Yoane 10 - UPANGANO UPYA

Yesu, unchemi wa nfwele

¹ “Umwenemo, umwenemo, ndumunena, wino atalwingila apa nnyango un-chipa cha nfwele, leelo alwingilila apa nina, wiyo umwifi na kaili ikapoka-fya-antu.

² Wino alwingilila apa nnyango. unchemi wa nfwele.

³ Wene kalolela akulunjulila, ni nfwele sikulupulika iswi lyaakwe, nawe akulusiita infwele syaakwe uku masina yao nu kuzifumya apasi.

⁴ Nawe pano alusifumya apasi infwele syaakwe shonsi, akulusikolelela, ni nfwele siyo sinndondela, kuno simanile iswi lyaakwe.

⁵ Umweni sitangi sinndondele nanti uche, silumwituka, kuno sitamanile iswi lya eni.”

⁶ Unnumbe uo Yesu wayanenile, leelo wene yatamanile ifintu fino wayanenile.

⁷ Nga Yesu wayanenile kaili, waati. “Umwenemo, umwenemo, ndumunena: nene ndi unnyango wa nfwele.

⁸ Yoshi yano yankolelile aivi na yakapoka-fya-antu, leelo infwele sitayapulike.

⁹ Nene ndi unnyango; untu ndi wingilila kuli nene, alufyuka. Alwingila nu kufuma, nawe alupiwa ni fyakulya.

¹⁰ Umwifi akulwisu wiya nu kuumola nu konona; leelo nemwi nisile ukuti yawe nupuma, kaili yawe nao tupu.

¹¹ “Nene ndi unchemi nsipe. Unchemi nsipe akuluufima upuma waakwe uku nfwele.

¹² Leelo untu fino yasêkela, asu nchemi, wino nfwele asi fyuma fyaakwe, ngi walola unjinsi ulwisa, asha infwele awituka, nu njinsi usilema nu kusisambasha.

¹³ Wiyo alwituka kuno unsêkelwe, icha nfwele chisi chimwi kuli wenewe.

¹⁴ Nene ndi unchemi nsipe, manyile isya kwane, nasho simanile nene.

¹⁵ Ndi fino Tata ammanile nene, nene kwene mmanile Tata. Nene nduufima upuma wane apa nfwele.

¹⁶ Ni nfwele sinina nasho, sisi sha un-chipa chi; nasho kwene ishakuti nsilete, niswi lyane silupulika; apano kuluwa ufyo wonga nu nchemi wenga.

¹⁷ “Ichino Tata wankundila, kuno naufima upuma wane kuti mbutole kaili.

¹⁸ Kusi wino aluntisisha, leelo nemwi nduufima nenkola. Nene ndi na maka ya kuufima, na kaili ndi na maka ya kuutola. Amaka ya Tata wapile,”

¹⁹ Kwawa ukupalunkana kaili apa aYudea ukwiswi liyo.

²⁰ Alitupu yalanda, yaati: “Ali ni chiwa wi, wapena; mulumpulikisha chani?”

²¹ Yamwi yalanda, yaati; “Amaswi ya, yasi yantu wa chiwa; Chene! ichiwa chingayula apofu amaso?”

Yesu wakanwa na aYudea

²² Wali uwanda ukulu wa kwisukila ukuswefya ng'anda-nkulu-iyi-Leesa uku Yelusalemu; yali amanda ya nsusi.

²³ Yesu nawe walunganaa un-ng'anda-nkulu-iyi-Leesa, undukungu lwi Salomoni.

²⁴ Nga aYudea yannisishe, yannena, yaati: “Ulutuchusha imyenso yitu kufika na li? Ndi wewe uli Klisto, utunene apatiswe.”

²⁵ Yesu wayanena, waati: “Nalimunenile, leelo mutakasi ukusumila. Imilimo iyo yino nduomba ukwisina li Tata, iyino ilungimikila.

²⁶ Leelo umwemwe mutalusumila, kuno musimo un-nfwele shane.

²⁷ Infwele shane silupulika iswi lyane, nene nsimanile, nasho silundondela.

²⁸ Nene ndusipa upuma wa manda ti, sitalulowa nanti uche, kusi untu nanti umwi wino angasisompola um-makasa yane.

²⁹ Tata uwasimpile alusile yoshi, leelo kusi nanti umwi wino angasisompola um-makasa yi Tata.

³⁰ Nene na Tata tuli wenga.”

³¹ Nga aYudea yasola amafinga kaili kuti yantame.

³² Yesu wayanena, waati: “Imilimo tupu imisipe inti mulanga, yino ifumile kuli Tata; uku nnimo chi pali iyo uno mulusita muntamile na mafinga.”

³³ aYudea yannena, yaati: “Tutalukutama na mafinga uku milimo misipe, leelo kuno ulusula Leesa na kuno wewe wenkola, we ntu uluuchita we Leesa.”

³⁴ Yesu wayanena, waati: “Chene! chitaandikwe un-Ntambi ino fino: ‘Nene nafwansile, ukuti: Mwemwe malesa?’

³⁵ Ngi wataka amalesa yalye yano yisilwe niswi li Leesa na Maandiko yatangi yononeke,

³⁶ Chene! wino Tata waswefya, wamtuma kuno ukunsi, uwino mwemwe muluti: ulusula, kuno nalile, nti: “Nene Mwana wi Leesa?’

³⁷ Ngi ntaluomba imilimo yi Tata, mutachintaila.

³⁸ Leelo ngi nduwomba, nanti mutantaile nene, tailini imilimo kwene iyo, ukuti mumanye nu kupulika fino Tata ali muti nene, nene ndi muli Tata.”

³⁹ Yasita kaili ukunnema, leelo ayaatina.

⁴⁰ Apita kaili uku mbalama yi Yodani, apantu pano Yoane wali intangulo angi alubatisha, ukuno awikala.

⁴¹ Na antu tupu yaya kuno ali, yafwanga ukuti: “Umwenemo, Yoane atachili achita ichipesha-mano chimwi, leelo fyoshi fino wafwansile Yoane uku ifintu fi, fyali umwenemo.”

⁴² Nali tupu yansumila kweneko.