Milimo 24 - UPANGANO UPYA

Paulo aluufwangila pali Feliki

¹ Apa chisila cha manda yasano, Anania Kapela-nkulu, aya ponga na ikolo yamwi, na Kafwanga umwi isina lyaakwe i Tetulo, nga yalandila unnâsi amaswi yi Paulo.

² Nga pano yamwita, Tetulo atampa ukunnanda, ati: “Kuno apa wangalizi wako twatekana, mwene Feliki unkulu, ni ifintu fisipe fisa unjantu yako,

³ tusumile nu kusamalisha nkani manda yoshi na ponsi.

⁴ Leelo ntakutonsha na maswi tupu, ndukulomba, utupulikisha uche uku uuntu wako.

⁵ Kuno itulola untu wi wayembuka, aluleta ivitina uku aYudea yoshi aya kuno ukunzi, na kaili uwikolo wa dini ya aNazoleo.

⁶ Na kaili wezizye ukutûkizya ing'anda-nkulu-iyi-Leesa. [Twannema, twasita tumputwile unnandu uku ntambi itu.

⁷ Leelo Lisia, Unkulu-wa-asalifi awiza, amtisya um-makasa itu uku maka.

⁸ Anena yano yamsitakile yize kunuli.] Unkomekesya wenkola, wammanya amaswi, yano twamsitakile.”

⁹ aYudea nayo kwene yazumila, yaati ifintu vi umuli-mo.

¹⁰ Nawe Paulo, pano unnâsi wamsinizya ikasa, avwanga, ati: “Kuno manyile fino wewe uli mputuzi wa antu ya uku myaka tupu, nduuvwangila nenkola ukumweeso wa kuchimba.

¹¹ Kuno ungamanya fino amanda ikumi na yaili yachili yasile fuma lino napisile ukuya uku Yelusalemu ukuyupepa.

¹² Antu ya yatambwine un-ng'anda-nkulu-iyi-Leesa ukupazyanya na umwi, nanti ukutunkola antu, nanti um-mang'anda yao ayi Leesa, nanti umunzi.

¹³ Nga yatangi yalande ivya chumi fino yalunsitakila li kwene.

¹⁴ Leelo apa maaso yako nduuvwangila apatiswe, uku nzila ino yaluti dini, ifino nkupepa Leesa wi yatata itu, nu kuzumila ifintu vyonsi fino viine ni Ntambi, na fino vyandikwe um-vitabu vyi yakalauzya.

¹⁵ Ndi nutailo kuli Leesa, uno nayo kwene yazumile, fino kuluwa ukututuluka kwa yafwi, ayachumi na yasi ya chumi kwene.

¹⁶ Ichino nene kwene ndemisye ukulola um-mweso wane angi uswefile apa maaso yi Leesa, na pa maaso ya antu uku ifintu vyonsi.

¹⁷ Ichisila cha myaka tupu nizile ukuleta mawila ni vipelo uku yantu ya kumwitu.

¹⁸ Yandola un-ng'anda-nkulu-iyi-Leesa, lino namala ukuswepa, nga ntali niumba nanti mpanzyela. Leelo yaliko aYudea yamwi yano yafumile uku Asia,

¹⁹ yano ngangi yali pa, apa maaso yako yantunosye ngi yali niswi limwi nene.

²⁰ Nanti antu ya kwene leka yavwange akola, ichintu uli chino yawine naifya, pano nimilile umwitengo.

²¹ Siku ukwiswi li lyonga, lino nafumizye iswi, pano nimilile apakasi pali yeneyo, nu kulanda ukuti: ‘Uku nnandu wa kututuluka kwa yafwi, ngimilile vi apa maaso ino ilelo, ukuputwilwa unnandu!’ ”

²² Leelo Feliki wino wamanyikisya ningo inzila iyo, walandalizya, ati: “Alula pano Lisia Unkulu-wa-asalifi wiza, apano nduputula unnandu wino.”

²³ Anena unsalifi unkulu, kuti ayalilwe, leelo atalesiwa chimwi, nanti umwi pali yakatakwe ukumsungula.

Paulo pali Feliki na Dlusila

²⁴ Ichisila cha manda yamwi Feliki awiza nunchi Dlusila, nawe wali mYudea, atuma kuti yite Paulo ampulikisye apa kuzumila kwa muli Klisto Yesu.

²⁵ Nga Paulo pano walanda amaswi ya chumi nu kuukola na ya uputuzi wa milandu uno ulwiza, Feliki alemeka ingofi, ati: “Tana pitanga, ndukwita uwanda unnina.”

²⁶ Wene wiyo watangi Paulo wamupa impia, ichino wamwitanga amaila tupu, ukwizya nawe.

²⁷ Pano imyaka iili yasila, Pokio Festo apokelela unnimo wi Feliki, uwino alâsa. Nga Feliki fino wakasi ukumyalazya aYudea, asya Paulo anyefilwe.