Uswelulo 18 - UPANGANO UPYA

Kupona kwi Babeloni

¹ Ichisila cha ifintu fiyo, nalola malaika inji alwika ukufuma umwiyulu, uwa maka tupu. Ni nsi yaswepa uku kuyengesa kwakwe.

² Alaizya ukwiswi kulu, ati: “Wati kuwaa! Waati kuwaa! Babeloni unzi nkulu, wawa mikalo ya mashetani na pa kunyepela imyenzo yoshi imiipe ni ya vyuni vyonsi viipe, ivya utakati,

³ kuno antu yoshi yanwa isute lya ukali wa upundu wakwe, na aene ya nsi yachita upundu nawe, na achuluzi yansi yasaila insao ku maka ya kuzalangana kwakwe.”

⁴ Nga nasya napulika iswi linina ukufuma umwiyulu, liluti: “Tinini kunali mwe yantu yane, kuti mutuminkana nawe um-maifyo yaakwe, mutize muminkanyiwe ni vilumbelo vyaakwe.

⁵ Kuno amaifyo yaakwe yafika nu mwiyulu kwene; na Leesa watelengula amaifyo yaakwe.

⁶ Innipini ndi fino nawe kwene walipanga. Mpini luwili ukuyana ni milimo yaakwe. Ulwako luno waatikanyizizye uluno muntikanyizizyini luwili.

⁷ Ndi fino wautensyanga nu kuwa ni mvimbi, ifino mpini machulo na amalanda. Kuno um-mweso waakwe aluti: ‘Nikala wa mwene mwanachi, insi wa msimbe, ntalulola malanda nanti uche.’

⁸ Ichino fiyo ivilumbelo vyaakwe vilwiza apa wanda onga: infwa nu kulosya ni nzala, nawe alusikisa pyu um-moto. Kuno Mwene Leesa uwa maka uwino wamputwila.”

⁹ Na ene ya nsi yano yachitanga upundu nawe nu kuwa ni mvimbi, yalulila nu kunnosezya, pano yacha yalola ilyunsi lya kupya kwakwe.

¹⁰ Angi yimilile lwa patali uku ngofi zya kuwaya kwakwe, angi yaluti: “Kalanda we! Kalanda we! unzi ulye nkulu, Babeloni, unzi ulye uwa maka, kuno uku kazimbo konga, uputuzi wako uwiza!”

¹¹ Na achuluzi ya nsi yalulila nu kunnosezya, kuno kutaluwa untu uwa kuti akale ifintu vyao kaili.

¹² Isaabu na feza na mafinga ya mpia tupu ni lulu ni myenda intelepwe, ni myenda ya mala ya zambalau, ni myenda ya alili, ni myenda imikasuke, ni viti vyonsi ivya udi, ni chivya chonsi icha mpembe zya nzovu, ni vivya vyonsi ivya viti vya mpia tupu ni vya mbiisi ni vya chela ni vya mamali.

¹³ Nu ndalasini ni iliki na mafuta ya ubani ni manemane nu udi na manzi ya mizabibu na mafuta na usu nzipe, ni ngano ni ng'ombe ni nfwele ni falasi na magari yao, ni myili ni myenzo ya antu.

¹⁴ Ni visêke fino umweso wako wakumbukanga ivikutina, ni ifintu vyonsi ifinonu ni vya usavi ivikupona, utalusya uvilole kaili.

¹⁵ Na achuluzi ya ifintu fiyo yano yasaila insao kunali, yalwimilila lwa patali, uku ngofi zya kuwaya kwakwe, angi yalulila nu kulosya,

¹⁶ angi yaluti: “Kalanda wee! Kalanda wee! unzi nkulu ulye, uno wazwalanga imyenda intelepwe, ni myenda ya mala ya zambalau, ni myenda imikasuke, nu kuyemba isaabu na mafinga ya mpia tupu ni lulu.

¹⁷ Kuno uku kazimbo konga insao tupu ndi iyo itilowa.” Na nahoza wensi na wensi wino akupitila itanga konsi na konsi, na mabahalia, na yoshi yano yakuomba unnimo muli yemba, yimilila ukutali.

¹⁸ Yalaela leka pano yalola ilyunsi lya kupya kwakwe, yaati: “Unzi chi uno ukoline nunzi nkulu u?”

¹⁹ Nga yatutunsya inkungu umwiyulu, apa mitwe yao, yalila na monsozi nu kulosya, angi yaluti: “Kalanda wee! Kalanda wee! unzi nkulu ulye uno muli weneo yoshi yano yali ni melikebu muli yemba yasaila insao uku usavi wakwe, kuno uku kazimbo konga uuwa.”

²⁰ Chimbini mwe iyulu, nemwe yaswefiwa ni mitume na malau, kuno Leesa watalandula unnandu wino kunali.

²¹ Nga malaika umwi uwa maka anyetula ifinga, ifinga ikulu ungati ulya kusyila, alisumbila muli yemba, angaluti: “Babeloni, unzi nkulu ulye, ulusumbwa uku maka ndi kuti vi, utalusya uloleke kaili nanti uche.

²² Nanti unnilo wa vinanda nu wi yakuma ya ndona nu wi yakuma ya mpilimbi, na yakuma ya mapenga italusya ipulikikwe muli wewe nanti uche kaili; nanti kamanya wa nnimo umwi wonsi atalusya aloleke muli wewe nanti uche kaili, nanti ukupulikikwa iswi li finga lya kusyila muli wewe nanti uche.

²³ Nanti umwengelela wi tala utalukozya kaili muli wewe nanti uche, nanti iswi li siwinga nanti nawinga litalupulikikwa kaili muli wewe nanti uche. Kuno achuluzi yako yali akulu ya nsi, kuno antu yoshi yazosiwe uku wanga wako.

²⁴ Nga munali mwalolike uwazi wa malau nu wa yaswefiwa nu wi yalye yoshi yano yumozilwe kuno ukunzi.