Milimo 22 - UPANGANO UPYA

Paulo aluufwangila apa aYudea

¹ “Mwe yachane na yatata, pulikini leelo ukuuvwangila kwane apa maaso yino kasalaka.”

² Pano yapulika fino aluvwanga nayo uku lulumi lwa chiEblania, yatusha namya! Nga ati:

³ “Nene ntu mYudea, navyalilwe uku Talso, unzi wa Kilikia, leelo nalelilwe un-nsi u apa mulu yi Gamalieli, nsambiliziwa Intambi si yatata itu fino chiine, nawa ntu wa nte kuli Leesa, ndi fino mwensi muli ilelo li.

⁴ Nasunyile antu ya nsila iyo kufika na kufwa, angi nduchuzya antu nu kuyatwala un-ng'anda-sha-minyololo, ayonsi na yanachi.

⁵ Ndi fino Kapela-nkulu angimikile naikolo ya mwitengo kwene. Yano napokelile imbaluwa ukutwala uku yachao; naya uku Damaski, kuti ndete yano yali kweneko uku Yelusalemu, angi yanyefilwe, kuti yumwe.

⁶ “Nga pano napitanga napalamila uku Damaski unsanya pakasi, zuwa umwengelela ukufuma umwiyulu wangochelezya konsi konsi.

⁷ Napona pansi, napulika iswi lilunena liluti: ‘Saulo, Saulo, ifino wanzunya?’

⁸ Nati: ‘Wewe wini, Mwene?’ Wannena, waati: ‘Nene Yesu wa ku Nazaleti, wino wewe ukunzunya.’

⁹ Na yano yali ponga nene, yawine umwengelela uo, leelo yatapulika iswi li wino wavwanzile, nene.

¹⁰ Nga mvwanga, nti: ‘Nanchita uli, Mwene?’ uMwene wanena, waati: ‘Wimilila, yanga uku Damaski; kweneko wannenwa ifintu vyonsi fino vyasololwa, kuti uchite.’

¹¹ Nga fino ntalolanga uku nnandu wa ukali wa mwengelela uo, yandema ikasa yano yali ponga nene, nga nja uku Damaski.

¹² “Ngu ntu wenga, izina lyaakwe i Anania, untu wa kapanga uku Ntambi, wino wavwangilwa uluzifu na aYudea yoshi, yano yatenzi kweneko,

¹³ awiza awimilila apipi nene, anena, ati: ‘Saulo wachane, ulole!’ Liyo kwene inkatusya amaso yane, nnola.

¹⁴ Ati: ‘Leesa wi yatata itu wakusolwile kali wewe, kuti umanye fino akasi, unnole uWa-Chumi, nu kupulika iswi lino lifumile umu nnomo. wakwe.

¹⁵ Kuno wamwa syuta waakwe uku yantu yoshi uku ifintu fiyo, fino walola nu kuvipulika.

¹⁶ Nga ululolela chani? Katuka, ubatiziwe, ufulwe amaifyo yako, uwite izina lyaakwe.’

¹⁷ “Walangi pano nawela uku Yelusalemu ndusalika un-ng'anda-nkulu-iyi-Leesa, umweso wapita akashe.

¹⁸ Nga nannola, nawe anena, ati: ‘Kalauka fuma um-Yelusalemu zuwa, kuno yatalupulika usyuta wako uku maswi yane.’

¹⁹ Nene nati: ‘Mwene, yamanyile yao, fino nene nayanyepanga un-ng'anda-ya-minyololo, yano yakuzumila, nu kuyuma um-mang'anda yao yoshi ayi Leesa.

²⁰ Nu wazi wi Stefano, syuta wako, pano witilwe, nene kwene nimilile penepo, angi nsumile, nu kulolela imyenda yi yano yamumozile.’

²¹ Nga Wene anena, ati: ‘Pitanga, kuno nene nakutuma, uye ukutali, uku antu yakulukuwa.’ ”

Um-mausi

²² Nga yampulikisya fika niswi liyo; yafumya amaswi yao, yaati: “Tisya untu wi kuno ukunzi, kuno chitaile ukuti alali umpuma!”

²³ Walangi pano yaluma ichongo nu kupepensya imyenda yao, nu kutukula inkungu umwiyulu,

²⁴ Unkulu-wa-asalifi alanda, kuti aletwe um-mausi, ati atondosiwe amaswi yaakwe apa kumwa imikowa, ukuti amanye ichani chino yamumila ichongo vi.

²⁵ Nga pano yannyepa ni choze, Paulo anena unsalifi unkulu wino awimilile pipi nawe, ati: “Chene! Ichenecho mwemwe ukuma um-Loma, nawe achili aputwilwe unnandu?”

²⁶ Unsalifi unkulu wiyo, pano wapulika, waya wanena Unkulu-wa-Asalifi wilye, waati: “Ulusita uchite uli? Kuno untu wi um-Loma.”

²⁷ Nga Unkulu-wa-asalifi awisa, amtondosha, ati: “Nena ngi we um-Loma?” Nawe ati: “Endita!”

²⁸ Unkulu-wa-asalifi ati: “Nemwi nene, nkola-nsi naupasile uku nsao tupu.” Paulo nawe ati: “Nemwi nene m-Loma, navyalilwe mu.”

²⁹ Na yano yalile iyaati tumtondoshe, liyo kwene yata yampita; nga Unkulu-wa-asalifi wiyo nawe wopa, pano wamanya fino mLoma, na fino watannyepa.

Apitengo

³⁰ Apa wanda wa uwili asita ukumanya icha chumi, uku chani wasitakiwa na aYudea; nga amsapula, asita ayikolo iyakapela nitengo lyonsi likongane. Nga aleta Paulo, amwika pano yali.