Milimo 5 - UPANGANO UPYA

Anania na Safila

¹ Leelo kwali ntu wenga ishina lyaakwe i Anania, ponga nu nchi Safila, wakazizye ichuma,

² nga asya impia zimwi ukumfiso, nu nchi kwene wamanyile, waleta vimwi, wawika apa mulu ya mitume.

³ Nga Petlo wavwanga, waati: “Anania, uku chani Shetani watakuzuzya umweso wako ukuifya Mweso Nswefu, nu kusya impia zimwi isha chalo ukumbali?

⁴ Pano chali kunuli, chitali chuma chako? Na pano chalile chakalwa, impia shiyo shitali sha um-maka yako? Nga chili uli wawika iswi li um-mweso wako? Utaifishe untu, leelo waifya Leesa.”

⁵ Lino Anania wapulika amaswi ya wapona pansi wafwa. Ingofi zyayalema antu yoshi yano yapulika.

⁶ Yakatuka alumendo yantela un-syanda, yansenda apanzi ukuyuzyika.

⁷ Nga kazimbo ka nsaa zitatu kasila, unchi nawe awingila, wene atamanyile ichintu chiyo chino ichiloleka.

⁸ Petlo wannena, waati: “Unene, impia zino mukazizye, iziyo kwene?” Nawe wavwanga, waati: “Endita, iziyo kwene.”

⁹ Petlo wannena, waati: “Chili uli umupulikana ukwezya Mweso wa Mwene? Lola, amulu yi yano yazyika uwako yalipo apa nnyango; newe kwene yamkusenda apanzi.”

¹⁰ Nga apona apa mulu yaakwe liyo kwene, anfwa. Alumendo yaya yingila yansana atafwa, yansenda panzi, yamzyika ponga niya.

¹¹ Ingofi zyayalema ikongani lyonsi, na antu yoshi yano yachipulika.

iMitume yachita filangisho ni fipesha-mano

¹² Ifilangisho ni ifipesha-mano tupu fyaombike uku makasa ya mitume unjantu; nayo yoshi yali nu mweso onga yali undukungu lwi Salomoni.

¹³ Na pa yanji yoshi kusi umwi wino weshisha kulemana nayo, leelo antu yashala yaluyatensha.

¹⁴ Yano yasumile yungilishika ainji uku Mwene, ayonsi na anachi.

¹⁵ Apalinji yasyala yalufumya alwale apashi nu kuyawika un-nzila apa visalo na pa vitala, ukuti ngi Petlo wiza, nanti chisau chakwe chemye umwi pali yeneyo.

¹⁶ Na maumba ya antu aya mizi ya mbali mbali ya Yelusalemu yakongana ukuleta alwale na yano yasunyiwa ni ngulu; yoshi yaposhiwa.

Petlo na Yoane unjela na pa ikolo yasi

¹⁷ Akatuka Kapela-nkulu na yoshi yano yali ponga nawe—nayo ali iumfi lya aSadukeo—yafyula usuwa.

¹⁸ Yalema imitume nu kuyawika un-ng'anda-ya-minyololo.

¹⁹ Leelo malaika wa Mwene usiku ayula imilyango ya ng'anda-ya-minyololo, ayafumya, ati:

²⁰ “Yangini mukimilile un-ng'anda-nkulu-iyi-Leesa, muyanene antu amaswi ya yoshi ya Upuma.”

²¹ Nayo pano yapulika, un-ntondo-tondo yingila un-ng'anda-nkulu-iyi-Leesa, yatampa ukusambilisha. Nga Kapela-nkulu awisa, ponga na yano yali nawe, yakonganika antu ya mwitengo, nakombe yoshi ya ana ya Islaeli, yatuma antu uku ng'anda-ya-minyololo, kuti yayalete.

²² Na pano aomfi yaya, yaula ukuyazana un-ng'anda-ya-minyololo; yawela nu kuleta imbalu,

²³ yaati: “Twazana un-ng'anda-ya-minyololo iyazilwe ningo, na yakalolela yimilile apa nnyango; leelo pano twayula, tutasanyile umwi mwenemo.”

²⁴ Nga unkulu-wa-asalifi uwa ng'anda-nkulu-iyi-Leesa naikolo iyakapela, pano yapulika ifintu vi, chiyatalila, yaati: “Chamwa uli ichintu chi?”

²⁵ Untu wenga awiza ayalandila fino antu yalye yano yatwite un-ng'anda-ya-minyololo, yali un-ng'anda-nkulu-iyi-Leesa, yalusambilizya antu.

²⁶ Apano unkulu-wa-asalifi wiyo aya ponga naomfi, yayaleta, leelo kusi ku maka, kuno yofile antu yatayatama na mafinga.

²⁷ Nga pano yayaleta, yayatwala umwitengo. Kapela-nkulu wayatondosya,

²⁸ waati: “Umwemwe, chene! tutamulesizye uku maka, kuti mutachisambilizya ukwizina li? Nemwe, lolini, imulimvya iYelusalemu amasambilizyo ino, nga mulusita ukuleta uwazi wa ntu wi kuno tuli.”

²⁹ Apano Petlo ni mitume yavwanga, yaati: “Chitulungime ukuchindika Leesa ukuluta antu.

³⁰ Leesa wi yatata itu watutulwile Yesu, wino mwemwe mwamumozile mwansamika uku chiti.

³¹ Untu wi Leesa wankusha ukwikasa lyaakwe ilya kwilunji, awe Katungulula na Kafyusha, ape aIslaeli ukuvipela nu kwelelwa amaifyo.

³² Neswe tuli yasyuta ya ifintu vi ponga nu Mweso Nswefu wino Leesa wapa antu yoshi yano yanchindike.”

³³ Pano yapulika, iswi liyo lyayatota um-myenzo, yasita ukuyumola.

³⁴ Leelo untu umwi um-Faliseo, izina lyaakwe i Gamalieli, nawe Kamanya-wa-Ntambi, wachindikwa na antu yoshi, wimilila umwitengo, walanda ukuti imitume yatane yafume uche.

³⁵ Nga wayanena, waati: “Mwe yatata ya mwIslaeli, muchenjele uku chintu chino mukuchita antu ya.

³⁶ Kuno pano ifintu fi fichili filoleke, kwalolike Teuda, wino wautensyanga, fino untu nkulu; antu imyanda inni yalemine nawe. Nawe wumoshilwe, na antu yano yannondile, yasambala, chasyala icha uwele-wele.

³⁷ Ichisila cha ntu wiyo kukatuka Yuda un-Galilea, apa manda ya kusolosha antu, apalula antu tupu yannondela chisila chakwe; nawe kwene alowa, na yoshi yano yannondile yasambala.

³⁸ Ichino ndumunena; Leukini antu ya, yaatini. Kuno ichintu chi, nanti unnimo u, ndi ufumile uku yantu, vyamononeka.

³⁹ Leelo ndi ufumile kuli Leesa, mutangi muonone; mutize muloleke fino mulupingula Leesa.”

⁴⁰ Yasumila amaswi yaakwe; nga pano yita imitume, yayuma nga yayasunda yatachivwanga ukwishina li Yesu, apa chisila yayata, yapite.

⁴¹ Nga yafuma umwitengo yaluchimba, kuno chayalungime yasekelelwa ukwishina liyo.

⁴² Nga manda yoshi un-ng'anda-nkulu-iyi-Leesa num-mang'anda yao, yatatile ukusambilizya nu kusunda iswi-sipe lyi Yesu, fino i Klisto.