Uswelulo 5 - UPANGANO UPYA

Chitabu nu Mwana-nfwele

¹ Nasya nalola umwikasa lyaakwe ilya kwilunji ilyi wino atenzi apa chisumbi chilye icha ukulu, ichitabu chino chandikwa unkasi nukunzi, chalile chatelwa utumanyililo saba.

² Nalola malaika wa maka alusunda ukwiswi ikulu, ati: “Uwini wino aine ukukupula ichitabu nu kusapula utumanyililo twakwe?”

³ Leelo patali untu mwiyulu nanti ukunzi nanti pansi kwazimu wino angachikupula chitabu chiyo nanti ukuchilolekesya mwenemo.

⁴ Nene nalila nkani, kuno patalolike untu wino aine ukukupula chitabu chiyo nanti kuchilolekesya mwenemo.

⁵ Apano unkombe wenga pali yeneyo wannena, waati: “Utachilila; lola kalangu wa luko lwi Yuda uwa mpanda wi Daudi, wene wapota kuti akupule ichitabu chiyo nu tumanyililo twakwe saba.”

⁶ Nalola apakasi ya chisumbi chilye icha ukulu na yalye aupuma yani na pakasi ya yakombe yalye, umwana-nfwele awimilile, wali kuti atafyulwa, uwa mpembe saba na maaso saba. Nazyo ali Myenzo saba iyi Leesa yino yatumilwe un-nsi yoshi.

⁷ Wiza watola ichitabu chilye umwikasa lyaakwe ilya kwilunji ili wiwi wino watenzi apa chisumbi chilye icha ukulu.

⁸ Nga pano watola ichitabu chilye, yao aya upuma yani na yalye akombe amakumi yaili na yani, yapona apa mulu ya mwana-nfwele. Chila wiyo pali yeneyo wali ni ndona ni ngeso zya zaabu, zino zizyuzile ubani: ali mapepo ya aswefiwa.

⁹ Nayo yalundanga umwimbo mpya, angi yaluti: “Chikuile wewe ukutola ichitabu chiyo nu kusapula utumanyililo twakwe; kuno wafyuzilwe, wakalila Leesa uku wazi wako, antu ya nko zyonsi ni mivwango ni mipanda yoshi na antu tupu.

¹⁰ Wayachita ukuwa uwene na yakapela kuli Leesa witu, nayo yalulâsa ukunzi.”

¹¹ Nga nalola, napulika amaswi yi yamalaika tupu, insansa zyonsi zya chisumbi chilye icha ukulu, ni lyi yalye aya upuma na yi yalye akombe; pali ponga yali maelfu ikumi amaila maelfu ikumi, ni elfu amaila ielfu,

¹² ukwiswi kulu angi yaluti: “Chikuile wewe Mwana-nfwele wino wafyuzilwe, ukupokelela uposi nusavi na mano na maka nu nchinzi nukulu nu pepelelo.”

¹³ Ni vilengwa vyonsi umwiyulu, kuno ukunzi na pansi kwazimu, na pali yemba, ni vilengwa vyonsi vya mwenemo, navipulika, viti: “Upepelelo nu nchinzi nukulu nu uposi vili nawe, wino atenzi apa chisumbi-cha-ukiilu nu Mwana-nfwele, manda ti na ti.”

¹⁴ Na yalye aya upuma yani yaati: “Chiwe fiyo kwene!” Na yalye akombe yapona yafupime yamfukamila.