Yoane 13 - UPANGANO UPYA

Yesu wafula alondeshi amulu

¹ Ngi nkolelo ya wanda ukulu uwa Pasaka, Yesu wamanile fino amanda yaakwe iyasila akufuma kuno ukushi ukuya kuli Tata, nawe wakunda antu yaakwe kimo ukushi, wayakunda chimwi.

² Na pa chakulya amangushi, chiwa walile atatela Yuda umwana wi Simoni Iskaliote um-mweso, ukuti amfime.

³ Na Yesu wamanile fino Tata wampa fyoshi um-makasa yaakwe, na fino wafumile kuli Leesa nawe ayile kuli Leesa.

⁴ Watinile apa chakulya, wawika imyenda yaakwe uku mbali, watola ichitambala, wanyepa umu nsana.

⁵ Nga atela mansi un-chogelo, atampa ukuyafula mulu alondeshi nu kuyapulukusa ni chitambala chino walile watanyepa umu nsana.

⁶ Nga awisa kuli Simoni Petlo. Wene wannena, waati: “Mwene, wewe unfule nene amulu?”

⁷ Yesu wannena, waati: “Chino nduchita li kwene utachimanyile, leelo uluchimanya ichisila.”

⁸ Petlo wannena, waati: “Wewe utangi unfule amulu nanti uche.” Na Yesu wannena, waati: “Ngi ntakufusile, usi ninkula ponga nene.”

⁹ Simoni Petlo wannena, waati: “Mwene, nfula asa mulu yane mpela, leelo na makasa yane nuntwe wane kwene.”

¹⁰ Yesu wannena, waati: “Wino watafulala asi na chimwi, siku ukufula amulu mpela, leelo umwili wonsi uswefile Nemwe mwaswepa, leelo asi mwensi.”

¹¹ Kimo wamanile wino alumfima; ichino wafwasile ukuti: “Asi mwensi yano mwaswepa.”

¹² Nga pano wayafula amulu nu kutola imyenda yaakwe nu kwikala kaili, wayanena, waati: “Chene! mwamanya chintu chino namuombela?

¹³ Mwemwe mulungita muti: ‘Kasambilisha,’ nu: ‘Mwene.’ Mulutaka ningo, kuno ifino ndi.

¹⁴ Ali ngi nene ndi Mwene na Kasambilisha namufula amulu, chingamusipila nemwe kwene ukufulana amulu.

¹⁵ Kuno namupa ichilangililo, ukuti ndi fino nene namuombela, ifino nemwe ombangi.

¹⁶ Umwenemo, umwenemo, ndumunene: Umuofi atangi alute umwene wakwe, nanti katumwa atangi alute wino amtumile.

¹⁷ Ngi mwamanya ifintu fi, muli ni nkata ngi mwafiomba.

¹⁸ “Ntalumufwangila mwemwe mwensi; manile yaya yano nasolwile, leelo kuti Ilyandiko lifikilile ukuti: ‘Wino alile ichakulya chane, wankatusisha akantunta kakwe.’

¹⁹ Kufuma li kwene ndumunena lino chichili chiloleke, ukuti pano chaloleka, musumile fino nene ndi wenewe.

²⁰ uMwenemo, umwenemo, ndumunena: Uwacha wapokelela untu wensi wino ntumile, aluwa atampokelela nene, nuwa mpokelela nene aluwanga atampokelela wino wantumile.”

Yesu walanga Yuda Iskaliote

²¹ Nga pano wafwanga ifintu fiyo, Yesu asima ummweso, alanda ukuti: “Umwenemo, umwenemo, ndumunena: Umwi pali mwemwe wanfima.”

²² Alondeshi yalolana nanti kumanya ngalutaka wini.

²³ Nga kwali unnondeshi waakwe wenga wino Yesu wakunda, wasekamile apa chifuwa chi Yesu.

²⁴ Nga Simoni ansinisha, annena, ati: “Tondosha, alutaka wini?”

²⁵ Nga nawe wino wasekamila apa chifuwa chi Yesu, wamtondosha, waati: “Mwene, uwini?”

²⁶ Nga Yesu wannena ukuti: “Untu wino nasondela itonje nu kumpa.” Wasonda itonje, wapa Yuda, umwana wi Simoni Iskaliote.

²⁷ Pano walya itonje, Shetani amwingila. Nga Yesu, wannena, waati: “Chino uluomba, ombanga suwa.”

²⁸ Nga pali yano yali apa chakulya, kusi wino wamanile kuno ichani wannena fiyo.

²⁹ Kuno yamwi yaatile, fino Yuda akulusenda imbokosi, Yesu wannena ukuti: “Ukale fino tulusita uku wanda ukulu,” nanti: “Ukupa apina chimwi.”

³⁰ Nga wene pano wapokelela itonje liyo, amfuma liyo kwene; nao wali usiko.

Chilangaso chipya

³¹ Nga pano wafuma, Yesu ati: “Li kwene watensiwa uMwana-ntu, na Leesa watensiwa munali.

³² Ngi Leesa nawe watensiwa muli wenewe, Leesa aluntensha munali umwisikikulu, nawe wamtensha liyo kwene.

³³ Mwe yana yanono, nchili ndipo uche ponga nemwe, mulunsitai, ndi fino nanenile aYudea, ukuti: ‘Kuno nduya, mwemwi mutangi mukwise,’ ifino nemwe kwene namunena.

³⁴ “Ichilangaso chipya namupa: mukundane; ndi fino namukunda mwemwe, nemwe kwene ifino mukundane.

³⁵ Apano na antu yoshi yalumanya fino mwawa alondeshi yane, ndi mwakundane.”

Yesu walanda fino Petlo wammkana

³⁶ Simoni Petlo wamtondosha, waati: “Mwene, nga wanja kwi?” Yesu wannena, waati: “Kuno njile, utangi undondele apa kasalaka, leelo ulundondela apa chisila.”

³⁷ Petlo wannena, waati: “Mwene, kimo ichani ntangi nkulondele apa kasalaka? Ichakuti chikulye wewe, chikundya nene.”

³⁸ Yesu wannena, waati: “Chene! Wewe wanfima upuma wako pali nene? Umwenemo umwenemo, ndukunena: Nkolwe asulamula kufika lino wewe wankana amaila yatatu.