Yoane 11 - UPANGANO UPYA

Yesu watutula Lazalo

¹ Nga untu umwi wali unwale, Lasalo wa ku Betania, uwa mu-nsi wi Malia nu nnina, Malita.

² Ali Malia wino wapakile uMwene amafuta, ampyila ni nyele uku mulu yaakwe, wino Lazalo kalume waakwe wali unwale.

³ Nga asiche yaakwe yatuma kunali, yaati: “Mwene, unkundikwa wako unwale.”

⁴ Nga Yesu pano wapulika, avwanga ukuti: “Ulwale u asi wa lufu, leelo uku utensyo wi Leesa, ukuti uMwana wi Leesa atensiwe kuliwo.”

⁵ Na Yesu walile wakunda Malita nunsiche na Lazalo.

⁶ Nga pano wapulika fino unwale, awikala manda yaili kuo kwene kuno watesi.

⁷ Nga ichisila wanena alondeshi yaakwe, waati: “Tuyini uku Yudea kaili.”

⁸ Alondeshi yao yannena, yaati: “Labi, wanda unji li kwene li, aYudea yakasi yakutame na mafinga; newe ukuno ulusita uye kaili?”

⁹ Yesu wayanena, waati: “Chene! insaa sha nsanya sisi ikumi na siili? Untu ngi alupita unsanya atangi akumike, kuno alulola umwengelela wa nsi i.

¹⁰ Leelo ndi ntu alupita usiku akukumika, kuno umwengelela usimo munali.”

¹¹ Wavwansile ifintu fi, na kaili ichisila wayanena, waati: “Katitu Lazalo awisi, leelo napita kuti nkannansye.”

¹² Chaleka alondeshi yannena, yaati; “Mwene, nga wisi wampola.”

¹³ Leelo Yesu walandanga ulufu lwakwe; nayo yatangi alulanda ukulala utulo.

¹⁴ Chaleka Yesu wayanena apatiswe, waati; “Lazalo watafwa,

¹⁵ Nene nduchimba kuli mwemwe kuno nemwi nsi kweneko, ukuti. muzumile; leelo tuini kunali.”

¹⁶ Nga Toma wino yatangi; “Ipasa.” wanena alondeshi yanina, waati; “Tuini neswe kwene ukuti tufwe ponga nawe.”

¹⁷ Walangi pano Yesu wafika, wasana walinda umwilindi amanda yani.

¹⁸ Nunsi wa Betania wali apipi ni Yelusalemu, ndi kuti kilometa sitatu.

¹⁹ Na antu tupu aYudea yalile isa kwi Malita na Malia ukuyalema amakasa kuli kalume wao.

²⁰ Walangi Malita pano wapulika fino Yesu alwisa, waya ukuyunkomanya, leelo Malia watesi un-ng'anda.

²¹ Apano Malita wanena Yesu, waati: “Mwene. ngi walipo pa ngali kalume wane atafwile.

²² Leelo na li kwene manile fino choshi chino walomba Leesa, akukupa.”

²³ Yesu wannena, waati: “Kalume wako wantutuluka.”

²⁴ Malita wannena, waati: “Manile fino alututiduka apa wanda wa chisila.”

²⁵ Yesu wannena, waati: “Nene ndi ututuluko nupuma; wino wansumila nene nanti wafwa, aluwa umpuma.

²⁶ Na wensi umpuma wino ansumile, atalufwa nantu uche manda yoshi. Ali wazumila yao?”

²⁷ Wannena, waati: “Endita Mwene, nche nasumila fino wewe uli Klisto, Mwana wi Leesa, wino alwisa kuno ukunsi.”

²⁸ Nga pano wafwanga fiyo, apita, awita Malia unnina ukumbali, ati: “Kasambilisha atisa, alukwita.”

²⁹ Nawe pano wapulika, akatuka suwa ukuya kunali.

³⁰ Na Yesu walile achili awingile um-nsi, angachili, ali pano Malita wamkomenginye.

³¹ Nga aYudea yano yali ponga na Malia un-ng'anda, yano yayile ukuyunnema makasa, pano yalola wakatuka suwa nu kufuma, yanndondela, yatangi palumwi waya ukwilindi akalilange.

