Milimo 7 - UPANGANO UPYA

Stefano wasunda

¹ Kapela-nkulu afwanga, ati: “Chene! amaswi ya ifino yali?”

² Nawe ati: “Yachane na yatata yane, pulikisyini. Leesa wa ukulu wauswelwile kuli tata witu Ablaamu, pano wali uku Mesopotamia, pano achili awikale uku Alani.

³ Wannena, waati: ‘Tina un-nsi yako na pa luko lwako, uye ukunsi ino nankulanga.’

⁴ Apano waatina umunsi ya yaKaldeo, awikala uku Alani. Atina kweneko pano isi wafwa, Leesa wamsamisha insi i ino mwemwe mutesi mwenemo li kwene.

⁵ Atampile upyani nanti pamwi apa kulyata amulu yaakwe, annanya fino alumpa ailâse na ana yaakwe aya ku chisila, pano achili awe nu mwana.

⁶ Leesa wavwanga ukuti anakwe yaluwa eni un-nsi ya yantu yanji, nayo yaluyachita azya yao, nu kuyachitila iviipe uku myaka myanda inni.

⁷ Na antu yano yacha yayachita usha, nene nduyaputwila unnandu, ifino Leesa wavwanzile: ‘Ni chisila cha ifintu vi yalufuma, nga yalumbombela mu kwene.’

⁸ Nga ampa Upangano wa kuchita untu ichibalu; nga Ablaamu avyala Isaka, amchita ichibalu uwanda wa nnane. Isaka avyala Yakobo, Yakobo avyala yatata-kulu itu ikumi na yaili.

⁹ “Yatata-kulu itu yasuwila Yosefu yamkazya kuti aye uku Misili, leelo Leesa wawa ponga nawe.

¹⁰ Wamkulula um-uchuzi waakwe onsi, ampa inkumbu na mano apa maaso yi Falao, mwene wa Misili; nawe ampa kuti alâse insi ya Misili, ni ng'anda yaakwe yoshi.

¹¹ Ngi nsala ipona un-nsi yoshi iya Misili nu ku Kanani, na machulo tupu, nga yatata-kulu itu yatapasile ichakulya cha kuikusya.

¹² Nga lino Yakobo wapulika fino uku Misili ifyakulya vili kweneko, atuma yatata-kulu itu ilya ntangulo.

¹³ Nga pa lya uwili Yosefu aumanyisya uku yachakwe; anina i Yosefu yamanyika kuli Falao.

¹⁴ Yosefu atuma antu ukuyuwita Yakobo isi nanina yaakwe yoshi kwene, antu amakumi saba na yasano.

¹⁵ Nga Yakobo apita ukuya uku Misili, wene afwila kweneko, na yatata-kulu itu.

¹⁶ Yasendwa ku Syikemu yasyikwa umwilindi lili lino Ablahamu wakazile uku yana yi Emoli uku Syikemu, uku mpangila wa mpia.

¹⁷ “Nga pano amakati ya ulanyo uno Leesa wapile Ablaamu yapalamila, antu yaya yawa ainji, nu kufulisha uku Misili.

¹⁸ Apalinji umwene unji wakatuka un-nsi ya Misili, wino atamanyile Yosefu.

¹⁹ Wene wachita uchenjesu uipe apa antu itu nu kuchitila yatata itu ifiipe, ayanena uku maka, yasumbe utwana twao utunya, kuti tutakula.

²⁰ Amanda yao kwene Mose afyalwa, nawe wali unsipe pali Leesa. Alelwa imyeshi itatu un-ng'anda yisi.

²¹ Nga lino yansumba, umwana wi Falao antola, annela wa mwanakwe unkola.

²² Mose walangililwe amano yoshi aya Misili, awa na maka uku maswi ni milimo.

²³ “Imyaka yaakwe pano yafika amakumi yani, um-mweso waakwe akunda ukuyulola achakwe, aIslaeli.

²⁴ Alola wenga wino ataonelwa; amtula, wannandwila kuli wino wammonile, aumisya ndi mMisili wiyo.

²⁵ Watangi achakwe yammanya fino Leesa wayapa ufyusi ukwikasa lyaakwe; leelo yatamanyile.

²⁶ Uwanda wa uwili aya kuno yali pano yalulemanila, asita ukuyapulikanya, ati: “Yatata, mwe yali yonga; uku chani mululemanila?”

²⁷ Leelo wino wapatike uwachakwe, amtenkela ukutali, ati: “Uwini wino wakuwika wikolo na katasha witu?

²⁸ Chene! ulusita ungumole ndi fino iyulu wumoshile um-Misili wiwi?”

²⁹ Ukwiswi liyo Mose wituka, waya wikala icha weni un-nsi ya Midiani. Wafyala ana yaili kweneko.

³⁰ “Nga pano yapita imyaka amakumi yani, malaika aloleka kunali undusanga lwa mwamba wa Sinai, un-chenje cha moto, chino chakanga un-katûtu.

³¹ Mose pano waulola, azunguka uku malele yao; nga pano wapalamila kuti alole, iswi lya Mwene lwamwizila.

³² Lyaati: ‘Nene ndi Leesa wi yaso yako, Leesa wi Ablaamu nu wi Isaka nu wi Yakobo.’ Mose atetema, chimpota nu kulolekesya.

