Milimo 23 - UPANGANO UPYA

¹ Paulo akundwila amaso antu ya mwitengo, ati: “Yachane, inene ntenzi pali Leesa nu mweso uswefile ukufika ni leelo li.”

² Nga pano Kapela-nkulu Anania anena yaya, yano yimilile apipi nawe, yamume apa nnomo.

³ Apano Paulo wanena, waati: “Leesa wankuma wewe, usimbi uno wapakwa iswakala! Uwewe uli pa ukunputwila unnandu ukuyana ni ntambi, newe ulusita ngumwe fino chitaine ni Ntambi?”

⁴ Yano yimilile apipi nawe, yaati: “Chene! Ulutuka Kapela-nkulu wi Leesa.”

⁵ Nga Paulo ati: “Ntamanyile yachane, fino i Kapela-nkulu, kuno chaandikwe: ‘Utachifwanga iviipe uku wikolo wa antu yako.’ ”

⁶ Paulo pano wamanya fino mbalinga aSadukeo na mbalinga aFaliseo, afumya iswi umwitengo liyo, ati: “Yachane, nene mFaliseo, umwana wa mFaliseo, nemwi nduputwilwa unnandu uku nnandu wa utailo wa kututuluka kwa yafwi.”

⁷ Pano wavwanga fiyo, kwawa ukupazyanya apa aFaliseo na aSadukeo, iumba lyapalunkana.

⁸ Kuno aSadukeo yakuluti, kusi ukututuluka kwa yafwi, nanti malaika, nanti umweso, leelo aFaliseo yazumile vyonsi.

⁹ Kwawa ichongo nkani, yakaandika yamwi aya ku aFaliseo, yimilila, yapasha, yaati: “Tutawine uipe umwi uku ntu wi; ivyo ngu mweso nanti malaika alufwanga nawe, ichani?”

¹⁰ Pano impanshela yapona, Unkulu-wa-asalifi alemeka ni ngofi kuno yangumola Paulo, anena asalifi yaye ukuyu mtompolola um-makasa yao, nu kumtwala um-mausi.

¹¹ Usiku wa wanda uo kwene uMwene awimilila pipi nawe, avwanga, ati: “Usimpe umweso, kuno ndi fino wangimikile usyuta uku Yelusalemu, ifino ungimikila nu ku Loma kwene.”

aYudea yamba kumumola Paulo

¹² Pano kwacha, aYudea yakongana yamba, yalapilana fino yatalulya nanti ukunwa fika na lino yacha yumola Paulo.

¹³ Na yano yalapiline fiyo yalusile antu amakumi yani.

¹⁴ Nga yaya uku ayikolo iyakapela na akombe, yaati: “Twalapila, tutalwezya chimwi fika na lino twacha tumola Paulo.

¹⁵ Ichino mwemwe, ponga nakombe ya mwitengo, nenini Unkulu-wa-asalifi, annete pano muli, kunti mulusita ukumanyikisya ningo imbalu zyaakwe. Neswe ituutya ukumumola pano achili apalamile.”

¹⁶ Leelo umwipwa wi Paulo apulika imbalu zya kwamba kwao, aya wingila um-mausi muno yayalile Paulo, annandila.

¹⁷ Nga Paulo awita unsalifi wikolo, ati: “Senda unnumendo wi uku Nkulu-wa-asalifi, kuno ali niswi lya kunnena.”

¹⁸ Nga amsenda, amtwala uku Unkulu-wa-asalifi, annena, ati: “Paulo unnyepwa angisile asita akuletela unnumendo wi, kuno ali niswi lya kukunena.”

¹⁹ Unkuluwa-asalifi wiyo annema ikasa, aya nawe ukumbali, amtondosya, ati: “Uli niswi uli lino ulusita ukunnena?”

²⁰ Ati: “aYudea iyamba uku kulomba, kuti utwale Paulo kuli yeneyo uku wiyulu, untwale apa yakombe, chikolane ungati yalusita ukumanyikisya ningo amaswi yaakwe.

²¹ Ichino wemwi utachi yazumila, kuno antu kuluta amakumi yani iyamtekamila, iyalapila yatachilya nanti ukunwa fika na lino yacha yamumola; li kwene iyateyanya yalulolela, kuti wewe uyazumile.”

²² Unkulu-wa-asalifi wiyo wata unnumendo, kuti apite, amsisintizya kuti atanena untu umwi, fino ukunnena amaswi yao.

Yanmtwala Paulo uku Kaisalia

²³ Awita asalifi akulu yaili, ati: “Teyanyini asalifi imyanda ili, yaye uku Kaisalia, nasalifi akulukowela-falasi amakumi saba, na yamasumo imyanda ili, pano antu izya yata.

²⁴ Ayanena yateyanye inkala ningo, yaakwezya Paulo penepo, yamsenda ningo kwa nnâsi Feliki.

²⁵ Waandika imbaluwa uku maswi ya:

²⁶ “Klaudio Lisia, ndukulaula Feliki unnâsi nkulu.

²⁷ “Untu wi aYudea yannemile, yasita ukumumola; nga naya na asalifi ukuyumtula; kuno napulika fino umLoma.

²⁸ Nene nakasi ukumanya unnandu uno yamsitakile, namtwala ukwitengo.

²⁹ Nalola fino asitakilwe uku nnandu wa ntambi shao, leelo kusi iswi limwi lino yamsitakile, lino angumolelwa nanti ukunyepwa.

³⁰ Nga pano yannandila fino iyamba uku ntu wi, nanneta zuwa kunuli, nanena na yano yamsitakile kwene, kuti yavwange amaswi yao apa maaso yako.”

³¹ Nga asalifi yao yasenda Paulo ndi fino yanenilwe, yamtwala usiku kwi Antipatli.

³² Kulucha un-ntondo yasya yakakowela-ya-falasi yapita ponga nawe, nayo yawela uku mausi.

³³ Yalye pano yafika uku Kaisalia, yapa unnâsi imbaluwa ilye, yawika Paulo apa maaso yaakwe.

³⁴ Walangi nawe, pano waisoma, ayatondosya kuno afumile, pano wanenwa fino untu wa ku Kilikia,

³⁵ ati: “Ndupulika unnandu wako, pano yiza yano yakusitakile.” Nga asita, kuti asungwe un-ng'anda-ya-wene wi Yelodi.