷ Namusunda fi mwemwe kuti mukundane.

A munsi yatuwa Yesu

¹⁸ “Nga ukunsi yamutuwa, mumanye fino iyantuwa nene inkolelo ya kumutuwa mwemwe.

¹⁹ Ngangi mwe yakunsi, ngangi ukunsi kwamukunda ali yaakwe. Leelo kuno asi mwe ya kuno ukunsi, leelo nene namusolwile uku yakuno ukunsi, ichino fiyo akunsi yalumutuwa.

²⁰ Mwiyusye iswi lili lino namunenile, ukuti: ‘Unzya atalusile umwene wakwe.’ Ngi yanzunyile nene, nemwe kwene yalumusunya; ngi yalemile iswi lyane, yalulema ni lino kwene.

²¹ Leelo ifintu fyoshi fi, yalumuchitila uku nnandu wisina lyane, kuno yatammanile wino wantumile.

²² Ngi ntalingise ukwisu vwanga nayo ngangi yatakwite amaifyo; leelo apa kasalaka yatakwite ukanilo ku maifyo yao.

²³ Wino wantuwa nene angi watuwa na Tata kwene

²⁴ Ngangi ntali mbombe imilimo yino unji ataomfile ukuyakola, ngangi yatakwite amaifyo. Leelo kasalaka yailola na kututuwa nene na Tata.

²⁵ Leelo kuti lifikilile lili lino lyandikwa un-Ntambi yao, ukuti: ‘Yantuwile chaka.”

²⁶ “Lelo uMwaswilisi wiyo pano wacha wisa, wino ndutuma ukufuma kuli Tata, uo uMweso wa chumi ufumile kuli Tata, wiyo alungimikila.

²⁷ Nemwe kwene mulungimikila, kuno fuma intangulo mwali ponga nene.