Yakobo 3 - UPANGANO UPYA

uLulumi

¹ Yachane, mutawa yakasambilizya tupu; kuno mumanyile fino tuluwa nu yanguzi unwamu nkani.

² Kuno swensi tulukumika um-ifintu amaila tupu. Untu wino atalonona un-kufwanga, wiyo untu wa mpomvu, angaukôla nu mwili waakwe wonsi nu kuukolelela.

³ Mulole fino tulutela ifyela uku milomo ya falasi, ukuti situwele fino tukusenula umwili wao onsi.

⁴ Kaili mulole ni meli kwene, nanti fino yakula nkani wa chani nu kusendwa nunza unkomu, ikusenulwa ni chipisizyo chinono nkani, konsi konsi kuno kapisya akasime ukuya.

⁵ Ifino nu lulumi kwene ichai chinono, luli nu kuitensya um-fintu fikulu. Mulole fino moto uche ukulutumula ifunje ikulu.

⁶ Nu lulumi kwene umoto, ilye insi ya uipe. Ululumi luo lwawikwa pakasi ya fyai fitu, nalo lukulukowesya umwili onsi, lukuluwisya imikalo yitu yoshi, lwapembwa uku moto wa jenama.

⁷ Kuno inkala syonsi ni fyuni ni fisela fyonsi ni fya muli yemba fingatekwa, nafyo fyaati fitekwa na antu.

⁸ Leelo ululumi kusi wino angaluteka; luli nu uipe uno utakwikalana lwashula isungwe ya umosi.

⁹ Kuli lwenelo tukulupepa Leesa Tata witu, na kuli lwenelo tukuluyaatipa antu yano yaumvilwe uku kukolana na Leesa.

¹⁰ Um-unnomo onga kwene mukufuma upepelelo ni ntipu. Yachane, ifintu fiyo chitaile ukuwa ndi fiyo.

¹¹ Chene! kafukoka umwilinso lyonga angafumya mansi amanonu na yano yasamba?

¹² Yachane, Chene! unsamvu ungasêka isietuni nanti unsabibu ukusêka amasamvu? Ifino kafukoka atangi afumye amansi ya nsilya na manzi manonu.

AMano aya kufuma umwiyulu

¹³ Uwini pali mwemwe wino ali na mano ya kumanya? Alangizye imilimo yaakwe uku miele yaakwe imizipe umutonsu wa mano.

¹⁴ Leelo ngi mwawa nuzuwa nu lupaka ummyenzo ino, mutachiutensya, nanti ukuvwanga ufi apa chumi.

¹⁵ Amano yao asi yano yalufuma umwiyulu, leelo aya kuno ukunsi, aya ntambi ya uuntu ni yi Chiwa.

¹⁶ Kuno pao pano pali usuwa nu lupaka apano pali ukuvulungana nu uipe tupu tupu.

¹⁷ Leelo amano yano yalufuma umwiyulu, kuluta fyonsi, yasipa kaili aya utekano aya utonsu, yali zuwa ukupulikisya amaswi ya antu, yafyula inkumbu ni visêke vizipe, yatakuwilila, yasi nufi.

¹⁸ Ni chisêke cha mpomvu chikulupelwa um-uwelezyo kuli yalye yano yaluchita ifya kuwelesha.