Uswelulo 16 - UPANGANO UPYA

Ivilumbelo saba

¹ Nga napulika iswi kulu lifumile un-ng'anda-nkulu-iyi-Leesa, angi lilunena yamalaika yalye saba, liti: “Yangini mukitilile ingeso zilye saba zya ukali wi Leesa un-nsi.

² Nga uwa ntangulo uwitilila lweso lwakwe un-nsi. Kwawa nachuse unjipe aluwaya uku yantu yalye, yano yali na kamanyililo ka nkala ilye na yalye yano yalufukamila ichilui chakwe.

³ Nu wa uwili witilila ulweso lwakwe pali yemba. Wawa uwazi ungati uwazi wa ntu wino watafwa, ni ifintu vyonsi ivya upuma muli yemba vyafwa.

⁴ Nu wa utatu witilila ulweso lwakwe apa nguzi na pali yakafukoka ya manzi, nga vyawa uwazi.

⁵ Napulika malaika wa manzi, aluti: “Wewe uli wa chumi, we wino uliko na waliko, we Nswepe, uku uputuzi u.

⁶ Kuno yisile uwazi wa aswefiwa nu wi yakalauzya, newe wayapa uwazi yaunwe; kuno chiyaile!”

⁷ Nga napulika ialtale, iluti: “Endita, Mwene Leesa wa Maka-yonsi, uputuzi wako uwa chumi nu wa mpomvu.”

⁸ Nu wa uni nawe witilila ulweso lwakwe api lanzi. Lyapiwa ukocha antu nu moto wakwe.

⁹ Antu yapya iviipe, nayo yatuka izina lyi Leesa, wino ali na maka ku vilumbelo fiyo, nga yatachili yavipele, kuti yamtensye.

¹⁰ Apano uwa usano witilila lweso lwakwe apa chisumbicha-wene wa nkala iyo. Ichanda chalimba uwene wakwe; yatafuni ndumi zyao kuno chawaisya.

¹¹ Yatuka Leesa wa mwiyulu, kuno chawaisya na kuli vya nachuse vyao. Nga yatavipezile kuli fino yachita.

¹² Apano nu wa sita witilila ulweso lwakwe unduzi lulye ulukulu Eflati. Amasi yaakwe yakama, ukuti inzila iteyanyiwe uku yene ya kukafumandaka.

¹³ Nalola imyenzo itatu iya viwa ikoline na chula ifumile umu nnomo wa chizoka chilye, numu nnomo wa nkala ilye numu nnomo wi kalauzya wilye uwa ufi.

¹⁴ Iyo ili myenzo ya mashetani, ikuluchita ivilangizyo, ilufuma nu kuila yene ya nsi yoshi, nu kuyakonganika ukwisumo lya wanda ulye ukulu wi Leesa wa Maka-yonsi.

¹⁵ “Lola ndwiza wa mwivi. Inkata yaakwe wino aluchesya nu kusunga imyenda yaakwe, kuti atapita tupu, antu yalole ivya nsoni zyaakwe.”

¹⁶ Yayakonganika pali ponga apantu pano uku chiEblania yakuluti: Ala-Magedoni.

¹⁷ Nu wa saba witilila ulweso lwakwe apiyulu. Iswi kulu lyafuma un-ng'anda-nkulu-iyi-Leesa, un-chisumbi chilye icha ukulu, liti: “Ichiombeka.”

¹⁸ Kwawa inkozyo na maswi nu nunkumo wa nsemba, kwawa ni chitentema ichikulu cha nsi, chino chitachili chiweko fuma lino antu yatenzi un-nsi; kutachili kuloleke ichitentema ichikulu ndi chiyo.

¹⁹ Apano unzi nkulu ulye walepuka patatu, ni mizi ya antu yakulukuwa yapona, na Babeloni unzi nkulu, utalatilwe na Leesa, waunwesizye ulwako lwi sute lya chilakali cha ukali wakwe.

²⁰ Imânda zyonsi zituka ni myamba kwene italolike kaili.

²¹ Insemba iya mafinga makulu yano kunwama kwakwe yali kilo amakumi yasano kuli lyonga, yatonyela antu kufuma mwiyulu. Antu yatuka Leesa uku nnandu wa chilumbelo chikulu cha nsemba ya mafinga, kuno ichilumbelo chiyo chakuzile nkani.