Uswelulo 7 - UPANGANO UPYA

Yano yatelwa akamanyililo mwIslaeli

¹ Pano vyasila ifintu fiyo, nalola yamalaika yani yimilile un-nsansa zini izya nsi, iyalema imiza ini iyansi, unza utachipunga un-nsi, nanti pali yemba, nanti pa chiti chonsi.

² Apano nalola malaika unji, alukwela ukufuma ku kafumandaka, angi ali na kamanyililo ki Leesa uwa upuma. Alaizya ukwiswi yalye yamalaika yani, yano yapilwe konona insi na yemba.

³ Angi aluti: “Mutachonona insi nanti yemba nanti viti, fika na lino twacha twayatela akamanyililo aomvi yi Leesa witu apa usyu wao.”

⁴ Napulika kusolozya nukuminkana kwi yano yatelwa akamanyililo: kunko zyonsi zya aIslaeli, antu iyelfu mwanda onga na amakumi yani na yani.

⁵ Aluko lwi Yuda iyelfu kumi na ziili yano yatelwa kama-nyililo. Aluko lwi Lubeni iyelfu kumi na ziili. Aluko lwi Gadi iyelfu kumi na ziili.

⁶ Aluko lwi Aseli iyelfu kumi na ziili. Aluko lwi Naftali iyelfu kumi na ziili. Aluko lwi Manasa iyelfu kumi na ziili.

⁷ Aluko lwi Simeoni iyelfu kumi na ziili. Aluko lwi Levi iyelfu kumi na ziili. Aluko lwi Isakali iyelfu kumi na ziili

⁸ Aluko lwi Zebuloni iyelfu kumi na ziili Aluko lwi Yosefu iyelfu kumi na ziili. Aluko lwi Benjamini iyelfu kumi na ziili, yano yatelwa akamanyililo.

Iumba ikulu ya antu yano yafyusiwa

⁹ Apa chisila cha ifintu fiyo nafindamila, nalola iumba ikulu, lino pasi untu angalisolozya, antu ya misangano yoshi, ninko zyonsi, ni mipanda ni mivwango yimilile apa nkolelo ya chisumbi chilye cha ukulu, na pa nkolelo ya Mwana-nfwele, yazwite imyenda mitiswe, yali na makambalala ya mikoma um-makasa yao.

¹⁰ Yalaizya ukwiswi kulu nkani, angi yaluti: “Ufyusi uli kuli Leesa witu wino atenzi pa chisumbi-cha-ukulu nu ku Mwana-nfwele!”

¹¹ Na, yamalaika yoshi yalile iyimilila iyalizya konsi apa chisumbi chiyo icha ukulu, nakombe yao, na ya upuma yani, yapona yafupime apa nkolelo ya chisumbi-cha-ukulu, yafukamila Leesa.

¹² Angi yaluti: “Amina, Upepelelo nukulu na mano ni nsamalizyo nunchinzi nu uposi na maka vili kuli Leesa witu, manda ti na ti! Chiwe fiyo kwene!”

¹³ Wenga pa yakombe yalye wantondosya, waati: “Chene! antu ya yano yazwite imyenda mitiswe, ayawini? Nga yafumile kwi?”

¹⁴ Nene nannena, nati: “Mwene wane, wewe umanyile.” Wanena, waati: “Yao ali yano yafumile um-machulo yalye amakulu; nayo iyafula imyenda yao nu kuiswefya um-wazi wa Mwana-nfwele.

¹⁵ Ichino yali apa chisumbicha-ukulu ichi Leesa, nayo yalumombela unsanya nusiku un-ng'anda yaakwe inkulu; na wino atenzi apa chisumbi-cha-ukulu alukonzolola ihema lyaakwe pali yeneyo.

¹⁶ Yatalulola inzala kaili nanti unsala, nanti ilanzi litaluyocha kaili nanti chilungula.

¹⁷ Kuno Mwana-nfwele wiyo, wino ali apakasi pa chisumbi-cha-ukulu, aluyachema, nawe aluyatungulwila kuli kafukoka wa manzi ya upuma; na Leesa aluyapyila amonsozi yoshi apa maaso yao.”