Yoane 12 - UPANGANO UPYA

Malia wampaka Yesu mafuta

¹ Nga amanda sita inkolelo ya Pasaka, Yesu afika uku Betania, kuno Lazalo wali, nawe uwino Yesu watutulwile uku yafwi.

² Nga kuo kwene yanndetela ichakulya cha mangusi, na Malita wayaombelanga, na Lazalo walipo pali yano yalipo apa chulya ponga nawe.

³ Nga Malia awisa nu nsasi wa mafuta ya Nalido asipe, aya mpangila, apaka Yesu amulu, ampulukusa amulu ni nyele shaakwe. Amafuta yanunkilila yalimba ing'anda.

⁴ Leelo Yuda Iskaliote, wenga apa alondeshi yaakwe, nawe wino alumfima, wafwanga ukuti:

⁵ “Uku chani amafuta ya yatakasilwe uku mpia sha dinali imyanda yitatu, yapiwe apina?”

⁶ Nawe wafwansile fiyo asi kuti wawalile apina, leelo kuno wali umwifi, uli wino walemile imbokosi, watolanga fino vyatelwanga-mo.

⁷ Nga Yesu afwanga ukuti: “Lekini ayawike uku wanda wa kushikwa kwane.’

⁸ Kuno apina yali ponga nemwe manda yoshi, leelo nemwi musi nene manda yoshi.”

⁹ Nga antu tupu uku aYudea yamanya fino ali kweneko, nayo isa, leelo yatayilile Yesu sile, leelo kuti yalole na Lazalo, wino Yesu watutulwile uku yafwi.

¹⁰ Nayo ayikolo iyakapela yamba apaliponga ukuti yumole na Lazalo kwene.

¹¹ Kuno kuli wenewe aYudea tupu isanga yasumila Yesu.

Yesu wingila um-Yelusalemu

¹² Nu wanda wa uwili antu tupu yano yaile uku wanda ukulu, yapulika fino Yesu wamwisa uku Yelusalemu.

¹³ Yatola amafwa ya, mitende, yapita ukuyu nkomanya, angi uku maswi makulu yaluti: “Osana, uwino wapepelelwa alwiza ukwisina lya Mwene! Mwene wa Islaeli!”

¹⁴ Nga Yesu pano wasana umwana mpunda, akowela, ndi fino chaandikwe:

¹⁵ “Utachopa, mwana kachi wa ku Sioni, lola, uMwene wako alwisa; akwesile umwana mpunda.”

¹⁶ Ifintu fi alondeshi yaakwe apa ntangulo yatafimanile, leelo pano Yesu watensiwa, apano yisukila fino waandikilwe panali, na fino yachisile ifintu fiyo kunali.

¹⁷ Nga iumba lino lyalipo pano wisile Lazalo ukufuma umwilindi, wamtutulula, lyamwimikila.

¹⁸ Uku chintu chiyo ichino iumba lyaya ukuyumkomanya, kuno yalile iyapulika fino wachisile ichipesha-mano chiyo.

¹⁹ Nga aFaliseo yafwanshanya yonga, yaati: “Muwine fino mutachi tumbwile chimwi, lolini antu yoshi iyannondela.”

aGliki yasita ukulola Yesu

²⁰ Pali na aGliki yamwi apa yantu yano yaile uku wanda ukulu ukuyupepa.

²¹ Nga isa kuli Filipo untu wino wali uwa ku Betsaida ya ku Galilea, yantondosha, yaati: “Mkombe, tulusita ukulola Yesu.”

²² Filipo waya wanena Andelea, nga Andelea na Filipo yanena Yesu.

²³ Nawe Yesu wayanena, waati: “Lilifika ilyakuti uMwana-ntu atensiwe.

²⁴ Umwenemo, umwenemo, ndumunnena: ulupeche lwa ngano ngi lutaponile umu nsili nu kufwa, angi lulilonga kwene; leelo ngi lwafwa lukululeta impeche tupu.

²⁵ Wino akasime upuma wakwe, akuulofya, na wino watuwa upuma waakwe kuno ukunsi, aluwa nao kufika nu um-upuma wa manda ti.

