Yoane 14 - UPANGANO UPYA

Yesu inzila ya kuya kuli Tata

¹ “Mutachisima um-myeso yino; mwasumila Leesa, nsumilini nene kwene.

² Un-ng'anda yi Tata muli umwakwikala mwavula; ngi kusi nali munena, kuno naya ukuyumuteyanyisisha apa kwikala,

³ Nga ngi napita ukuyumuteyanyisisha apa kwikala, nduwela kaili ngise mutwale ukwane, ukuti panondi nene, angi nemwe mulipo.

⁴ Nene kuno njile, insila muimanile.”

⁵ Toma wannena, waati. “Mwene, usweswe tutamanile kuno, wanja, nga tumanyile uli insila?”

⁶ Yesu wannena, waati: “Nene ndi nsila, ni chumi, nu upuma; untu atalwisa kuli Tata, ngi atapitile kuli nene.

⁷ Ngangi mumanile nene, ngangi mumanile na Tata; ukufuma li kwene mummanile na kaili mwannola.”

⁸ Filipo wannena, waati: “Mwene, utulange Tata, kuno chingatusipila.”

⁹ Yesu wannena, waati: “Inene nikala ponga nemwe amanda yoshi ya, newe utammanyile, Filipo? Wino wandola nene, walola Tata; nga wewe watuli ukuti: ‘Utulange Tata?’

¹⁰ Utasumile fino nene ndi muli Tata, na Tata ali muli nene? Amaswi ya yano ndumunena nene, ntaluyafwanga apa lwane, leelo Tata wino ali muli nene, aluomba imilimo yaakwe.

¹¹ Sumilini fino nene ndi muli Tata na Tata ali muli nene; ngi mutasumile fiyo, sumilini nanti milimo kwene.

¹² Umwenemo, umwenemo, ndumunena: wino wansumila nene, imilimo yino nduomba nene, nawe kwene wanjiomba, endita, ni mikulu ukuluta yi aluomba, kuno nemwi naya kuli Tata.

¹³ Nemwe ngi mwalomba chimwi ukwizina lyane, ngamupa, ukuti Tata atensiwe umMwana.

¹⁴ Ngi mwalomba chimwi ukwisina lyane, ngamupa.

Ulanyo wa Mwaswilisi

¹⁵ “Ngi mwankunda, mwannema ivilangaso vyane.

¹⁶ Nene ndulomba Tata, nawe alumupa uMwaswilisi unji, kuti awe ponga nemwe manda yoshi,

¹⁷ Ali Mweso wa Chumi, uno aya mu nsi yatangi yampokelele, kuno yatalunnola nanti ukummanya awe. Leelo mwemwi mummanyile, kuno alwikala nemwe, aluwa muno muli.

¹⁸ “Ntalumusya ulanda, ndwisa kuno muli.

¹⁹ Kwasyala manda mache na yakunsi yatalundola kaili; leelo mwemwi mulundola, na kuno ndi nupuma, nemwe kwene muluwa nao.

²⁰ Uwanda uo mulumanya fino ndi muli Tata, nemwe muli nene, nene muli mwemwe.

²¹ Wino ali ni filangaso vyane nu kufilema, wiyo uwino wankunda nene, alukundikwa na Tata, nene ndunkunda nu kuuswelula kunali.”

²² Yuda (wino asi Iskaliote) wannena, waati: “Mwene, chawa uli fino ulusita ukuuswelula kuli sweswe, leelo asi ku ya munsi?”

²³ Yesu wannena, waati: “Untu wino wankunda, akulema iswi lyane, na Tata alumkunda, neswe tulwisa kunali nu kwikala munali.

²⁴ Untu wino atankunsile, atalemile amaswi yane; niswi lino mulupulika lisi lyane, leelo ilyi Tata wino wantumile.

²⁵ “Ala fiyo ifino namunenile pano nchili ntensi ponga nemwe.

²⁶ Leelo uMwaswilisi wiyo, uMweso Nswefu, wino Tata aluntuma ukwisina lyane, alumusambilisha fyoshi nu kumwelengusha fyoshi fino namunenile.

²⁷ “Namushile uwelesho, uwelesho wane namupa; fino namupa nene asi fino amunsi yakulupa. Mutachisima ummyeso yino nanti ukuwa ni ngofi.

²⁸ Mwapulika fino namunenile, ukuti: ‘Napita, kaili ndwisa kuno muli.’ Ngangi mwankunda, ngangi muluchimba kuno naya kuli Tata, kuno Tata unkulu andusile.

²⁹ Nga li kwene namunena pano chichili chiloleke, kuti pano chaloleka, musumile.

³⁰ Inene ntalufwanga nemwe amaswi tupu kaili, kuno alwisa unndâsi wa nsi i; nawe asi na maka kunondi.

³¹ Leelo akuno ukunsi yamanye fino nakunda Tata, na fino Tata wampa ichilangaso, ifino nduchita. Katukini, tupite.