³² Nga pano Malia wafika pano Yesu ali, pano wannola, Wapona pa mulu yaakwe, wannena, waati: “Mwene, ngangi walipo pa ngali kalume wane atafwile.”

³³ Nga pano Yesu walola alulila, na aYudea yano yalondekine nawe yalulila, alola ichikonko um-mweso nu kusisinkila.

³⁴ Afwanga ukuti: “Mwamwika kwi?” Yannena, yaati: “Mwene, nguna ukalole.”

³⁵ Yesu walila misosi.

³⁶ Chaleka aYudea yaati: “Lolini, fino wankunda.”

³⁷ Leelo yamwi pali yeneyo yaati: “Chene! wi wino wayusile umpofu amanso, atalachite nawi atachifwa?”

³⁸ Chaleka Yesu wawa ni chikonko kaili um-mweso wakwe, nga waya ukwilindi Nalyo lyali ichele nifinga lyali penepo.

³⁹ Yesu waati: “Tisini finga.” Malita, unsiche waakwe wino wafwile, wannena, waati: “Mwene, alununka, kuno walali chala amanda yani.”

⁴⁰ Yesu wannena, waati: “Ntali nkunenile fino ndi wasumila wannola ukulu wi Leesa?”

⁴¹ Nga yaatisha ifinga liyo. Yesu akatusha amaso yaakwe, alolekesha umwiyulu, afwanga ukuti: “Tata, nakusamalisha kuno wampulika.

⁴² Nene manyile fino akulumpulika manda yoshi. Leelo uku nnandu wiumba li lino lili pa, ichino nafwanga fiyo, ukuti yasumile fino wewe uli wino wantumile.”

⁴³ Nga pano wafwanga fiyo, awita ukwiswi ikulu, ati: “Lazalo, fuma ukushi!”

⁴⁴ Afumila ukushi wino wafwile unfunde amulu na makasa imyenda ya mwilindi; nu ku maso unfunde ichitambala. Nga Yesu wayanena, waati: “Msapulini, lekini apite.”

Ayikolo yamba kumumola Yesu

⁴⁵ Ichaleka aYudea ainji, yano yisile kuli Malia pano yalola chino wachita, yasumila.

⁴⁶ Leelo yamwi yaya uku aFaliseo, yayanena ifintu fino Yesu wachita.

⁴⁷ Apano ayikolo iyakapela na aFaliseo yakonganya itengo, yaati: “Twanchita uli? Kuno untu wi aluchita ivipezha-mano tupu.

⁴⁸ Ndi twamta fi kwene, antu yoshi yakumsumila na aLoma yamwisa yatutisishe uwikalo witu, na antu yitu.”

⁴⁹ Untu wenga pali yeneyo, wino yatangi Kayafa, wino wali Kapela-nkulu mwaka ulye, wayanena, waati: “Umwemwe mutamanyile chimwi.

⁵⁰ Mutalwelengula nanti ukwelengula fino chilingine untu wenga afwe uku nnandu wa yantu, kuti antu yoshi yatafwilikanya.”

⁵¹ Ni iswi liyo atali fwangile apa lwakwe, leelo kuno wali Kapela-nkulu mwaka ulye, walausha fino Yesu alufwa uku nnandu wa antu yao.

⁵² Leelo asi ku antu yao sile, leelo ponga na yao akonganike ana yi Leesa yano yasambala, kuti yawe ali yonga.

⁵³ Nga ukufuma uwanda ulye yamba apali ponga fyakuti yamumole.

⁵⁴ Chaleka Yesu atapitananga kaili apatiswe um-aYudea, leelo atina kweneko, aya pamwi apipi nu lusanga, umunsi uno yatangi Eflaimu, ukuno; awikala ponga na alondeshi yaakwe.

⁵⁵ Ni Pasaka ya aYudea yalile itipalamila na inji yafuma um-vyalo yapita ukuya uku Yelusalemu, yakolelela iPasaka ukuti yauswefye.

⁵⁶ Chaleka yasita Yesu, nga yafwashana, angi yimilile un-ng'anda-nkulu-iyi-Leesa, yaati: “Mwalola uli? Atalwisa uku wanda ukulu uu?”

⁵⁷ Na yikolo iyakapela na aFaliseo yalile yafime ichilangaso, ukuti wensi wino wacha wamanya pano ali, awise ayanena kuti yakanneme.