Uswelulo 15 - UPANGANO UPYA

Ingeso saba zya ukali wi Leesa

¹ Nasya nalola ichilangizyo ichinina ichikulu icha i kuzunguka umwiyulu: Yamalaika saba aya. vilumbelo saba ivya kumalila, kuno um-ifintu fiyo ukali wi Leesa iufikilila.

² Nga nasya nalola chimwi chikoline na yemba wa chilole auminkine nu moto, na yalye yano yaposile yafuma uku nkala ilye nu ku chilui chakwe, nu ku kuminkana kwizina lyaakwe, yalile iyimilila umbali mbali yi yemba wiyo uwa chilole, angi yali ni ndona zyi Leesa.

³ Angi yalulunda umwimbo wi Mose umuofi wi Leesa, nu mwimbo wa Mwana-nfwele, angi yaluti: “Imilimo yako imikulu ni ya kuzunguka, we Mwene Leesa wa Maka-yonsi; inzila zyako zyololoka na kaili izya chumi, we Mwene wa nko!

⁴ Uwini wino atalukopa nanti ukulumbanya izina lyako? Kuno wewe wenga uli Nswepe. Kuno antu yoshi yalwiza panuli nu kukufukamila, kuno imilimo yako iya chumi yamanyika.”

⁵ Ichisila cha ifintu vi, ndola ing'anda-nkulu-iyi-Leesa iya nsaka ya usyuta iyuzilwe umwiyulu.

⁶ Na yamalaika yalye saba aya vilumbelo saba yafuma un-ng'anda-nkulu-iyi-Leesa, angi yazwite imyenda imitiswe iluswepa, angi apa vifuwa vyao yanyefile imikowa ya zaabu.

⁷ Nga wenga pali yalye aya upuma yani, apa yamalaika yalye saba ingeso saba zya zaabu, angi zizyuzile ukali wi Leesa uwa upuma manda ti na ti.

⁸ Ngi ng'anda-nkulu-iyi-Leesa izyula ilyunsi lya ku ukulu wi Leesa nu posi wakwe. Nga kutali untu wa kuti angamwingila mwenemo un-ng'anda-iyo-inkulu, fika na lino ivilumbelo saba ivyi yamalaika yalye saba vyafikilila.