Uswelulo 6 - UPANGANO UPYA

Mwana-nfwele wavuna utumanyililo

¹ Apano nalola uMwana-nfwele alusapula akamanyililo konga pali tulye saba, napulika kuli wenga pali yalye aya upuma yani aluvwanga ukwiswi wa nnunkumo: “Nguna!”

² Nafindamila, nalola ifalasi intiswe, na wino aikowile ali nu lapwa, wapiwa inkata, nga wafuma ummposi kuti apote kaili.

³ Na pano wasapula akamanyililo ka uwili, napulika uwa upuma wiwi uwa uwili, aluti: “Nguna!”

⁴ Ifuma ifalasi inina inkasuke na wilye wino aikowile wapiwa ukutisya utekano un-nsi, ukuti antu yumolane. Nawe wapiwa impanga inkulu.

⁵ Na pano wasapula akamanyililo ka utatu, napulika wilye uwa, utatu uwa upuma, angi aliiti: “Nguna!” Nafindamila, nalola ifalasi induku, na wino aikowile wali ni chilingilo umwikasa lyaakwe.

⁶ Napulika kunti wiswi apakasi yi yao aya upuma yani, angi liluti: “Intowa ya usu wa ngano uku lupia, ni ntowa zitatu zya makonde uku lupia, nga utachonona mafuta nanti amasi ya mizabibu.”

⁷ Na pano wasapula akamanyililo ka uni, napulika iswi li wilye uwa upuma uwa uni, aluti: “Nguna!”

⁸ Nafindamila, nalola ifalasi ya mala yi vukwa. Na wino aikowile izina lyaakwe infwa, nu kwazimu alondekine nawe. Nayo yapiwa amaka apa lusansa longa ulwa nsi, yumole antu uku mpanga nu ku nzala, ni mpungo nu ku yinyama vya nsi.

⁹ Na pano wasapula akamanyililo ka usano, nalola apansi apa altale, imyenzo yao yano yafyuzilwe uku nnandu wiswi lyi Leesa’ nuku nnandu wa usyuta uno yimikilanga.

¹⁰ Yalila ukwiswi nkulu, yaati: “We Mwene Nswepe uwa chumi, uluzimba fika na li ukulifya ichilanduzi uku yantu akuno ukunzi, uku nnandu wa kumolwa kwitu?”

¹¹ Nayo yapiwa chila wiyo mwenda untali untiswe, yanenwa kuti yatane yakapuze, kwasyala manda mache, fika na lino yacha yafikilila aomvi na chao kwene anina, yano yalumolwa fiyo kwene wa yakola

¹² Nga nalola pano wasapula akamanyililo ka sita, kwawa ichitentema ichikulu un-nsi, ilanzi lyafita wi saka lya mavumbu amaluku, umwezi wonsi wakasuka, wakola uwazi.

¹³ Ni ntanda zya mwiyulu zyapona apansi, ndi fino unsamvu ukululukusya imbozyo zyaakwe, ndi pano unza wapunga.

¹⁴ Iyulu lwatisiwa ndi fino ikalatasi ikupolombwa; ni myamba yoshi ni manda zyonsi visamiwa ukufuma pano vikuwa.

¹⁵ Apano ayene ya nsi, naikolo, na kulu ya asalifi, nasavi, naya maka, na azya yoshi na yakauwele, yafisama ummachele num-mafinga ya myamba;

¹⁶ yanena imyamba na mafinga, yaati: “Tuponelini, tufisini apa maaso yaakwe wino atenzi apa chisumbi-cha-ukulu, na pa chilakali cha Mwana-nfwele.

¹⁷ Kuno uwanda ukulu uwa chilakali chao uwiza, uwini wino angimilila?”