²⁶ Untu ngalumbombela, andondele; nene panondi, apano nu momfi wane angali. Na kaili untu ngi alumbombe la, Tata alumchindika.

²⁷ “Ali umweso, wane wawa na masima, na mfwanga chani? Tata, untule apantu pa? Leelo ichino ngisile.

²⁸ Tata, ulitensha isina lyako.” Nga iswi lisa ukufuma umwiyulu, lyaati: “Nalitensha, nene nanditensha kaili.”

²⁹ Ngi umba lino limilile apipi lyapulika, lyaati: “Kwawa unndunkumo.” Yamwi yaati: “Malaika alufwanga nawe.”

³⁰ Yesu wafwanga ukuti: “Iswi li litisile kuli nene, leelo limwisile mwemwe.

³¹ Li kwene kwawa uputusi wa milandu ya nsi, li kwene unndâsi wa nsi i wawingwa.

³² Nene ngi pano nakatusiwa umwiyulu un-nsi, ndukwesa yoshi ukwane.”

³³ Wafwasile fiyo ukuyalangisha ulufu uli luno alufwa.

³⁴ Ngiumba lyannena, lyaati: “Swemwi tumanile un-Ntambi fino Klisto aluwako manda ti, newe ulutuli kaili ukuti ale uMwana-ntu akatusiwe? uMwana-ntu wi, uwini?”

³⁵ Nga Yesu wayanena, waati: “Umwengelela uchili ponga nemwe amanda mache. Pitangi chino muli nu mwengelela uo, ichanda chitisa chimusane, kuno wino alupita un-chanda atamanile kuno aile.

³⁶ Fino muli nu mwengelela, sumilini umwengelela uo, ukuti muwe yana ya mwengelela.” Walangi pano Yesu wafwanga fiyo, wapita waufisa yatachinndola.

Usumilo wa aYudea

³⁷ Leelo nanti fino wachisile ifipesha-mano tupu ndi kuti fiyo, apa maaso yao, yatachili yamsumile.

³⁸ Kuti liwe iswi lino ilau Isaya wafwasile, ati: “Mwene, uwini wino wazumile amaswi yitu. Nikasa lya Mwene waswelwilwe wini?”

³⁹ Ichaleka yao yatachili yazumile, kuno Isaya wafwa-sile kaili, ati:

⁴⁰ “Wayapofusha amanso, wainwamika imyeso yao, yaatise yalole uku maso yao, yamanye uku myeso yao, yasenuke, njaposha.”

⁴¹ Amaswi yao, wafwasile Isaya kuno wawine ukulu wakwe, walanda amaswi yaakwe.

⁴² Leelo nunjakulu kwene mwali antu tupu yano yansumile, leelo uku nndandu wa aFaliseo, yatachi lasile, kuti yatawingwa un-ng'anda yi Leesa.

⁴³ Kuno yakasime ukulu wa ku antu ukuluta ukulu wa kuli Leesa.

Uputusi wiswi li Yesu

⁴⁴ Nga Yesu afumya iswi, ati: “Wino ansumile nene, atansumile nene, leelo wino wantumile.

⁴⁵ Na wino alundola nene, alulola wino wantumile.

⁴⁶ Nemwi nisile ukuti mbwe mwengelela wa kunsi, ukuti untu wensi Wino wansumila, atacha ikala un-chanda.

⁴⁷ Nu ntu uwapulika amaswi yane, atayalema, nemwi ntalumputwila unndandu; kuno ntisilu putwila akunsi imilandu, leelo nkulule akunsi.

⁴⁸ Wino wankana nene, atayasumile amaswi yane, ali na wino alumputwila unndandu: iswi li lino nafwanga, ilino lilumputwila unndandu uwanda wa chisila.

⁴⁹ Kuno inene ntaufwangile apa lwane nenga, leelo Tata wino wantumile, unkola uwino wannena fino ndusunda na fino ndulanda.

⁵⁰ Nene manile fino isunde lyaakwe upuma wa manda yoshi. Ichino ifintu fino nene ndusunda, ifino Tata wanenile ifino ndufwanga.”