Uswelulo 14 - UPANGANO UPYA

Mwana-nfwele na yano yakululwa

¹ Nga nasya nalola uMwana-nfwele awimilile pa mwamba wa Sioni, na antu umiwanda na makumi yani na yani ielfu yali ponga nawe, yano yali nizina lyaakwe nizina lyi Isi lyandikwe pa mpuma zyao.

² Nene napulika iswi kufuma umwiyulu, kunti iswi lya manzi tupu na kaili kunti iswi lya nnunkumo unkulu. Niswi liyo lino napulike, lyali kunti iswi li yakuma ya ndona, yaluma indona zyao;

³ nu kulunda mwimbo upya apa chisumbi-cha-ukulu na pali yalye yani ya upuma, na kombe yalye; nga kutali umwi angausambilila mwimbo uo, siku yalye mwanda onga na makumi yani na yani ielfu, yano yakazilwe un-nsi.

⁴ Ali yano yatachili yemane na yanachi, kuno yali wa yalumendo. Antu ya ayano yalulondela Mwana-nfwele konsi kuno aluya. Wene yakalwa unjantu, yawe antomolo kuli Leesa nu ku Mwana-nfwele.

⁵ Nu milomo yao mtachili mufume ufi; yatali nanti ndema.

Imbila i yamalaika yatatu

⁶ Apano nalola malaika unji aluluka umwiyulu apakasi, ali niswi-zipe lya manda ti. Asunde iswi li kuli yano yatenzi un-nsi na antu yoshi ninko zyonsi ni mivwango yoshi ni mipanda yoshi.

⁷ Wavwanga niswi ikulu, ati: “Chindikini Leesa nu kumtensya, kuno ilifika ilya uputuzi waakwe uwa milandu, mfukamilini wino wachisile iyulu ninsi na yemba na yakafukoka ya manzi.”

⁸ Apano nunji, malaika wa uwili, walondela, angi aluti: “Ukupona, ukupona, Babeloni, unzi filye unkulu, kuno wanwesya antu yoshi isute lya ukali wa upundu wakwe.”

⁹ Nunji, malaika wa utatu, wayalondela, angi aluvwanga ukwiswi ikulu. ati: “Untu wensi ngi wafukamila inkala iyo ni chilui chakwe, nu kuwikwa akamanyililo apa mpuma yaakwe, nanti ukwikasa lyaakwe,

¹⁰ nawe kwene alunwa isute lya chilakali chi Leesa, lino litatikine na manzi, undwako lwa ukali wakwe; nawe aluchula um-moto ni sanku apa maaso yi yamalaika yaswepe na pa maaso ya Mwana-nfwele.

¹¹ Ni lyunsi lya kuwaika kwao lilukwela uniwiyulu manda ti na ti. Yasi nupuzilo usiku nu nsanya, yao yano yalufukamila inkala iyo ni chilui chakwe, na wensi wino wapokelela akamanyililo kizina lyaakwe.”

¹² Alapa ali pakutekela kwa aswefiwa, yao yano yalemile ivilangaso vi Leesa, nusumilo muli Yesu.

¹³ Napulika iswi ukufuma umwiyulu, liluti: “Wandika, uti: Inkata yao afwi yano yalufwa um-Mwene fuma kasalaka. Kuno Mweso aluti: ‘Yakapuze pano machulo yao yasila, kuno imilimo yao iyalondile.’ ”

Imboto

¹⁴ Apano nafindamila, nalola ipufi itiswe, na pipufi liyo atenzi-po wino akoline nuntu, ali ni nkata ya zaabu apa ntwe waakwe nu mwikasa lyaakwe muli chele chikalipe.

¹⁵ Na malaika unji afuma un-ng'anda-nkulu-iyi-Leesa, angi alunnaizya ukwiswi kulu wilye wino watenzi apipufi lilye, ati: “Tela ichele chako ukumbule, kuno ichifika ukukumbula, kuno ivyulya vyansi ivicha.”

¹⁶ Nga wino atenzi apipufi asumba ichele chakwe un-nsi, ni vyulya vyansi vyakumbulwa.

¹⁷ Apano malaika unji afuma un-ng'anda-nkulu-iyi Leesa ino ili umwiyulu, nawe kwene ali ni chele chikalipe.

¹⁸ Na malaika unji wafuma um-altale ilye wino ali na maka uku moto. Nawe wannaizya ukwiswi kulu wilye uwa chele chilye chikalipe, ati: “Twala ichele chako ichikalipe, usikule ivisêke vya nzabibu wa nsi, kuno imizabibu yaakwe iticha.

¹⁹ Malaika wilye asumbila ichele chakwe un-nsi, wasikula imizabibu yansi, waisumbila imizabibu un-chilina ichikulu cha kukamila icha ukali wi Leesa.

²⁰ Ichilina cha mizabibu chalyaatilwa ukunzi ya nzi, uwazi wafuma un-chilina cha mizabibu, uzyula nu kufika apa milomo ya falasi, utali wa kilometa myanda itatu.