Uswelulo 12 - UPANGANO UPYA

Mwanachi ni chizoka

¹ Ni chilangizyo chikulu chalolike umwiyulu: umwanachi wino wazwite ilanzi, nu mwezi wali apisika apa mulu yaakwe, na pa ntwe waakwe inkata ya ntanda ikumi na ziili.

² Nawe wala pa kulu, angi alulila, uku nnandu wa mbuza nu kuwaika kwakwe.

³ Chaloleka ichilangizyo chinina umwiyulu, ichizoka ichikulu ichikasuke, chali ni mitwe saba ni mpembe ikumi, na chila ntwe wali ni nkata.

⁴ Nu mpimbi waakwe ulukwekwesa intanda zimwi pa zya utatu izya mwiyulu nu kuziponya apansi un-nsi. Ni chizoka chilye chimilila apa mwanachi wilye, wino watafika kuti apape, ukuti ali alupapa chimile umwanakwe.

⁵ Nawe wapapa umwana umonsi, wino aluchema akulukuwa yoshi uku ntuwa ya chela. Nu mwanakwe asendwa zuwa fika kiili Leesa nu ku chisumbi chakwe icha ukulu.

⁶ Umwanachi wilye awitukila un-nyika, kuno kuli pano Leesa wateyanya ukuti alyisiwe kweneko amanda ielfu ni myanda ili na makumi sita.

Chizoka chapotwa

⁷ Kwali sumo mwiyulu: Mikaeli na yamalaika yaakwe yalwanga ni chizoka chilye; ni chizoka nacho yalwanga ponga na yamalaika yaakwe,

⁸ nayo yataposile nanti uwikalo wao utalolike kaili umwiyulu.

⁹ Ichizoka chilye chikulu chasumbwa un-nsi, chizoka cha kali chino yakuluti Chiwa na Shetani, wino akuluzosya insi yoshi. Wasumbwa pansi na yamalaika yaakwe yasumbwa ponga nawe.

¹⁰ Napulika iswi ikulu mwiyulu, liluti: “Wene nga kwawa ufyusi na maka nu wene wi Leesa witu, na maka yi Klisto wakwe; kuno watasumbwa apansi kasongelela wa yachitu, wino akuluyasongelela pali Leesa witu, unsanya nusiku.

¹¹ Nayo yampota uku wazi wa Mwana-nfwele nu kwiswi lya usyuta wao, yano yatakunzile upuma wao fika nu kunfwa.

¹² Ichino chimbaini mwe mayulu, nemwe yano mutenzi mwenemo. Akalanda ka nsi na yemba kuno Chiwa wilye atiika kuno muli, ali ni chilakali nkani; amanyile fino manda yaakwe yali mache sile.”

Chizoka chazunya umwanachi

¹³ Ni chizoka chilye pano chalola fino chasumbwa un-nsi, chazunya mwanachi wilye wino wafiile mwana monsi.

¹⁴ Mwanachi wilye wapiwa amapa yaili aya mango yiyi inkulu, kuti awuluke apite undusanga, kuno wateyanyiwe pano alulyisiwa uku mpinda ni mpiinda na pakasi ya mpinda, ukutali ni chizoka chiyo.

¹⁵ Apano chizoka chaluka amasi, wa luzi, ukufuma un-nnomo waakwe ku chisila cha mwanachi wiyo, kuti chintuwizye un-nuzi luo.

¹⁶ Insi yazwilizya mwanachi wiyo, insi yasama unnomo wakwe, yamila uluzi luo, luno chizoka chifumizye un-nnomo wakwe.

¹⁷ Ichizoka chalakalikila mwanachi wiyo, chaya ukuyulwa isumo na ana ya mwanachi yano yasile, yano yachindika ivilangaso vi Leesa nu kulemasya usyuta wi Yesu.

¹⁸ Apano chimilila umbali yi yemba.