Uswelulo 10 - UPANGANO UPYA

Malaika ni chitabu chinono

¹ Nga pano nalola malaika unji uwa maka, alwika ukufuma mwiyulu, azwite ipufi nu nnalanfuti apa ntwe wakwe, nusyu waakwe wali wilanzi, na mulu yaakwe wa nzyiko zya moto.

² Nu mwikasa lyaakwe wali ni chitabu ichinono ichikupulwa. Wawika ikulu lyaakwe ilya kwilunji pali yemba ni lyi kamani apansi.

³ Nawe walaizya ukwiswi kulu, ndi fino kalangu akulung'onta. Na pano walaizya, iming'onto iyo saba yapulikikwa.”

⁴ Na pano iming'onto saba yapulikikwa, nalile ntiteyanya ukwandika. Nene napulika iswi ukufuma umwiyulu, liluti; “Tela akamanyililo amaswi yao yano yatakwa ni ming'onto saba, fisa, utachiyandika.

⁵ “Na malaika wilye wino nawine awimilile pali yemba nunsi, wakatusya ikasa lyaakwe lyilunji umwiyulu,

⁶ walapa kuli wiwi uwa upuma manda ti na ti, wino waumvile iyulu ni ifintu fino vili mwenemo, ninsi ni ifintu fino vili mwenemo, na yemba ni ifintu fino vili mwenemo, nukuti: “Kutalusya kuwe manda ndi vi vyonsi vyasila.

⁷ Leko um-manda yiswi li malaika wa saba, pano wacha wuma ipenga, apano amelengwe, yi Leesa yalufikilila, ndi fino wanenile aomvi yaakwe yao yakalauzya.”

⁸ Niswi lilye lino napulike ukufuma umwiyulu, lyavwangile nene kaili, angi liluti: “Yanga, ukatole ichitabu chilye chino chikupwilwe umwikasa li malaika wiyo, wino awimilile pali yemba ninsi.”

⁹ Apano naya kuli malaika wiyo, nannena ukuti: ampe ichitabu chiyo ichinono. Nawe wannena, waati: “Chitole, uchilye, nacho chikukuwaya unda yako, leelo un-nnomo wako chamwa chanona wa uchi.”

¹⁰ Apano nachitola ichitabu chilye ichinono umwikasa li malaika wilye, nachilya, nacho chanonelela wa uchi un-nnomo wane Napano nachilya unda mwambwaya.

¹¹ Yannena, yaati: “Chikuile ukulauzya kaili apa yantu tupu ninko ni mivwango na pa ene.”