Milimo 6 - UPANGANO UPYA

Aswilisi saba aya mitume

¹ Nga manda yalye pano alondeshi yatampa ukuvula, aYudea ya chiGliki yasumbikila aEblania, kuno anachi yao yano afwilwa, yalatilwa um-wankanyo wa manda yoshi.

² Ngi kumi na yaili yaya yita iumba lya alondeshi, yaati: “Chitazifile kuti sweswe tusye iswi li Leesa nu kwangalila apa meza.

³ Ichino yachitu, tusolole antu saba muno muli, yano yalumbuka um-vizipe, nayo yazyula uMweeso na mano, ukuti tuyawike apa milimo yi.

⁴ Neswe twankonka ukupepa nu kuombela iswi.”

⁵ Ngi swi liyo lisipa apa maaso yiumba lyonsi, yasolola Stefano, untu wino wazyula usumilo nu Mweso Nswefu, na Filipo na Plokola, na Nikanoli, na Timoni, na Palmena, na Nikolao unndondeshi wa chiYudea uwa ku Antiokia.

⁶ Ayano imika apa mitume, nga pano yapepa, yayawikila amakasa apa mitwe.

⁷ Ngiswi li Leesa lilimba n alondeshi yavulisya um-Yelusalemu, apalinji na yakapela tupu yachindika usumilo uo.

Stefano walemwa

⁸ Nga Stefano wino washula inkumbu na maka, wachita ifipesha-mano ni filangisho ivikulu unjantu.

⁹ Leelo kuloleka yamwi yano yatangi: ing'anda-yi-Leesa ya antu yakuluti aLibetino, na aKilene na a ku Aleksandlia, na ya ku Kilikia nu ku Asia, yafuma ukupazyana na Stefano.

¹⁰ Nga yatachili yapote amano nu Mweso uno wavwangaa nawe.

¹¹ Apalinji yaleta antu anji yano yaatile: “Tumpulike untu wi wavwanga amaswi ya kusula Mose na Leesa.”

¹² Nga yasongelekanya antu, nakombe na yakaandika, yanjila yannema, yantwala umwitengo.

¹³ Nga yimika yasyuta ya ufi yano yaatile: “Untu wi ataluta ukuvwanga amaswi ya misalula uku pantu paswefu nu ku Ntambi.

¹⁴ Kuno twampulika aluti Yesu wa ku Nazaleti alonona apantu pa nu kusenula intambi zino Mose watupile.”

¹⁵ Antu yoshi yano yateshi umwitengo liyo yankundwila maaso, yalola usyu waakwe ungati usyu wi malaika.