Milimo 21 - UPANGANO UPYA

Paulo uku Tilo ni Kaisalia

¹ Nga chali pano twatana nayo, tupita ukuya uku Kosi ukwitanga lyonga, uwanda wa uwili tufika uku Lodo, nu kufuma kuo tuya uku Patala.

² Nga tuzana imeli ino ilulamba ukuya uku Foiniki, tukwela tupita.

³ Nga pano twalola Kiplo, twausya ukwimani, tupita uku Silia, twikila uku Tilo, kuno kuo ukuno imeli yamwisya nchili zyaakwe.

⁴ Pano twalola alondeshi, twikala kweneko amanda saba. Nayo yanena Paulo uku Mweso, yaati: “Utachiya uku Yelusalemu.”

⁵ Pano twamala amanda yao, tufuma, tupita. Antu yoshi ponga na anachi na ana yao, yatufumya umunzi. Twafukama un-nusanga, twapepa.

⁶ Nga pano twalambalikana, tukwela um-meli, nayo yawela uku mwao.

⁷ Nga pano twamala inzila itu, ukufuma uku Tilo tuya uku Putolemai, tulaula achitu, twikala kweneko uwanda onga.

⁸ Kulucha untondo tufuma tuya uku Kaisalia, tuya un-ng'anda mwi Filipo, kasunda wiswi-sipe, wino wali uwa pali yalye saba, twikala ukwakwe.

⁹ Untu wi wali na ana yanni asungu, yano yatatana yonona uto wao; nayo yalauzyanga.

¹⁰ Nga pano twatenzi kweneko amanda ingi, kalauzya wenga, izina lyaakwe i Agabo, awiza ukufuma uku Yudea.

¹¹ Pano watuzana, watola unkowa wi Paulo waunyepa amulu na makasa, ati: “uMweso Nswefu aluti: Alavi ifino aYudea ya ku Yelusalemu yalunyepa unkola nkowa u, nayo yalumfima um-makasa ya antu yakulukuwa.”

¹² Sweswe na antu ya pao kwene, pano twapulika fiyo, twampapatila, kuti atachiya uku Yelusalemu.

¹³ Apano Paulo avwanga ati: “Muluchita chintu uli, ukulila nu kunfisya uku mweso? Kuno nemwi nzumile, asu kunyepwa sile, leelo nukufwa kwene, um-Yelusalemu uku nnandu wizina lya Mwene Yesu.”

¹⁴ Pano wakana ukutupulika, twantuzya, tuti: “Vino uMwene akasi, viombeke.”

Paulo uku Yelusalemu

¹⁵ Ichisila cha manda yao, tusenda ivivya vitu ukuya uku Yelusalemu.

¹⁶ Twalondekana n alondeshi yamwi aya ku Kaisalia, yasenda Mnasoni untu wa ku Kiplo, unndondeshi wa kali, nawe uwino twamfikila ukwakwe.

¹⁷ Nga pano twafika uku Yelusalemu, achitu yatupokelela uku kuchimba.

¹⁸ Nu wanda wa uwili Paulo aya kwi Yakobo ponga neswe, nakombe yoshi yalipo.

¹⁹ Pano wayalaula, ayalandila ifintu vyonsi, chonga chonga, fino Leesa wachisile uku yakulukuwa uku nnimo wakwe.

²⁰ Nayo pano yapulika yatensya Leesa, yannena, yaati: “Wachitu, walola fino aYudea yano yazumila yali amaelfu tupu, nayo yoshi yali nunte uku ntambi.

²¹ Nayo iyalandilwa imbalu shako, fino ulusambilisha aYudea yoshi, yano yatensi unjantu yakulukuwa, kuti yate Ntambi yi Mose, uluyanena kuti yatachichita ana yao ichibalu, nanti ukulondela intambi.

²² Nga chili uli? Kuno yasuula ukupulika fino ukwiza,

²³ Ichino chita chino twakunena. Kuli antu yani kuno tuli, yano yanyepwa nulanyo.

²⁴ Tola antu yao, uuswefye ponga nayo. Uyalipile, kuti yapele inyele zyao; antu yoshi yamanye fino amaswi yoshi yano yavwanzile kunuli yasi yeneyo. Leelo fino newe kwene ukupita ningo nu kulema intambi.

²⁵ Leelo uku antu yakulukuwa yano yazumila, twandika uputuzi witu kuli yeneyo, ukuti yasye ifintu fino vyafimwa amawila uku myao, nu wazi, ni nyama i cha uwila, nupundu.”

²⁶ Apano Paulo atola antu yao, ngu wanda wa uwili auswefya ponga nayo, awingila un-ng'anda-nkulu-iyi-Leesa, auma imbila ya kumala amanda ya kuswepa, ukufika na lino uwila wapiwa kuli wensi uwa pali yeneyo.

Yalema Paulo un-ng'anda-nkulu-iyi-Leesa

²⁷ Nga pano amanda saba yapalamila ukusila, aYudea yano yafumile uku Asia, yannola un-ng'anda-nkulu-iyi-Leesa, yasongelekanya antu yoshi, yannema.

²⁸ Yuma ichongo, yaati: “Mwe yatata ya mwIslaeli, twazwini; untu wi ali wino alusambilisha antu yoshi konsi konsi ukusula antu ni ntambi nu wikalo u kwene. Na kaili ukuluta fyoshi fi, wingisha aGliki un-ng'anda-nkulu-iyi-Leesa, walyikisha apantu paswefu!”

²⁹ Kuno yalile iyalola Tlofimo wa ku Efeso umunzi ponga nawe, wino yatangi palumwi Paulo atamwingizya un-ng'anda-nkulu-iyi-Leesa.

³⁰ Unzi onsi watûkana, antu yakongana ulwilo; yalema Paulo yamkwesa, yamfumya un-ng'anda-nkulu-iyi-Leesa; liyo kwene imilyango iyalwa.

³¹ Nga pano yasita ukumumola, amaswi yazana Unkuluwa-asalifi, fino i Yelusalemu yoshi ititûkana.

³² Liyo kwene atola asalifi naikolo yao, aya zuwa. Nayo pano yalola Unkulu-wa-asalifi na asalifi, yata ukuma Paulo.

³³ Apano Unkulu-wa-asalifi apalamila, annema, alanda kuti anyepwe ni minyololo yili, atondosya, ati: “Uwini wi? Nga watachita chani?”

³⁴ Yamwi apiumba yuma ichongo, yaati vi na yamwi vi. Nga pano waula ukumanya chimwi uku nnandu wa chongo, asita kuti atelwe um-mausi.

³⁵ Nga pano wafika apa kukwelela wali wa kusendwa na asalifi, uku nnandu wa ukali wa maumba.

³⁶ Kuno iumba ilya antu lyannondile, liluma ichongo nukuti: “Mumole wi!”

³⁷ Nga lino Paulo alutwalwa um-mausi, avwanzya Unkuluwa-asalifi, ati: “Ngavwanga chimwi panuli?” Nawe ati: “Umanyile ichiGliki?

³⁸ Chene! asi we mMisili, wino iyulu nkoto pa, wakomanyizye nu kutandula antu, nu kuyakolelela uku luselesenga yalye ielfu zini, yano yatangi ayumozi?”

³⁹ Paulo ati: “Nene untu mYudea, ne wa ku Talso, unzi wa Kilikia. Nenkola nzi uno umanyike. Napapata uleke mvwange na antu ya.”

⁴⁰ Nga pano wamzumila, Paulo awimilila apa kukwelela, asinizya antu nikasa; nga pano yatuzya na chele, ayavwanzya uku chiEblania, ati: