Uswelulo 8 - UPANGANO UPYA

Akamanyililo ka saba. Yuma mapenga yani

¹ Nga pano wakupula kamanyililo ka saba, kwawa mya umwiyulu, kazimbo kakulu kwene.

² Apano nalola yamalaika saba yano yakulwimilila pali Leesa, nayo yapiwa amapenga saba.

³ Na malaika unji wiza wimilila pa nkolelo ya altale, ali nu lweso lwa zaabu lwa ubani; apiwa ubani tupu kuti autele ponga na mapepo ya aswefiwa yoshi apa altale ya zaabu, ino ili apa nkolelo ya chisumbi-chi-ukulu.

⁴ Ni lyunsi lya ubani uo lisukila apa maaso yi Leesa ponga na mapepo ya aswefiwa ukufuma um-mwikasa lyi malaika.

⁵ Na malaika wiyo watola lweso wazuzya umoto uwa pa altale, wasumba pansi. Kwawa nunkumo na maswi ni nkozyo ni chitentema cha nsi.

⁶ Na yamalaika yalye saba a mapenga saba, yauteyanya kuti yume.

⁷ Malaika wa ntangulo uma ipenga; kwawa insemba ya mafinga nu moto uno vyuminkine nu wazi vyasumbwa apansi: ulusansa lumwi apa mpendwa ya utatu lwa nsi lwatikitila, ni viti vimwi apa mpendwa ya utatu vyaatikitila, nisote itonsu lyonsi lyaatikitila.

⁸ Malaika wa uwili uma ipenga; ni chintu chino chikoline nu mwamba ukulu ulwaka umoto, chasumbwa muli yemba; ulusansa lumwi apa mpendwa ya utatu ulwi yemba lwawa uwazi.

⁹ Ivilengwa vimwi apa mpendwa ya utatu vya muli yemba fino vili nupuma, vyafwa; ni meli zimwi apa mpendwa ya utatu zyononiwa.

¹⁰ Malaika wa utatu uma ipenga; ulutanda ulukulu lwapona ukufuma umwiyulu, kuno lwakanga wi tala, lwaponela inguzi insansa zimwi apa mpendwa ya utatu, na pali yakafukoka ya manzi.

¹¹ Nizina lya lutanda luo i Chalula. Amasi yamwi apa mpendwa ya utatu yawa malule. Na antu tupu yafwa uku manzi yao, kuno yalula.

¹² Malaika wa uni uma ipenga. Insansa zya utatu izilanzi, nu mwezi, ni ntanda zyumika kuti imbali ziyo ziwe ni chanda, imbali ziyo zitachiwala unsanya nanti usiku kwene.

¹³ Nasya nalola, napulika imango yonga ilulelemba umwiyulu, angi ukwiswi ukulu iluti; “Kalanda wee! Kalanda kuli yano yali ukunzi; kuno yamalaika yasyala yatatu ukuma amapenga.”