Uswelulo 4 - UPANGANO UPYA

Malele ya mwiyulu

¹ Apa chisila cha yintu fiyo nalolekesya, nalola unnyango uwuyulika imwiyulu; niswi liyo ilya ntangulo, lino napulike, wiswi lyi penga, liluvwanga nene, liti: “Kwele uwize ku, nene nankulanga ifintu fino viluwako apa chisila cha ifintu fiyo.”

² Liyo kwene nali um-Mweso; nga ndola, ichisumbi-cha-ukulu chawikwa umwiyulu na wenga awikazile apa chisumbi chilye.

³ Na wino awikazile, walolekanga kunti ifinga lya Almasi ni Saldio; nu nnalanfuti ulizizye ichisumbi chilye icha ukulu, angi ululoleka kunti Zumalidi.

⁴ Ni visumbi amakumi yaili na vini vilizizye ichisumbi chilye icha ukulu, na pa visumbi vilye nawine akombe amakumi yaili na yani, yatenzi yazwite imyenda imitiswe, na pa mitwe yao yali ni nkata zya zaabu.

⁵ Nu n-chisumbi chilye icha ukulu mulufuma inkozyo, na maswi nu nunkumo; na yatala saba aya moto yalwaka inkolelo ya chisumbi-cha-ukulu: ali Myenzo saba iyi Leesa.

⁶ Inkolelo ya chisumbi chiyo cha ukulu kwali chimwi chikoline na yemba wa chilole, kunti bilauli. Apakasi ya chisumbi chilye na ku lila kwene yalipo aya upuma yani, yazyula amaso inkolelo ni chisila.

⁷ Na wiyo uwa upuma uwa ntangulo wakoline na kalangu, nu wa upuma uwa uwili wakoline ni ng'ombe, nu wa upuma uwa utatu wali nusyu wa mwata wa ntu, nu wa upuma uwa uni wakoline ni mango, ino ilulelemba.

⁸ Na yao aya upuma yani, chila wenga wali na mapa sita, ni neansa zyonsi nunkasi yazyusile amanso, nga yatakupuza unsanya nusiku, angi yaluti: “Nswepe, Nswepe, Nswepe, uMwene Leesa wa Maka-yonsi, wino walipo na wino alipo, na wino alwiza.”

⁹ Na yao aya upuma pano yalumpa ukulu nu nchinzi ni nsamalizyo, wiwi wino atenzi apa chisumbi-cha-ukulu, wino ali nupuma manda ti na ti,

¹⁰ apano akombe yao amakumi yaili na yani yapona apa maaso yi wiyo wino atenzi apa chisumbi-cha-ukulu, nayo yamfukamila wino ali nupumawa manda ti na ti, nayo yasumba inkata zyao apa nkolelo ya chisumbi chilya cha ukulu, angi yaluti:

¹¹ “Chikuile wewe, Mwene witu na Leesa witu, ukupokela ukulu nu nchinzi na maka; kuno wewe uli wino waumvile ifintu vyonsi, nu ku kukunda kwako vyalipo, navyo vyalengwa.”