Uswelulo 9 - UPANGANO UPYA

Ipenga lya usano

¹ Malaika wa usano umi penga; nga nalola ulutanda ukufuma umwiyulu lwapona pansi; lwapiwa ulufungulo lwa chilina cha kuzimu.

² Lwayula ichilina cha kwazimu; ilyunsi lyafuma un-chilina, kunti ilyunsi lya mwilungu ikulu. Uku nnandu wi lyunsi lya n-chilina ilanzi niyulu vyafitokela.

³ Makanta wafuma umwilyunsi liyo, waya kunzi; wapiwa amaka wi kalela lya kuno kunzi.

⁴ Wanenwa kuti atonona isote lya kuno ukunzi, nanti chintu chonsi chisi, nanti chiti chonsi, siku antu yalye yano yatakwite akamanyililo ki Leesa apa mpuma zyao.

⁵ Walesiwa ukuyumola, leelo ayachuzye imyezi isano; nu kuwaya kwao kwali kunti ukuwaya kwa kulumwa ni kalela, pano lyaluma untu.

⁶ Um-manda yao, antu yalusita infwa, leelo yataluilola; yalukumbuka ukufwa, leelo ulufu luluituka.

⁷ Makanta wiyo umwata wali wafalasi zino ziile ukuyulwa isumo; na pa mitwe yao yali ni nkata ikoline ni zaabu, ni vyata vyao vyali wa vyata vya yantu.

⁸ Yali ni nyele wa nyela zya yanachi, na mino yao yali kunti ayi kalangu.

⁹ Nayo yali na matowa apa vifuwa kunti aya vyela, niswi lya mapa yao lyali wiswi lya magali, ya falasi tupu, zino ziile lwilo ukuyulwa isumo.

¹⁰ Yali ni mipimbi wi kalela ni ole, na maka yao a kuchuzya antu imyezi isano, yali uku mipimbi yao.

¹¹ Yali numwene wao, nawe imalaika wa kwazimu; izina lyaakwe uku chiEblania: i-Abadoni, nu ku chiGliki: i-Apolioni.

¹² Akalanda ka ntangulo kasila; lola kuchili akalanda ka uwili kalwiza.

Ipenga lya sita

¹³ Malaika wa sita umi penga; napulika iswi limwi, lino lyafumile um-mpembe zini zya altale ya zaabu, ino ili apa maaso yi Leesa.

¹⁴ Angi lilunena malaika wiwi wa sita, wino wali nipenga, liti; “Yasapule yao yamalaika yani, yano yanyefilwe uku luzi lukulu Eflati.”

¹⁵ Nga yamalaika yani yao yasapulwa, yano yalile yateyanyiwa ku kazimbo ka wanda nu mwezi nu mwaka uo kwene, kuti yumole antu yamwi apa mpendwa ya utatu.

¹⁶ Nu kusolozya apali ponga amaumba yi yakakwela ya falasi yali ielfu amakumi yaili maila ielfu kumi.

¹⁷ Alavi afino nawine ifalasi ziyo, um-malele yane, na yano yakowile apiyulu: yali na matowa makasuke na ya bululu na ya sanku apa vifuwa; ni mitwe ya falasi ziyo yakozile imitwe yi Kalangu, ni milomo yao mulufuma umoto ni lyunsi ni sanku.

¹⁸ Na antu yamwi apa mpendwa ya utatu yumolwa uku vyumo vitatu fiyo: uku moto uo ni lyunsi liyo ni sanku iyo, fino vyafumile um-milomo yao.

¹⁹ Kuno amaka ya falasi ziyo yali um-milomo yao nu ku makanga yao. Kuno amakanga yao yakoline ni nzoka, yali ni mitwe, ukuno yakulumila.

²⁰ Na antu yano yasyalile nanti kupafwila, yatavipezile uku milimo ya makasa yao, kuti yaatize yafukamile mashetani ni vilui vya zaabu ni vyi feza ni vya mbisi ni vya mafinga ni vya viti, fino vitakulola nanti ukupulika nanti ukupita.

²¹ Nga yatavipezile ku umozi wao, nanti uku uwanga wao, nanti uku upundu wao, nanti ku wivi wao.