³³ uMwene wannena, waati: ‘Zula infwato uku mulu yako, kuno apantu pa pano uwimilile, insi iswepe.

³⁴ Pano ntilola amachulo ya yantu yane yano yali uku Misili, ntipulika kupemela kwao, nene nika kuti njatule. Ichino nguna, nankutuma uku Misili.’

³⁵ “Mose wino yakanile, yaati: ‘Uwini wino wakuwika wikolo na katasya witu?’ Uwino watumilwe na Leesa ukuwa unkulu na Katula, uku nzila i malaika wino walolike kunali un-katûtu.

³⁶ Wiyo uwino wayafumisha, achita vipezya-mano ni vilangisho un-nsi ya Misili na kuli yemba wi Syamu, nu ndusanga imyaka amakumi yani.

³⁷ Mose wiyo wino wanenile aIslaeli, ati: ‘Leesa alumwimikila kalausha apa achino, ndi fino nene.’

³⁸ Wene uwino wali api kanisa undusanga, ponga na malaika wiwi wino wavwanzile nawe uku mwamba wa Sinai, na kaili ponga na yatata itu; uwino wapokelile amaswi ya upuma, kuti atupe sweswe.

³⁹ “Untu wiyo yatata yatakasime ukumchindika, yamkankila ukutali, ni myeso yao yasuwila uku Misili.

⁴⁰ Yanena Aloni, yaati: ‘Utuchitile yalesa, yakuti yantukolelela, kuno Mose wiyo wino watufumizye ukunsi ya Misili, tutamanyile ngi wazanwa na chani.’

⁴¹ Apa manda yao kwene yachita indama, yaleta inzui uku chilui chiyo, yachimbila unnimo wa makasa yao.

⁴² Leelo Leesa wafwitoka, wayata kuti yaombele iumba lya mwiyulu, ndi fino chaandikwe un-chitabu cha malau: ‘Chene! mwanfimile ni vipelo nu wila imyaka amakumi yani undusanga, mwe ng'anda ya Islaeli?

⁴³ Nemwe mwasensile ihema li Moloki, nu lutanda lwi leza Lefa, vilui fino mwachisile kuti muvifukamile. Nene ndumusamya ukutali ukuluta Babeli.’

⁴⁴ “Ihema-lya-usyuta lyali ponga na yatata itu undusanga, ndi fino wene wakomelizye, wino wafwansile na Mose ukuti achite likolane na lino wawine.

⁴⁵ Lino yatata itu uku kupokezyanya yalifisya ponga na Yoswa un-nsi ya akulukuwa, yano Leesa wawingile apa maaso iyatata itu, fika na pa manda yi Daudi.

⁴⁶ Wino wakundikwa apa maaso yi Leesa, nawe walomvile kuti ampe Leesa wi Yakobo amikalo.

⁴⁷ Leelo Salomoni wamkulile ing'anda.

⁴⁸ Leelo Wa-Mwiyulu atakwikala un-ng'anda zino zyakuzilwe uku makasa. Ndi fino kalauzya avwanzile:

⁴⁹ ‘Iyulu ichisumbi chane icha ukulu; ninsi apa kuwika mulu yane. Ing'anda uli yino mulunkulila?’ Ifino afwansile uMwene,

⁵⁰ ‘Nanti api pano ndupuza? Asi ikasa lyane lino lyachisile vyonsi vi?’

⁵¹ “Mwemwe yatalamanu musi yachite ichibalu ummyenzo nanti um-makutwi; manda yoshi mukupingula uMweeso Nswefu. Ndi fino yaso ino yachisile, nemwe kwene iviyo kwene.

⁵² Apa malau uwini wino yaso yatazunyile? Yumozile na yano yalawizye ukwiza kwakwe uwa-Chumi, wino mwemwe kaili mwamfima nu kumumola.

⁵³ Mwemwe yano mwapokelile iNtambi uku kutumiliziwa na malaika, leelo mutailema.”

Yumola Stefano

⁵⁴ Walangi pano yapulika amaswi yao, yayatota ummyenzo, yannumila inchechete uku mino.

⁵⁵ Leelo wene azyula Mweso Nswefu, asimpa amaso yaakwe umwiyulu, alola ukulu wi Leesa, na Yesu angi awimilile ukwikasa lya kwilunji li Leesa.

⁵⁶ Ati: “Lolini, nalola iyulu lyayulika nu Mwana-ntu awimilile ukwikasa lilunji ili Leesa.”

⁵⁷ Yumi chongo uku maswi makulu, yayala amakutwi yao, yanvulumkila icha ponga.

⁵⁸ Yamfumisha ukushi ya si, yantama na mafinga. Na yasyuta yawika imyenda yao apa mulu ya unnumendo wenga, wino yatangi Saulo.

⁵⁹ Nga yamtama Stefano na mafinga; nawe apepa, ati: “Mwene Yesu, pokelela umweso wane.”

⁶⁰ Nga afukama, alila ukwiswi kulu, ati: “Mwene, utayawikila unnandu u.” Pano wavwanga vi, annala ukunfwa. Na Saulo wazumilizye ukufwa kwakwe.