Milimo 26 - UPANGANO UPYA

Paulo aluufwangila pali Aglipa

¹ Nga Aglipa anena Paulo, ati: “Ungaufwangila apa lwako.” Apano Paulo akatusya ikasa lyaakwe, kuti autompolole.

² Ati: “Nduchimba um-mweso wane, mwene Aglipa, nambuvwangila nenkola ilelo. uku ifintu vyonsi fino nasitakiwa na aYudea.

³ Vino wamanyikisha nkani nkani intambi nu kupashana konsi ukwa aYudea; ichino ndukulomba umpulikishe ningo nu kuntekelela.

⁴ “Kuno aYudea yoshi yamanyile uwikalo wane ukufuma uku ulumendo, pano nali unnumendo ponga nalumendo nachane uku Yelusalemu.

⁵ Yamanyikisye nkani ukufuma uku ntangulo, ngi yakasime ukungimikila, fino nali mFaliseo uku kulondela ningo ntambi ya dini itu.

⁶ Na kasalaka ngimilile pa mputwilwe unnandu, uku utailo wa kuzana ulanyo uno Leesa walainye yatata itu,

⁷ ndi fino inko zitu ikumi na ziili zilulolela uloleke, ichino yachita unte yalupepa Leesa usiku nu nsanya. Ukulolela ku, we mwene Aglipa, ukuno kwaleka nasitakiwa.

⁸ Kuno ichani mulwelengula fino iswi liyo litangi lizumilwe, fino Leesa alututulula afwi?

⁹ Umwenemo nelengwile um-mweso wane, fino chindungime kuchita ifintu tupu fino vitaine nizina lyi Yesu wa ku Nazaleti.

¹⁰ Nene ifintu vi naviombaa uku Yelusalemu; nayalile ainji apa yaswefiwa un-ng'anda-ya-minyololo, angi, mpilwe amaka naikolo iyakapela; na pano yumolwanga, nazumilizyanga.

¹¹ Na maila tupu um-mang'anda yao yoshi ayi Leesa nayachuzyanga, nayachitilanga amaka, kuti yavwange imisalula, ndakalika wa ntu wino wapena, njazunya num-mizi ya weni kwene.

¹² “Uku chintu chiyo walangi, pano nduya uku Damaski, uku maka nutume wa ikolo iyakapela,

¹³ we mwene, unsanya pakasi un-nzila, nawine umwengelela ukufuma umwiyulu, ulusile umwengelela wi lanzi, ungochelezya nene, ponga na yano yalondekine nene.

¹⁴ Tupona apansi swensi, mpulika iswi liluvwanga nene uku lulumi lwa chiEblania, liluti: ‘Saulo, Saulo, nga fino wanzunya? Wambuchesezya chaka wa mpunda ino iluuma inkola ku ntuwa ya mwene wakwe!’

¹⁵ Nene navwanga, nati: ‘Wewe wini, Mwene?’ uMwene wanvwanzya, waati: ‘Nene Yesu, wino wewe ukunzunya.

¹⁶ Leelo katuka, wimilila, kuno nakusokolokela, kuti nkuwike uwe momvi na syuta wa ifintu vi fino wandolamo, nu ku ifintu fino muli vyenevyo nduloleka kunuli.

¹⁷ Ndukufyusya na antu yako, na antu yakulukuwa, yano nakutuma kuno yali,

¹⁸ uyalansye nu kuyaseleula yasye ichanda nu kuseleukila umwengelela, yate na maka yi Shetani, nu kuungama kuli Leesa, kuti yelelwe amaifyo yao, nu pyani kuno yali yano yaswefiwa uku usumilo uno uli kunondi.’

¹⁹ “Ichino, we mwene Aglipa, ntatile ukuchindika amalele yao aya mwiyulu.

²⁰ Leelo natangwile ukusunda aya um-Damaski ni Yelusalemu, ninsi yoshi iya Yudea, na antu yakulukuwa, ukuti yavipele nu kulungama kuli Leesa, nu kuomba imilimo ino ilingine nu kuvipela kwao.

²¹ Uku ifintu fiyo, aYudea yandema un-Ng'anda-nkulu-iyi-Leesa, yasita ukungumola.

²² Ichino fino naswilisiwa na Leesa, ngimilile fika ni leelo li, ndwimikila uku anono na ikolo kwene, nga ntalulanda chimwi, siku chino amalau na Mose yafwansile, fino chilwisa.

²³ Fino chilungime Klisto aluchula na fino unkola alutangula atutuluke uku yafwi, aluma imbila ya maswi ya mwengelela uku antu yaakwe nu ku yakulukuwa.”

²⁴ Walangi pano waufwangila vi, Festo afwanga ukwiswi kulu, ati: “Paulo, wapena! Ukusoma kwako nkani kwakupenya!”

²⁵ Leelo Paulo ati: “Ntapenile, Festo, mwene nkulu, nduvwanga amaswi ya chumi na ya mano.

²⁶ Kuno umwene amanyile amaswi ya ifintu vi, nene ngavwanga nawe uku chiposye; kuno manyile nkani fino kusi iswi nanti lyonga pali yao lino atamanyile; kuno ichintu chi chitaombike ukumbali.

²⁷ Mwene Aglipa, Chene! Uzumile amalau? Manyile fino uzumile!”

²⁸ Aglipa wanena Paulo, waati: “Uku maswi mache uluti ukunchita mbwe mklisto.”

²⁹ Nga Paulo annena, ati: “Ndulomba Leesa ukuti, nanti uku maswi mache, nanti uku maswi tupu, asi wewe wenga, leelo na yoshi, yano yalumpulikisya ilelo, yawe wi nene, ukunyepa pole.”

³⁰ Ngu mwene nu nnâsi na Benise na yano yatenzi ponga yimilila.

³¹ Pano yafuma yavwanzyanya ukumbali, yaati: “Untu wi atachisile chimwi, chino angafwila nanti ukunyepwa.”

³² Aglipa wanena Festo, waati: “Untu wi wali asapulwe, ngi atali asite ukuya kuli Kaisali.”